نامِه مَسیحینی عبرانی نِژادی سِه 7 - گیله ماز

مِلْکیصِدِق کِهانت

¹ این مِلْکیصِدِق، سالیمِ شهرِ پادشاه و خُدای مُتِعالِ کاهِن با. اون ابراهیم رِه که پادِشاهانِ شِکَست هَدَئنِ جی وَگَردِنِه با رِه، بَدییِه و اونه بَرکَت هَدَه.

² و ابراهیم هر چی که داشتِه یه جی، اونه دَه یِک هَدَه. اون اِسمِ معنی اَوَّل «صالحی یه پادشاه» و ایما «سالیمِ پادشاه»، یَعنی «صُلح و سلامتی یه پادشاه» هیسه.

³ این مِلْکیصِدِق نه اونه پیَر و مآر معلومِ نه اونه شجره نامِه و نه اونه زندگی یه اوّلین روزان و نه آخرین روزان معلومِ، ولی خُدایِ ریکایِ مِثانِ، اون تا اَبد کاهن ماندِنِه.

⁴ بِییشین که اونِ چقدر گَتِه آدم با که ابراهیم، اسرائیلِ قومِ پیَر، غنایمی جی اونه دَه یِک هَدَه!

⁵ و طبقِ موسایهِ شریعت حُکم، لاوی یه وَچِه هان که کاهن بونَن، بایِسّی یهودِ قومِ جی که اوشانه اَداشانَن دَه یِک هَگیرَن، هر چَن اوشان هَم ابراهیمِ نسلِ جییَن.

⁶ وَلی این مِلْکیصِدِق که اوشانه نسلِ جی نَبا، ابراهیمِ جی دَه یِک بِیته، و ابراهیم که وعده های صاحاب با رِه، بَرکَت هَدَه.

⁷ و بی شَک، اونیکه بَرکت دَنهِ اونی که برکت گیرنِه یه جی گَته تَرِه.

⁸ از یه طَرَف، اوشانیکه از بِین شونِن دَه یِک گیرنَن؛ وَلی از یه طَرَف دیگه اونیکه اونه خَبَری شهادت هَدَه هَبا که زِندِئِه دَه یِک گیرنِه.

⁹ حتّی تانیم باگوییم خودِ لاوی هم که دَه یِک گیرنه با، ابراهیمِ طریق دَه یِک هَدَه.

¹⁰ چون اون موقِه که مِلْکیصِدِق ابراهیمِ بِدیِه با، لاوی هَلَه دُنیا نومَه با.

عیسی، مِلْکیصِدِقِ هَمرَه مقایسه بونه

¹¹ اَسِه اَگِه کامِل هَبوسَّن لاوی یه کاهنین رَدِه یه طریق انجام بونِه با، دِ چه احتیاجی با ایتا دیگه کاهِن، مِلْکیصِدِقِ رَدِه یه جی بیه عوضِ اینکه هارونِ رَدِه یه جی هَبو؟ چون لاوی یه کِهانتِ دوره یه دِلهِ، شریعت، یَهودِ قومِ هَدَه هَبا.

¹² چون اَگه کِهانتِ خِدمت عوض هَبو، ناچاراً شریعَتِ قانونَم بایسّی عوض هَبو.

¹³ چون اونیکه این چیزان اونه خَبَری باَگوته هَبا، ایتا دیگه طایفه یه جیه، که اون طایفه یه جی هیچ وخت هیچکس قُربانگاه دِلِه خِدمت نَکُردِه؛

¹⁴ چون معلومِ اَمیِ خُداوند یهودایِ نسلِ جی با و موسی اون طایفه یه جی کِهانتِ خَبَری هیچی نَگوتِه.

¹⁵ این اوجِه آشکارتَر بونه که وختی ایتا دیگه کاهن مِلْکیصِدِقِ مِثانِ بیِه،

¹⁶ اون نه شریعتِ اون حُکمِ جی که اونه نسلِ ربط دارِه، بلکه اون زندگی یه قُوَّتِ جی که از بِین نَشونِه، کاهن بونه.

¹⁷ چون اونه خَبَری مَزمورِ کِتابِ دِلِه اینجور شهادت هَدَه هَبا که: «تو تا اَبد کاهن هیسی، مِلْکیصِدِقِ رَدِه یه دِلِه.»

¹⁸ چون یه طَرَف جی، اون اَوّلین حُکم رِه، اینِه وَسین که ضعیف و بی فایدِه با، کِنار بَنَن،

¹⁹ چون شریعَت هیچی رِه کامل نَکُردِه. ولی اون طرفِ جی، ایتا بِهترِ اُمیدِ اَمَرِه بِشناساندِه که اونه طریق، خُدا رِه نَزدیک هَبیم.

²⁰ و این بدون قَسَم نَبا! چون اوشانیکه پیشتَر کاهن هَبان، بدونِ اینکه قَسم بُخارِن کاهِن هَبان.

²¹ وَلی اونه کاهِن هَبوسَّن قَسَمِ هَمرَه با، اون موقه که خدا اونه باگوته: «خداوند قَسَم بُخاردِه و اونه نَظر عوض نَبونه: ”تو تا اَبد کاهن هیسی“.»

²² این، عیسی رِه ایتا بِهتَرِ عهد ضامِن کانه.

²³ قدیمی کاهِنان خیلی زیاد بان، چون مرگ نُذارنه با خودِشانِه خِدمتِ اِدامِه هَدَن.

²⁴ ولی عیسی تا اَبد کاهنِ، چون تا اَبد زِندِئِه.

²⁵ پَس عیسی تانه اوشانیکه اونه طریق خُدا رِه نَزدیک بونَن، کامِلاً نِجات هَدِه، چون اون هَمَش زِندِئِه تا اوشانه وَسین شَفاعت هَکونِه.

²⁶ چون راس راسی این بِجا با که اَما اینجور کاهنِ اعظم بِداریم، که مُقدّس، بی گُناه، بی‌عیب، گُناهکارانِ جی سیفا، و جلال بَئیتِه آسِمانان جی جآرتَرِه.

²⁷ او، دیگر کاهنین اعظم مِثان نیاز نِداره که هر روز اَوَّل خودشه گُناهِانِ وَسین و ایما قومِ گِناهانِ وَسین قُربانی هَکونه. چون یِدَفِه همیشه یه وَسین اینه انجام هَدَه، اون موقِه که خودِشِه قُربانی هَکُردِه.

²⁸ چون شریعت، آدمان رِه اوشانه ضعفانِ دِلِه کاهنِ اعظمی یه وَسین تعیین کانه، وَلی اون قَسَمِ کلمه ها که بعدِ شریعَت بوماَ، اون ریکا رِه تعیین هَکُردِه که تا اَبد کامل هَبا.