نامِه مَسیحینی عبرانی نِژادی سِه 3 - گیله ماز

عیسی موسایهِ جی سَرتَرِ

¹ پَس اِی مُقَدَّس اَداشان، اِی شُما که آسِمانی دَعوتِ دِلِه شریکین، شیمی حَواس عیسی یه سَر دَبو، که اون رسول و گَتِه کاهنِ که اونه ایمان داریم و اونه اعتراف کانیم.

² که نِسبت به اونیکه اونه تعیین هَکُردِه وفادار با، هَمونجور که موسی هم خُدایِ تمام سِرِه یه دِلهِ وفادار با.

³ چون عیسی، موسایهِ جی بیشتر جلالِ لایق با - همونجور که، اونیکه سِرِه رِه سازِنِه اون سِرِه یه جی بیشتر حرمت داره.

⁴ چون هر سِرِه ینفرِ دَسِ هَمرَه بِساته بونه، وَلی اونیکه همه چیرِه سازِنِه خُدائه.

⁵ اَسِه موسی ایتا خادِمِ مِثان خُدایِ تمام سِرِه یه دِلهِ وفادار با، تا اون چیزانِ سَر که بایِسّی دُمّالتَر باَگوته هَبو، گَواهی هَدِه.

⁶ وَلی مَسیح، ایتا ریکائی مِثان خُدایِ سِرِه یه سَر وفادارِه، و اَما اونه سِرِه ایم، اگه راس راسی اَمی اطمینان و افتخارِ اَمی اُمیدِ دِلهِ قایِم بِداریم.

⁷ پَس هَمونجور که روح القدس گونِه: «اِمروز، اَگه اونه آوازِ اِشنَوِنید،

⁸ شیمی دِلِ سَنگ نَکُنین، هَمونجور که یاغی گری یه دورانِ دِلهِ هَکُردین آزمونِ روز دِلهِ، صَحرایِ دِلِه.

⁹ اوجِه که شِیمی پیَرِان مَرِه آزمون هَکُردَن، با اینکه چهل سال می کارانِ بِدیِه بان.

¹⁰ اینه وَسین، اون نسلِ سَر غیظ هَکُردَم و باگوتَم: اوشان هَمَش خودِشانِه دِلِ میَن گُمراهَن، و می راهان رِه نِشناسِنَن؛“

¹¹ پَس می غیظ دِلِه قَسَم بُخاردَم اوشان می آسایشِ دِلهِ نییَنِن.»

¹² اَداشان، شیمی حَواس دَبو، نَکُنِه که شِیمی جی کَسی، شَرور و بی ایمانِ دِل بِدارِه که شِمِره زندهِ خُدایِ جی دور هَکونه.

¹³ بلکه هر روز، تا موقِه ایی که هَلَه اونِه «اِمروز» گونَن، هَمدِیگَرِ نصیحت هَکُنید تا شیمی جی کسی گُناه گول بُخاردنِ خاطری، سَنگدِل نَبو.

¹⁴ چون اَما مَسیح دِلِه شریک هَبَیم، اگه راس راسی اطمینانِی که از اَوّل داشتیم رِه تا آخَر قایم بِداریم.

¹⁵ هَمونجور که مَزمورِ کِتابِ دِلهِ باَگوته هَبا: «اِمروز، اَگه اونه آوازِ اِشنَوِنید، شیمی دِلِ سنگ نَکُنین، هَمونجور که یاغی گَری یه دورانِ دِلِه هَکُردین.»

¹⁶ چون اوشانیکه بِشنَوِسَّن و با این وجود یاغی گَری هَکُردَن، کیا بان؟ مَگِه تمام اوشانی نَبان که موسایهِ رانِمائی یه هَمرَه مصر جی دِرگا بومَن؟

¹⁷ و چه کَسایی سَر چهل سال غیظ هَکُردِه؟ مَگِه اوشان نَبان که گُناه هَکُردَن، و اوشانه جِنازِه ها صَحرایِ دِلِه بَکِتِه؟

¹⁸ و چه کَسانِ سَر قَسَم بُخاردِه که اونه آسایشِ دِلِه نییَنِن؟ مَگِه اوشانی نَبان که نا اِطاعتی هَکُردَن؟

¹⁹ پَس دینیم که اوشانه بی ایمانی یه خاطر با که نَتَّنِسَّن دِلِه بییَن.