یعقوبِ نامه 2 - گیله مازفَرق نَنین 1 می اَداشان، شماها که اَمیی خُداوند عیسیِ مسیح، اون خُداوندِ جَلالِ ایمان دارِین، آدَمان میِن فَرق نَنین. 2 چون اَگه کَسی ایتا طلایِ مِچِکِ و خُجیرِ لِواس هَمرَه شِیمی مَجلِس دِلِه بیه، وَ ایتا فَقیرَم کآنِه لِواس هَمرَه دِلهِ بیه، 3 وَ اگه شُما اونیکه خُجیرِ لِواس خودشه تَن دارِه رِه بیشتر تَن هَگیرین و اونه باگویید: «این خُجیرِ جا بِنیش» وَلی اونیکه فَقیر رِه باگویید: «هَموجِه بیَاس!» وَ یا: «ایجه می لِنگِ وَر زِمین سَر بِنیش،» 4 مَگِه شُما خودتان شیمی میَن فَرق نَنِین و پَلیدِ فِکرِ هَمرَه قِضاوَت نکُردین؟ 5 عزیزِ اَداشان، گوش هَدین! مَگِه خُدا این دُنیایِ فَقیرِان رِه دوجین نَکُردِه تا ایمان دِلِه دولتمند هَبون و پادشاهی ایی رِه به اِرث بَبِرَن که اون خودِشه دوس داران رِه وَعده هَدَه؟ 6 وَلی شُما فَقیرِ آدَمی رِه بی حُرمتی هَکُردین. مَگِه پولداران نییَن که شِمِره ظُلم کانَن و شِمِره مَحکَمِه کِشاندِنَن؟ 7 مَگِه اوشان نییَن که اون خُجیرِ اِسمی که شِیمی سَر دَرِه رِه، کُفر گونَن؟ 8 اَگه راس راسی شاهانِه شریعَت رِه طِبقِ اون نِوِشتِه مُقَدَّس بِجا بیارین که گونِه: «تیِ هَمسادِه رِه ایتا تیِ مِثان دوس بِدار،» خُجیر کار هَکوردین. 9 وَلی اَگه فَرق بَنین، گُناه هَکُردین و شریعَت شِمِره تقصیرکار دینه و شِمِره مَحکوم کانه. 10 چون اَگه یِنَفر تمام شریعَت رِه بِجا بیارِه وَلی ایتا یه دِلِه کوتاهی هَکونه، تمام اون شریعتِ دِله گناهکارِه. 11 چون اونکه باَگوته: «زَنا نَکُن،» اینجور هَم باَگوته: «قتل نَکُن.» اگه حتّی زَنا نَکُنی، وَلی قتل هَکُنی، شریعَتِ بِشکِندِیی. 12 پَس اون آدَمان مِثان گَب بَزِنین و عَمل هَکُنید که دانَن طِبق شریعتِ آزادی، بر اوشان داوَری بونَه، 13 چون داوَری نِسبت به اونیکه رَحم نَکُرده بو، بی‌رَحم بونه. رَحم داوَری رِه پیروز بونه! ایمانِ بی عمل بَمِردِه 14 می اَداشان، چه فایده ایی دارِه اَگه یِنفر اِدّعا هَکونه ایمان دارِه، وَلی اعمال نِداشتِه بو؟ اینجور ایمانی تانهِ اونه نِجات هَدِه؟ 15 اَگه ایتا اَداش یا خاخُر، لِواس و روزمَرِه خوراک مُحتاج هَبو 16 شیمی جی یِنَفَر اوشانه باگو: «بیشین بِسلامت، وَ گرم و سیر هَبین،» وَلی اوشانه نیازهای جِسمی یه رَفع هَکُردَن وَسین هیچ کاری نَکُنِه، چه فایده ایی دارِه؟ 17 پَس ایمان هَم به تنهایی، اگه اعمالِ هَمره نبو، بَمِردِه. 18 ولی یِنَفر ممکِنِه باگو: «تو ایمان داری و مَنَم اعمال دارَم!» تو تیِ ایمانِ اعمالِ جی سیفا مَرِه نِشان هَدِه و مَنَم می ایمانِ می اَعمالِ هَمرَه تِرِه نِشان دَنَم. 19 تو باوَر داری که خُدا ایتائِه. خوب کانی! حتّی آلِشان هَم اینجور باور دارَن و تَرسِ جی لَرزِنِن! 20 اِی نادان، خَنی بِدانی چِرا ایمان بی اعمال بی‌ثَمرِ؟ 21 مَگِه اَمیِ جَد ابراهیم خودشه اَعمالِ هَمرَه صالِح بِشمارِسِّه نَبا، اون موقِه ایی که خودشه ریکا اِسحاقِ قُربانگاه سَر پیشکَش هَکُردِه؟ 22 دینی که اونه ایمان و اَعمال با هم عَمَل کانه بان، وَ اونه ایمان اونه اَعمالِ هَمرَه کامل هَبا. 23 وَ اون تورات به حقیقت بَرِسیِه که گونِه: «ابراهیم خُدا رِه ایمان بیاردِه، وَ این اونه وَسین صالِحی بِشمارِسِّه هَبا،» وَ اون خُدایِ رَفیق دُخوانده هَبا. 24 دینین اَعمالِ هَمرَئه که آدَمی صالِح بِشمارِسِّه بونه، نه فقط ایمان هَمرَه. 25 هَمینجور مَگِه راحاب فایِشِه اَعمالِ هَمرَه صالِح بِشمارِسِّه نَبا، اون موقِه ایی که قاصِدانِ پَناه هَدَه و اوشانه ایتا دیگر رایِه جی روانه هَکُردِه؟ 26 هَمونجور که تن روحِ جی سیفا بَمِردِه، ایمان هم اعمالِ جی سیفا بَمِردِه. |
@ 2024 Korpu Company