یعقوبِ نامه 4 - گیله مازدنیا پَرسّی یه هُشدار 1 چی باعث بونه شیمِی میَن دَعوا دَکِه و چی باعث بونه شِیمی میَن جنگ و جِدال دَکِه؟ مَگِه شِیمی هَوا و هَوَس جی نیِه که شِیمی وجودِ میَن دَرِن جَنگِنِن؟ 2 یِچّی یه آرزو رِه کانید، وَ وختی اونِهِ بِدَس نیارِنین آدَم کُشِنِین. طَمَع کانید، وَ وختی نَتَّنین اونِهِ بِدَس بیارین جنگ و دَعوا راه تُووادِنین، شُما نِدارید، اینِه وَسین که دَرخواس نُکانید! 3 اون موقِه ایی هم که دَرخواس کانید، نَگیرنین، چون بَدِ نیّتِ هَمرَه دَرخواس کانید تا شیمی هَوَا و هَوَس وَسین صَرف هَکُنید. 4 اِی زَناکاران، مَگِه نِدانین دُنیایِ هَمرَه دوسی هَکُردَن خُدای هَمرَه دُشمَنی هَکُردَنِ؟ پَس هر کی اینهِ دُمّال دَرِه که دُنیایِ هَمرَه دوسی هَکونه، خودِشِه خُدایِ دُشمَن کانه. 5 یا اینکه گَمان کانید مُقَدَّس نِوِشتِه بیخدی بَنوِیشته که: «خُدا اون روحی که اَمیِ دِلِه بَنَه سَر، خیلی غیرت دارِه؟ 6 وَلی خُدا بیشتر فیض بَخشِنِه، اینِه وَسین گونِه: «خُدا مَغرورِان پِیش هیسَنِه، وَلی فروتَنان رِه فیض بَخشِنِه.» 7 پس شِمِرِه خُدای تَسلیم هَکُنید. اِبلیسِ پِیش بیاِسید و اون شیمی جی دَرشونِه. 8 خُدا رِه نَزدیک هَبین و اون هَم شِمِرِه نَزدیک بونه. اِی گُناهکاران، شیمی دَسِ پاک هَکُنید، و اِی دو دِلِشان، شیمی دِلِ پاک هَکُنید. 9 به حالِ زار دَکِین و بِرمِه وزاری هَکُنید. شیمی خَنده ماتَم هَبو و شیمی خُشحالی غُصِّه. 10 شِمِرِه خُدایِ پِیش فروتَن هَکنید، که اون شِمِره سَر بُلَن کانه. 11 اِی اَداشان، هَمدِیگَرِ بَدِ نَگُویید. هر کَس خودِشَه اَداشِ جی بَد باگو، وَ یا خودشه اَداشه داوری هَکونه، شریعَتِ جی بَد باگوته و شریعَتِ داوری هَکوردِه. وَلی اگه تو شریعَتِ داوَری کانی، تو شریعتِ داوَر هَبَیی نه اونیکه اونه بِجا هارنه! 12 فقط یِنفر دَرِه که شریعتِ هَدَه و داوَرِ، که اون هَم هَمونیکه تانهِ نِجات هَدِه و هَلاک هَکونه. پس تو کی هیسی که دَری تیِ هَمسادِه رِه داوری کانی! نادُرس فخر فردا رِه 13 اَسِه شُما که گونید: «اِمروز یا فَردا این شَهر یا اون شَهرِ شونیم و یک سال اوجِه ماندِنیم و کاسِبی کانیم و سود کانیم،» 14 شُما حتّی نِدانید فَردا چی خَنِه هَبو. شِیمی زندگی چیِه؟ ایتا بُخارِ مِثانید که یه لحظه ظاهر بونه و ایما نیست بونه. 15 پَس بایسّی اینجور باگویید: «اَگه خداوند بِخواد، زندهِ ماندِنیم و اینجور و اونجور کانیم.» 16 اینجور که مَعلومِه شُما شیمی غُرورِ دِلِه دَرید فخر کانید. اینجور فخر هَکُردَن بَدِ. 17 پس هر کی بِدانهِ چه کاری درُسِ و اونِهِ انجام نَدهِ، اون وَسین گُناه مَحسوب بونه. |
@ 2024 Korpu Company