اِفِسُسیان 4 - گیله ماز

مَسیح تَنِ دِلهِ ایتا هَبوسَّن

¹ پَس مَن که خُداوَندِ خاطِری زندانِ دِلِه دَرِم، شیمی جی خواهِش کانَم که شیمی رَفتار، اون دعوتی که شُما اونه وَسین دُخواندِه هَبِینِ لایق هَبو

² تمام فروتَنی و ملایمتِ همره؛ وَ صبر و مُحبتِ دِلِه هَمدِیگرِ تحمل هَکُنید.

³ تقَّلا هَکُنید تا اون ایتا هَبوسَّن که خُدایِ روحِ جییِه، صلح و سلامتی یه دِلِه بِدارین.

⁴ همونجور که ایتا تَن و ایتا روح دَرِه، خُدا هم اون موقِه که شِمِرِه دُخوانِسِّه ایتا اُمید شِمِرِه هَدَه؛

⁵ ایتا خداوند، ایتا ایمان، ایتا تَعمید؛

⁶ وَ ایتا خُدا و هَمِه پیَر که همه یه جی بالاترِ وهَمِه دِلِه کار کانه وهَمِه دِلهِ دَرِه.

⁷ وَلی هر کُدام اَز اَمَرِه مَسیح بَخشِشِ قَدَر، فیض هَدَه هَبا.

⁸ اینِه وَسین گونِه: «وختی که عرش بَرینِ سَمت جآر بَشَه، اَسیرِان رِه، اَسیری بَبِرده وَ مرُم رِه هَدیه ها هَدَه.»

⁹ این گَبِ معنی که ’اون جآر بَشَه‘ چیِه، بِجُز اینکه زمینِ پَست تَرین جاها رِه هَم جیر بوماَ؟

¹⁰ اونیکه جیر بوماَ، هَمونیه که تمام آسِمانانِ جی جآرتَر بَشَه، تا هَمِه چیرِه خودِشِه حُضورِ همرهَ پُر هَکُنِه.

¹¹ وَ اون با که بعضیان رِه عنوان رَسول بِبَخشییَه، بعضیان رِه پیغمبران، مُباشِران، گالِشان وبعضیان رِه عنوان مُعلِمانِ هَدَه

¹² تا مُقَدَسین رِه خِدمَتِ کارِ وَسین آمادِه هَکُنَن، مَسیح تَنِ بَنایِ وَسین،

¹³ تا وَختی که اَما هَمِه اَمی ایمان ایتا هَبو و اَمی همه یه شِناخت خُدایِ ریکایِ جی ایتا هَبو تا اینجوری ایتا کامِلِ آدمِ قَد گَتِ هَبیم، تا مسیحِ قامتِ پُری یه قَدَر بَرسیم.

¹⁴ ایما دِ ایتا کوچِ وَچِه یه مِثان نییَیم تا موجِشانِ هَمرَه هر طرف توُواده هَبیم و جور واجور تَعالیم و آدَمان دوز و کَلَک وَ اون نَقشِه های دِلِه که گمراهی یه وَسین کَشِنَن، اَمَرِهِ این سَمت و اون سَمت بَبِرِه.

¹⁵ بَلکه حقیقتِ باگوتَنِ همره مُحبتِ دِلِه، هر لَحاظِ جی اونه قَدَر که سَرِ، یَعنی مَسیح، رشد کانیم.

¹⁶ اونه جییِه که تمام بَدَن به وسیله هر مَفصلی که اوشانِ وَسین آماده هَبا، به هم چِفت و بَس بونَن وقتیکه هر عضوی دُرس عَمل هَکونِه، باعث بونه بَدَن رشد هَکونه تا خودِش رِه مِحبتِ دِلِه بَنا هَکونِه.

تازه زندگی

¹⁷ اَسه اینِه گونَم و باز هم خُداوَندِ دِلِه گونَم که دِ شیمی رفتار نباید اون مَردم مثان که خُدا رِه نِشناسِنَن هَبو که خودِشانِ بیخُدی فِکرانِ دِلِه رفتار کانَن.

¹⁸ اوشانه عقل تاریک هَبا، وَ نادانی یه خاطِری که اوشانه سَنگ دِلی یه نَتیجِئِه، خُدایِ زندگی یه جی دور هَبان.

¹⁹ اوشان سنگدِل هَبان و خودِشان رِه هرزگی یه دِلِه وِل هَکوردَن، جوریکه طمعِ هَمره هر ناپاکی رِه دَس بَزَن.

²⁰ وَلی شُما مَسیحِ اینجوری یاد نِیتین،

²¹ البَتَر که شُما اونه بارِه بِشنَوِسّین و طِبق اون حَقیقَتی که عیسی دِلِه دَرِه، تعلیم بِیتین.

²² شما یاد بِیتین تا شیمی قَدیمی زندگی یه روش یعنی اون قَدیمی آدَم که گول زَنَکِ خواسِه هایِ طریقِ جی فاسد با رِه، شیمی تَنِ جی دِرگا بیارین.

²³ و روحِ دِلِه شیمی فکر تازه هَبو

²⁴ وَ تازِه آدَمی رِه شیمی تَن دَکُنین، که صالحی و حَقیقی قُدّوسیَتِ دِلِه، خُدایِ مثان هَبو.

²⁵ پَس، دُرو نَزِنین، و هر کدام شیمی هَمسادِه یه همره راسی یه همره گَب بَزِنِه، چون اَما هَمِه، هَمدیگرِ همره ایتا اعضائیم.

²⁶ «عصبانی هَبین، وَلی گُناه نَکُنین» و نُزارید شیمی روز غیظِ دِلِه تَمام هَبو،

²⁷ وَ ابلیسِ فُرصت نَدین.

²⁸ دُزد دِ دُزّی نُکُنِه، بلکه کارِ سَر بوشو، وَ خودِشِه دَسِّ هَمره صداقتِ همره کار هَکونِه، تا بِتَّنِه محتاجانَم رِه هَم یِچّی هَدِه.

²⁹ شیمی دَهَن بَدِ گَبِ وَسین وا نَبو، بَلکه تمام شیمی گَب بَقیِه یه بَنای وَسین کار هَکونِه و احتیاجی رِه بَرآوَردِه هَکُنِه، و اوشانیکه اِشنَوِنَن رِه فِیض بَرِسانِه.

³⁰ خُدایِ قدّوسِ روح رِه که اونه هَمرَه آزادی یه روز وَسین مُهر هَبَین، نارحت نَکُنین.

³¹ هَر جور زَرخی، خشم، غیظ، داد و بیداد، تهمت و هر جور بَدخواهی رِه شیمی جی دور هَکُنید.

³² هَمدِیگَرِ هَمرَه مِهرَبان و دِلسوز هَبین و هَمونجور که خُدا شِمِره مَسیح دِلهِ بِبَخشیِه، شُما هَم هَمدِیگَرِ بِبَخشین.