اِفِسُسیان 3 - گیله مازانجیل راز آشکار بونه 1 اینِه وَسین مَن، پولُس، که شُما غیر یَهودیانِ خاطِری مسیحْ عیسی زِندانییَم - 2 بی شک شُما این جریانِ بارِه که خُدای فیضِ نظارت شیمی خدمتِ وَسین مَرِه هَده هَبا بِشنَوِسّین، 3 می مَنظور رازی یِه که مُکاشِفِه یه راهِ جی مَرِه معلوم هَبا، هَمونجور که تا اَلآن اونه خلاصه رِه شِمِرِه بَنویشتَم، 4 وَ اونه بُخوانِسَّن هَمرَه، تانید پِی بَبِرین که مَن چطور مَسیحِ رازِ بِفَهمِسَّم 5 اون رازی که قدیمی نسلهایِ دِلِه آدَمانِ ریکاشانِ وَسین آشکار نَبا با، اونجور که اَلآن روح القدسِ طریقِ جی، اونه مُقَدَّسِ رَسولان و پیغمبرانِ وَسین آشکار هَبا. 6 اون راز اینِه که غیرِ یهودیانَم مسیحْ عیسی یه دِلِه اِنجیلِ طریق هم اِرثن، و همون تَنِ اعضائِن و خَدایِ وعده یه دِلِه شَریکِن. 7 مَن طبقِ خُدایِ فیض هَدیِه این اِنجیلِ خادم هَبام، که اونه قدرتِ اعمالِ طریق مَرِه هَدهَ هَبا. 8 هَرچَن که مَن تمام مُقَدَّسینِ میَن همه یه جی کمتَرم، این فیض مَرِه هَدهَ هَبا تا مَسیحِ بی حد و حسابِ گنجها رِه غیرِ یهودیانِ وَسین اعلام هَکُنَم، 9 وَهمه یه وَسین ایتا راز رِه روشَن هَکُنَم که قدیم جی خُدایِ وَر که هَمِه چیرِه خَلق هَکُردِه، جا هَدَه بِداشته هَبا با. 10 تا اَسِه کلیسای طریقِ جی خُدایِ جور واجور حکمت، ریاستها و آسِمانِ جایهایِ قدرتهایِ دِلِه آشکارهَبو، 11 این همون هدفی با که خُدا از اَزل داشتِه، که خُدا اونِه اَمی خُداوند مسیحْ عیسی یه دِلِه انجام هَده. 12 اَما مسیحِ دِلِه و اون ایمانی که اونه داریم هَمرَه، تانیم جُرأت و اطمینانِ هَمره خُدا رِه نَزیک هَبیم. 13 پَس شیمی جی خواهش کانَم اون رنجهایِ خاطری که دَرَم شیمی خاطِری کَشِنَم، دِلسرد نَبین، چون اوشان شیمی افتخارِ باعثِ. دُعا، روحانی قوَّت وَسین 14 اینِه وَسین من، آسمانی پیَرهِ پیش زانو زَنَم 15 که هر خانواده آسِمانِ دِلهِ و زَمینِ سَر، اونه جی اسم گیرنَن، 16 و دُعا کانم که طبقِ خودِشِه جَلال دولتمندی شِمِرِه هَدِه، تا شیمی باطِنِ دِلهِ اونه روحِ کمک هَمرَه قَوی و رَسدار هَبین، 17 تا مَسیح، ایمانِ طریقِ جی شیمی دِلِ میَن بُمانِه، وَ مُحبتِ دِلِه ریشِه دَبِدین، پابرجا بُمانید، 18 تا قوّت بدارین که تمام مُقَدَّسینِ هَمره، مَسیحِ مُحبتِ دِرازا و پَهنا و جَلی و بُلَندی رِه بِفهمین 19 وَ مسیحِ محبت که بَشرِ معرفتِ جی بالاتر هیسِه رِه بِشناسین - تا خُدایِ کاملِ پُری یه جی سَرمشت هَبین. 20 جلال هَبو اون خُدا رِه که تانه اون قُوَّتِ طریق که اَمی دِلِه کار کانه، خِیلی بیشتر اَز اونچه که اَما گَمان هَکُنیم یا بِخوایم، کار هَکُنِه. 21 کلیسایِ دِلِه و مسیحْ عیسی یه دِلِه، تمام نَسلهایِ دِلِه، تا اَبد خُدا رِه جَلال هَبو! آمین. |
@ 2024 Korpu Company