غَلاطیان 2 - گیله ماز

دیگر رَسولان پولُسِ قبول کانَن

¹ بعدِ چهارده سال، یِدَفِه دیگه برنابایِ هَمرَه بَشَم اورشَلیم و تیتوس رِه هَم می هَمرَه بَبِردَم.

² مَن ایتا مُکاشفه یه خاطری با که بَشَم. و اِنجیلی که غیرِ یَهودیِانِ دِلِه موعِظِه کانم رِه اوشانِ وَسین توضیح هَدَم. البتِه خَلوتِ دِلِه، وَ فقط اوشانی که می نظر با نفوذ بان رِه باگوتَم، چون نِگران بام که نَکُنِه بیخدی دُو هَکُردِه بوم.

³ وَلی حتّی تیتوس که می هَمره دَبا، با اینکه یونانی با، اونه مَجبور نَکُردِن که خَتنِه هَبو.

⁴ این نِگَرانی اون دِروئی اَداشانِ خاطری با که زیر زیرکی اَمی جمِ دِلِه بوماَبان، تا اون آزادی که مسیحْ عیسی یه دِلِه داریم رِه جاسوسی هَکُنَن و اَمَرِه به بردگی بَبِرَن.

⁵ ولی اَما یه لَحظِه هم اوشانه تَسلیم نَبَیم تا اِنجیل حَقیقت، شِمِرِه کامِلاً مَحفوظ بُمانه.

⁶ وَلی اوشانیکه به نظر بانفوذ هَنِن- هر کی خَنِه هَبو مَرِه فَرقی نُکانِه، چونکه خُدا بیخدی هیچکسِ جی طرفداری نُکانِه- اوشان هیچی مَرِه اِضافِه نَکُردِن،

⁷ بلکه بر عکس، اوشان بِفَهمِسَّن که اِنجیلِ خَبَرِ خوشِ اعلام هَکُردن غیر یَهودیِانِ وَسین، مَرِه بِسپارِسِّه هَبا، هَمونجور که اِنجیلِ خَبَرِ خوشِ اعلام هَکُردن یَهودیانِ وَسین پِطرسِ بِسپارِسِّه هَبا.

⁸ چون اونیکه پِطرسِ طریقِ جی کار هَکُردِه که غیرِ یهودیانِ رسول هَبو، می دِلِه هم کار هَکُردِه تا غیرِ یَهودیانِ رسول هَبوم.

⁹ وختی که یعقوب و کیفا و یوحنا که به کلیسایِ ستون معروف بان، اون فیضی که می نَصیب هَبا با رِه بَدییَن، مَن و بَرنابای هَمره دَسِ رِفاقت هَدَن تا اَما غیرِ یَهودیانِ وَر بیشیم و اوشان یَهودیانِ وَر بوشون.

¹⁰ اوِشان فقط اَمی جی بِخَسَّن که فقیران فِکر دَبیم، همون کاری که خودِ مَن هم اونه مُشتاق بام.

پولُس مخالِفَت، پِطرُسِ هَمرَه

¹¹ وَلی وختی که کیفا به اَنطاکیه بوماَ، رو دَر رو اونه هَمرَه مخالِفت هَکُردَم، چون واقعاً مُقصِر با.

¹² چون پیش اَز اونکه اوشانیکه یَعقوب، راهی هَکُرده با بییَن، غیرِ یَهودیانِ هَمره همسُفرِه بونه با، وَلی وختی اوشان بومَن، یَهودیان ترسِ جی خودِش رِه، کِنار بَکِشییَه و سیفا هَکُردِه.

¹³ دیگر یهودیِانَم این دُرویی یه دِلهِ اونه هَمرَه هَمدَس هَبان، جوریکه حتّی بَرنابا هم اوشانه دُرویی یه خاطِری از راه به دَر هَبا.

¹⁴ وَلی همونجور که مَن بَدییَم اوشان اِنجیلِ حقیقتِ راسّی یه دِلِه قدم نَگیرنَن، هَمِه یه پیش کیفا رِه باگوتَم: «اَگه تو، که یهودی هیسی، ایتا غیرِ یهودیانِ مِثان زندگی کانی نه یهودیانِ مِثان، چطوریه که غیرِ یَهودیانِ مَجبور کانی که یَهودیِانِ رَسم و رُسومِ جی پیروی هَکُنَن؟»

¹⁵ اَما که یَهودی زادِه ایم و ’گُناهکار غیرِ یهودی‘ نییَیم،

¹⁶ اَما دانیم که هیچکس شَریعَتِ اعمالِ هَمره، صالح بِشمارسِّه نَبونه، بَلکه عیسی مسیحِ ایمانِ طریق جی صالح بِشمارسِّه بونِه. پس اَما هم مسیحْ عیسی رِه ایمان بیاردیم تا مسیحِ ایمانِ هَمره صالح بِشمارِسِّه هَبیم، و نه شریعتِ اعمالِ هَمره، چون هیچ آدمی شریعَتِ اعمالِ هَمره صالح بِشمارِسِّه نَبونه.

¹⁷ وَلی اَگه اینه دُمّال دَریم که مسیحِ دِلِه صالح بِشمارِسِّه هَبیم، مَعلوم هَبو که گُناهکاریم، یعنی مسیح، گُناهِ پاکارِ؟ اَصلاً!

¹⁸ چون اَگه اونچه که خودَم فور بیاردَم رِه باز هم بِسازَم، نِشان دَنَم که خطاکارم،

¹⁹ چون مَن شریعتِ طریق نسبت به شریعَت بَمِردَم تا خدایِ وَسین زندگی هَکُنَم

²⁰ مَن مَسیحِ هَمره صَلیبِ سَر مصلوب هَبام، وَ دِ مَن نییَم که زندگی کانَم، بَلکه مسیحِ که می دِلِه زندگی کانه؛ وَ این زندگی که اَلآن جسمِ دِلِه دَرَم هَکونَم، خُدایِ ریکایِ ایمانِ همرَئه که مَرِه دوس داشتِه و خودِشِه جانِ می خاطری هَدَه.

²¹ من خُدایِ فِیض باطل نُکانَم، چون اگه صالحی، شَریعَتِ راهِ جی بِدس هَنِه با، پس مَسیح بیخُدی بَمِردِه.