نامِه مَسیحینی عبرانی نِژادی سِه 11 - گیله ماز

ایمان هَمرَه

¹ اَسِه ایمان، اون چیزانِ سَر اطمینان هَکُردَنِ که اوشانه اُمید داریم و اون چیزانِ جی خاطر جَم هَبوسَّنِ که چِشِ هَمرَه نَشَئنِه بَدییَن.

² چون ایمان خاطِری با که قَدیمی مَردُمِ بارِه خوبی یه هَمرَه تعریف و تمجید هَکُردَن.

³ اَما ایمان هَمرَه فَهمِنیم که جهان خُدایِ کلامِ هَمرَه خلق هَبا، جوریکه اون چیزان که بِدیِه بونه، اون چیزان که بِدیِه نَبونه یه جی به وجود بوما.

⁴ ایمان هَمرَه با که هابیل قُربانی ایی پیشکش هَکُردِه که قائنِ قربانی یه جی بیشتر قبول هَبا، که اینِه وَسین، اونه بارِه گَواهی هَدَه هَبا که اون صالِحِ. خُدا اونه هدیه هایِ قبول هَکُردَنِ هَمرَه، خوبی یه هَمرَه اونه خَبَری شهادت هَدَه. و هرچَن اون بَمِردِه، ایمان خاطری هَلَه گَب زَنه.

⁵ ایمان هَمرَه با که خَنوخ جآر بَبِردِه هَبا تا مرگِ نَینه، و اون پیدا نَبا چون خُدا اونه بَبِرده، چون پِیش از اونکه جآر بَبِردِه هَبو، اونه خَبَری گَواهی هَدَه هَبا که خُدا اونه جی راضیِه.

⁶ و بدونِ ایمان نَشَئنِه خُدا رِه راضی هَکُردَن، چون هر کی خُدا رِه نَزدیک بونه، بایِسّی ایمان بِدارِه که اون دَرِه، و اوشانیکه اونه دُمّال گَردِنَن، پاداش گیرِنَن.

⁷ ایمان هَمرَه با که نوح، اون موقِه که اون چیزانِ خَبَری که هَلَه هیچکس نَدیه با، خُدایِ طرفِ جی هُشدار بِیته، خُداترسی یه هَمرَه خودشه خانِواده یه نِجاتِ وَسین ایتا کَشتی بِساته. و اینجوری دُنیا رِه مَحکوم هَکُردِه و اون صالِحِی یه وارِث هَبا که ایمان راه جی بِدَس هَنهِ.

⁸ ایمان هَمرَه با که ابراهیم اون موقه که دُخوانده هَبا، اِطاعَت هَکُردِه و راهی هَبا، اون جایی بَشَه که ایما اونه وارث بونِه با؛ و بدونِ اینکه بِدانه کوجهِ شونِه راهی هَبا.

⁹ ایمان هَمرَه با که اون بَشَه تا وعده یه سرزمینِ دِلِه زندگی هَکونه، و ایتا غَریبِه یه مِثان، اِسحاق و یعقوبِ هَمرَه، که اونه هَمرَه این وعده یه دِلِه هَم اِرث بان، خیمِه هایِ دِلِه زندگی هَکُردِه

¹⁰ چون اون شَهرِ چِش بِراه با که بُنوارها دارِه، که اونه مِعمارِ و بَنّا خُدائه.

¹¹ ایمان هَمرَه با که سارا قُوَّت بِیتِه که حامِلِه هَبو با اینکه سِن و سالی اونه جی بُگذشت با، چون اون دانِسِّه، اونیکه وعده هَدَه وفادارِ.

¹² و اینجوری، ایتا مَردَای یه جی، اونَم کسی که ایتا مُرده یه مِثان با، نَسلهایِ به وجود بوماَ، که آسِمانِ سِتارِگانِ مِثان و دَریایِ بی حَد و حسابِ وازیک مِثان بان.

¹³ اوشان هَمِه ایمان دِلِه بَمِردَن، بدونِ اینکه وعده ها رِه هَگیرِن، ولی اوشانه دورِ جی بَدییَن و سلام باگُوتَن. و قبول هَکُردن که زَمینِ سَر، غریب هیسَن.

¹⁴ چون اوشانیکه اینجور گَب زَنَن، نِشان دَنَن که خودِشانِ وَسین ایتا وَطَنِ دُمّال دَرِن.

¹⁵ اَگِه اوشان اون مِلکِ فِکر بان که اونه جی دِرگا بومَن، وَگَرِسَّنِ وَسین فُرصَت داشتِن.

¹⁶ وَلی اینجور که دینیم، اوشان ایتا خُجیرتَرِ مِلکِ دُمّال دَبان، یعنی ایتا آسِمانی مملکت. اینه وَسین، خُدا عار نِداره که اوشانه خُدا دُخوانده هَبو، چون ایتا شَهر اوشانِه وَسین آماده هَکُردِه.

¹⁷ ایمان هَمرَه با که ابراهیم اون موقِه که آزموده هَبا، اسحاقِ پیشکِش هَکُردِه؛ و اونیکه وعده‌ها رِه بِیته با قبول هَکُردِه که خودشه یِدانه ریکا رِه قُربانی هَکونه،

¹⁸ هَمونی که اونه باَگوته هَبا با: «تی نسل اسحاقِ جی دُخوانده بونه.»

¹⁹ ابراهیم اینجور فِکر کانِبا که خُدا تانِه اِسحاقِ مُردِگانِ جی زندهِ هَکونه، و شَئنِه باگوتَن که ابراهیم اینجوری اسحاقِ مرگ جی پَس هِیتِه.

²⁰ ایمان هَمرَه با که اِسحاق، یعقوب و عیسو رِه آینده یه چیزانِ جی بَرکَت هَدَه.

²¹ ایمان هَمرَه با که یعقوب اون موقِه که دَبا بَمیره، یوسفِ هر کُدام از ریکاشان رِه برکت هَدَه. و همونجور که خودشه عصا رِه تَکیِه هَدَه با، سِجدِه هَکُردِه و پَرَسِّش هَکُردِه.

²² ایمان هَمرَه با که یوسِف اون موقِه که دَبا بَمیره، بنی اسرائیلِ رَفتنِ جی، مِصرِ جی خَبر هَدَه و خودشه خاشِشانِ خَبَری وَصیت هَکُردِه.

²³ ایمان هَمرَه با که اون موقِه که موسی دُنیا بوماَ، اونه پیر و مآر اونه سِه ماه قایِم هَکوردَن، اینِه وَسین که بَدییَن اون خُجیرِ وَچِئِه؛ و پادشاهِ حُکمِ جی نَتِرسییَن.

²⁴ ایمان هَمرَه با که وَختی موسی گَت هَبا، نَخَسِّه که فرعونِ کیجایِ ریکا دُخوانِسِّه هَبو.

²⁵ اون حاضر هَبا که خُدایِ قومِ هَمرَه آزار بِینِه، تا اینکه ایتا مُدَّت گُناه خُشیانِ جی کِیف هَکونه.

²⁶ و اون سرکوفت که مَسیح خاطِری با رِه، ایتا گَنج، مِصرِ گَنجایِ جی گَته تَر بِشمارِسِّه، چون او اون پاداش دُمّال دَبا.

²⁷ ایمان هَمرَه با که موسی مِصرِ جی دِرگا بوما، و پادشاهی غیظ جی نَتِرسیِه، اون طاقت بیاردِه چون اونیکه نَشَئنِه بَدییَن رِه، دینه با.

²⁸ ایمان هَمرَه با که موسی پِسَخ و خونِ بَپاشیَنِ بِجا بیاردِه تا اون فِرشته که اوَّلین وچه شان رِه هلاک کانِبا، اِسراییلِ اوّلین وَچِه هان سَر دَس نُزاره.

²⁹ ایمان هَمرَه با که اسرائیلِ قوم سُرخِ دریایِ میَن ایتا خُشکِ زمینِ مِثانِ رَد هَبان؛ وَلی وختی مِصریِان تقلّا هَکُردَن که هَمین کارِ هَکُنَن، اُویه دِلهِ غَرق هَبان.

³⁰ ایمان هَمرَه با که اَریحایِ شهرِ دیفارِشان بَعد اینکه اسرائیلِ قوم هَفت روز اونه دور بَگِرِسَّن، فور بوماَ.

³¹ ایمان هَمرَه با که فاحشه راحاب، اوشانه هَمرَه که نافرمان بان بَکوشت نَبا، چون اون جاسوسان رِه گرمی یه هَمرَه قبول هَکُردِه.

³² دِ چی باگوُم؟ چون دِ وخت دَنیِه جِدعون و باراق و شَمشون و یَفتاح و داوود و سموئیل و پیغمبرانِ خَبَری گَب بَزِنَم،

³³ که ایمان هَمرَه، مَملکتان رِه فتح هَکُردَن، عِدالَتِ برقرار هَکُردَن، وَ وعده‌ها رِه بِدس بیاردِن؛ شیرِانِ دَهنِ دَبِسَّن،

³⁴ تَشِ اَلو رِه دَکوشانیَنِ، و شَمشیر دَم جی جان دَربَبِردَن؛ اوشان ضعفِشان، قُوَّت هَبا، جنگِ دِلهِ رَسدار هَبان، و اَجنَبی یه لَشکَرِشانِ تار‌و‌مار هَکُردَن.

³⁵ زِناکان، خودِشانِه مُردِگانِ زندهِ پیداهَکُردَن. بعضیان عذاب بَکِشیَن و آزادی رِه قَبول نَکُردِن، تا یِدَفِه دیگه ایتا خُجیرِ زندگی یه وَسین زندهِ هَبون.

³⁶ بَعضیان مسخرِه هَبان و شَلاق بُخاردَن، و حتّی زَنجیلِ هَمرَه دَبِسِّه هَبان و زِندان دَکِتَن.

³⁷ اوشان سنگسار هَبان، اَرِّه یه هَمرَه دُتا تیکه هَبان و شَمشیر هَمرَه بَکوشت هَبان. گوسِند و بُزِ پوسِ دَکُردِه بان، فقیر و مُصیبت بَکِشیِه و ذلیل و آوارِه هَبان.

³⁸ اوشان که دُنیا اوشانه لیاقَتِ نِداشتَه، صَحراها و کوهها و غارها و زَمینِ چاکِ دِلِه، آوارِه هَبان.

³⁹ تمام اوشان، با اینکه خداوند ایمان خاطِری با که اوشانه خَبَری خُجیرِ شهادَت ها هَدَه هَبا، با این حال هیچکُدام از وَعده هایی که اوشانه هَدَه هَبابا رِه بِدس نیاردِنِ.

⁴⁰ چون خُدا ایتا بِهترِ چی اَمَرِه حاضِر هَکُردهِ با، تا بدونِ اَما اوشان کامِل نَبوُن.