اِفِسُسیان 5 - گیله ماز

محبت دِلِه رفتار هَکونید

¹ پَس ایتا عزیز وَچِهانِ مِثان، خُدایِ جی سَرمَخش هَگیرین.

² وَ محبَتِ هَمرَه رَفتار هَکُنید، هَمونجور که مَسیح هم اَمَرِه محبت هَکُردِه و خودِشِ جانِ اَمی وَسین ایتا قربانی و خوش عَطرِ هَدیِه یه مثان خُدا رِه پیشکِش هَکُردِه.

³ نَکُنِه شِیمی میَن بی‌عفتی یا هر جور ناپاکی یا هوا و هوَسِ جی حتی گَب میَن بیه، چون ایشان مُقَدَسینِ لایِق نیِه.

⁴ بَدِ گَب و بیخُدی گَب و رکیکِ گَب شیمی میَن دَنِبو که شیمی لایق نیِه، بایِسّی اونِ عوض شُکر هَکُنین.

⁵ چون مُطمئن هَبین که هیچ بی حیا یا ناپاک یا طمعکارِ آدم که هَمون بُت پَرَس بونه، خُدا و مسیحِ پادشاهی یه دِلِه سَهمی نِداره.

⁶ نُزارید هیچکی شِمِرِه مُفتِ گَبِ هَمرَه گول بَزِنِه، چون این چیزانِ خاطری یه که خُدایِ غیظ اوشانِ سَر که نافرمانی کانَن هَنِه

⁷ پَس اوشانه هَمرَه شریک نَبین.

⁸ شُما یه وَختی ظُلَمات بِین، وَلی اَسِه خداوندِ دِلهِ نورِین. پَس نورِ وَچِهانِ مِثان رَفتار هَکُنید.

⁹ چون نورِ ثَمَره، هر جور خوبیه دِلِه، صالحی و راسّی هیسِه.

¹⁰ تَقَلّا هَکُنید تا بِفَهمین که چی خُداوند رِه راضی کانه.

¹¹ ظُلَماتِ بی فایده کارانِ دِلِه شَریک نَبین، بَلکه اوشانِه بَرمَلا هَکُنین.

¹² چون حتّی زبان بیاردنِ اونچه که اوشان خلوتِ دِلِه کانَن، شَرم آوَرِه.

¹³ وَلی وختی که هر چی نورِ همره بَرمَلا هَبو، آشکار بونِه.

¹⁴ چون هَر چی که آشکار بونه نورِ. اینه وَسین باگُوته هَبا که: «اِی تویی که خوابِ دِلهِ دَری، بیدار هَبو، مُردِگانِ جی زنده هَبو، که مَسیح خودِشِ نورِ تی سر تابِاندِنه.»

¹⁵ پَس، خِیلی مواظب هَبین که چِطور رفتار کانید، شیمِی رفتار عاقِلِ آدمانِ مِثان هَبو نه نادانِ آدَمانِ مِثان.

¹⁶ شیمی وختِ قَدرِ بِدانید، چون این روزان، بَد روزائِیه.

¹⁷ پَس نادان نَبین، بلکه بِفَهمین که خُداوندِ اراده چیِه.

¹⁸ وشرابِ جی مَس نَبین، که شِمِرِه بَدِ کارانِ سَمت کِشاندِنِه؛ بلکه خُدایِ روحِ جی پُر هَبین.

¹⁹ مزامیر و سرودها و روحانی آوازهایِ همره همدیگَرِ هَمره گَب بَزِنین و تمام دِلِ جی خُداوندِ وَسین بُخوانید و آهنگ بِسازین.

²⁰ هَمَش خُدای پیَر رِه، اَمیی خُداوند عیسی مَسیح اِسمِ هَمرَه هَمِه چی یه وَسین شُکر هَکُنید.

²¹ مَسیح حُرمَتِ خاطِری، هَمدِیگَرِ جی اطاعت هَکُنید.

²² اِی زِناکان، شیمی مَرداکانِ جی اطاعت هَکُنید، هَمونجور که خُداوندِ جی اطاعت کانید.

²³ چون مَرد، خودِشِ زِنایِ سَرِه، هَمونجور که مَسیح هَم خودِشه تَن، یعنی کلیسایِ سَر وَ اونه نِجات دَهَندِئِه.

²⁴ پَس هَمونجور که کلیسا مَسیح جی اطاعت کانه، زِناکان هَم بایسّی هر کارِ دِلهِ خودِشانِه مَردِکانِ جی اطاعت هَکونَن.

²⁵ اِی مرداکان، شیمی زِناکان دوس بِدارید، هَمونجور که مَسیح هَم کلیسا رِه دوس داشته و خودشه جان اونه وَسین هَدَه،

²⁶ تا اونه خُدایِ کَلامِ اُویه هَمره بَشورِه و اینجوری کلیسا رِه تَقدیس هَکُنِه.

²⁷ و کلیسا رِه اون شکوهِ همره که داره خودِشِ وَرجه بیارِه، بدون هیچ لک و چین و چروک یا هر چیزِ دیگه، تا کلیسا مُقدّس و بی عیب هَبو

²⁸ اینِه وَسین، مَرداکان بایسّی خودِشانِه زِناکانِ ایتا خودِشانِه تَنِ مِثان دوس بِدارَن. اونیکه خودشه زِنا رِه دوس داره، خودِشِه دوس داره.

²⁹ چون هیچکی هیچ وَخت خودشه تَنِ جی بیزار نیِه، بلکه اونِه غذا دَنه و اونِه جی مُواظِبَت کانه، هَمونجور که مَسیح هم کِلیسایِ جی مُواظِبَت کانه.

³⁰ چون اَما اونه تَنِ اَعضائیم.

³¹ «اینه وَسین مَرد، خودشه پیر و مآرِه جی سیفا بونه، خودشه زِنا رِه چَسبِنِه، و اون دُتا یِه تَن بونَن.»

³² این راز، ایتا گَتِ رازِ- وَلی مَن کلیسا و مَسیح بارِه گَب زَنَم.

³³ خُلاصِه اینکه، شیمی جی هَر کُدام بایسّی خودشه زِنا رِه ایتا خودشه مِثان دوس بِدارِه، وَ زِنا بایسّی خودشه شو رِه حُرمَت بَنه.