نامِه مَسیحینی عبرانی نِژادی سِه 2 - گیله ماز

هُشدار، نِجاتِ جی غافل نَبین

¹ پَس اَمیی حواس بایِسّی اونچه که بِشنَوِسّیم رِه بیشتر بُمانه، نَکُنِه که اونه جی مُنحرف هَبیم.

² چون، اوجِه یه جی که اون پیغامی که فِرشتِگانِ طریقِ جی اعلام هَبا، ثابت هَبو که قابِل اطمینانِ، و هر تقصیر و نا اطاعتی به حق جَزا گیرنه با،

³ اگه اَما اینجور گَتِه نجاتِ جی غافِل هَبیم، چِطور اونه جَزایِ جی دَر بیشیم؟ این نِجات اَوَّل خُداوَندِ طریقِ جی اعلام هَبا و ایما اوشانِ طریق که اونِه بِشنَوِسَّن اَمِرِه ثابت هَبا،

⁴ همونجور که خُداهَم جورواجورِ نِشانه ها و عَجیب و غریبِ معجِزات و روح القدسِ عَطایا که طبق خودشه اِرادِه دَنه، اون نِجاتِ گَواهی هَدَه.

⁵ چون خُدا اون دُنیایِی که هَنه و اَما اونه جی گَب زَنیم رِه، فرشتگانِ مُطیع نَکُردِه

⁶ یِجا، مَزمورِ کِتابِ دِلهِ شهادت هَدَه هَبا که: «اِنسان چیِه که اونه فکر دَبی، یا اِنسانِ ریکا، که اونِه اَهمّیت هَدی؟

⁷ تو اونه یه مُدَّت فِرشتِگانِ جی پست تَر هَکُردی، جلال و حُرمتِ تاجِ اونه سَر بَنَیی

⁸ و همه چیرِه اونه لِنگِ جیر اونه مُطیع هَکُردی.» اَسِه که خُدا هَمه چیرِه اونه مُطیع هَکُردِه، هیچ چیزی بِجا نُذاشته که اونه مُطیع نَبو. اَسِه، هَلَه همه چیزهِ اونه مُطیع نَینیم.

⁹ ولی اَما عیسی رِه که یه مُدَّت فرشتگانِ جی پَست تَر با دینیم، وَلی اَسِه جلال و حُرمتِ تاجِ اونه سَر بَنَن چونکه مَرگِ رَنجِ جی بُگذشتِه تا خُدایِ فیضِ طریق همه یه وَسین بَمِردنِ طَعمِ مَزِه هَکونه.

¹⁰ چون این دُرس و بِجا با که خُدا، که هَمِه چیز اونه وَسین و اونه طریقِ جی وِجود دارِه، اینِه وَسین که خیلی ریکاشان رِه جلالِ بَرِسانِه، بایِسّی اوشانه نجاتِ بانی رِه عذابِ راه دِلهِ کامِل هَکونه.

¹¹ چون اونیکه تقدیس کانه و اوشانیکه تقدیس بونَن، هَمِه ایتا پیَرِ جییَن. چون عیسی عار نِداره که اوشان رِه اَداش دُخوانهِ.

¹² هَمونجور که مَزمورِ کِتاب دِلِه گونِه: «تی اِسمِ، می اَداشان اِعلام کانَم؛ و جماعت میَن، تی حمد و ثنا رِه خواندِنَم.»

¹³ و باز هم اِشعیایِ پیغمبرِ کِتابِ دِلهِ گونِه: «مَن اونه تَوکُل کانَم.» و باز هم گونِه: «بِیِیش، مَن و وَچِه هانی که خُدا مَرِه هَدَه.»

¹⁴ پس اوجِه یه جی که وَچِه هان جسم و خونِ جی هیسَن، اون خودِش هَم این چیزانِ دِلهِ شَریک هَبا تا مرگ راه دِلهِ، اونیکه مرگ قدرتِ دارِه، یعنی ابلیسِ نابود هَکونه،

¹⁵ و تمام اوشانیکه مرگ ترسِ خاطری، تمامِ خودِشانِه عُمرِ اَسیری بَکِشییَنِه، آزاد هَکونه.

¹⁶ چون راس راسی اون فِرشتِگانِ کُمک نُکانِه، بلکه اون، ابراهیمِ نسلِ کُمَک کانه.

¹⁷ پس لازم با که اون هر لحاظِ جی خودشه اَداشانِ مِثانِ هَبو تا اینجوری خُدایِ خدمت دِلهِ ایتا بخشنده و وفادارِ کاهنِ اعظم هَبو تا مَردُم گُناهانِ بَخشیدِه هَبوسَّنِ وَسین کَفّارِه هَدِه.

¹⁸ چون خودِ اون، موقِه ایی که آزمون هَبا عذاب بَکِشیِیَه و تانه اوشانیکه آزمون بونَن رِه، کُمَک هَکونه.