غَلاطیان 6 - گیله ماز

هَمِرِه خوبی هَکُردَن

¹ اِی اَداشان، اَگه یِنَفر ایتا خَطایی هَکُنِه شُما که خُدایِ روحِ دارین، بایسّی مُلایمِ روحِ همره اونه راسِ راهِ سَمت وَگِردانین. با این وِجود، تی حَواس تِرِه هَبو که وَسوَسه یه دِلِه دَنِکی.

² هَمدیگَرِ بارِشان رِه دوش بَکِشین که اینجوری مَسیح شَریعَتِ بجا هارنین.

³ چون اَگه یِنَفر خودِشِه یِچّی حساب هَکُنِه که نییِه، خودِشه گول زَنِه.

⁴ ولی هر کی بایسّی خودِشِه کارِ آزمون هَکُنِه. اون موقِه اونه فخر هَکُردنِ دلیل خودِشه وَسین هیسِه نه همسادِه یه وَسین.

⁵ چون هر کی بایِسّی، خودشه بارِ بَبِرِه.

⁶ اونیکه خُدایِ کَلامِ جی تعلیم گیرنِه، بایسّی تمامِ خُجیرِ چیزان رِه اونه همره که اونه تعلیم دَنِه شَریک هَبو.

⁷ گول نُخارین: نَشَئنِه خُدا رِه مسخرِه هَکُردن، چون آدَمی هَر چی بِکارِه، هَمونِه دِرُو کانه.

⁸ چون هر کی که خودِشِه جسمِ وَسین کارنِه، خودِشِه جسمِ جی هَم فساد دِرُو کانه؛ وَلی هر کی که خُدایِ روحِ وَسین کارنِه، اَبدی زندگی رِه خُدایِ روحِ جی دِرُو کانه.

⁹ پس خوبی هَکوردَنِ جی دِلسرد نَبیم، چون اگه کارِ جی دَس نَکِشیم، خُجیرِ فصلِ موقِه دِرُو کانیم.

¹⁰ پَس تا فُرصت داریم تمام مَردُمِ خوبی هَکُنیم، بِخصوص اوشانیکه مسیح رِه ایمان دارِن.

آخرین هُشدارها

¹¹ بِیشین، می دَسِّ هَمره، چطور گَتِ حروفِ همرَه شِمِرِه نِویسِنَم!

¹² اوشانیکه خَنِن به ظاهِر خودِشان رِه خوب نِشان هَدِن، شِمِرِه مجبور کانَن که خَتنِه هَبین، فقط اینه وَسین که مَسیحِ صَلیبِ خاطری عذاب نَکِشَن.

¹³ چون اوشانیکه خَتنِه بونِن حتّی خودِشان هم شریعَتِ بِجا نیارنِن، بَلکه خَنِن شُما خَتنِه هَبین تا شیمی جسمِ دِلِه افتخار هَکُنَن.

¹⁴ وَلی نَکُنِه که مَن هیچ وَخت یِچّی رِه بِجِز اَمی خُداوند عیسی مَسیحِ صَلیبِ فَخر هَکُنَم، که اونِ طریق، دُنیا می وَسین مَصلوب هَبا و مَن دُنیایِ وَسین.

¹⁵ چون نه خَتنِه هَبوسَّن چیزیِه و نه خَتنِه نَبوسَّن؛ اونچه مُهِمّه تازه خلقت هیسه.

¹⁶ و تمام اوشانیکه این قانونِ همره رفتار کانَن، صُلح و سلامتی و رَحمَت اوشانِ رَه، و اسرائیلِ خُدا رِه هَبو.

¹⁷ مین بعد دِ کَسی مَرِه عذاب نَدِه، چون داغایی می تَنِ دِلِه دارِم که نِشان دَنِه مَن عیسی پاکارَم.

¹⁸ اِی اَداشان، اَمی خُداوند عیسی مَسیح فِیض شِیمی روحِ هَمرَه دَبو! آمین!