اِفِسُسیان 2 - گیله ماز

فیضِ هَمرَه ایمانِ طَریق

¹ وَلی شُما شیمی خطاها و گُناهانِ دِلِه بَمِرده بِین،

² وَ یه وختی اوشانِ دِلِه زندگی کانه بِین، اون موقِه که این دُنیایِ راهای دِلِه، و هوای رئیسِ قُدرَت، یعنی اِبلیسِ جی اطاعت کانه بِین، اون روحِ جی که اَلآنم نافرمانِ وَچِهانِ دِلِه کار کاِنه.

³ تمام اَما هَم یه وَختی اوشانِ میَن اَمی جسمِ هوا و هوسِ دِلِه زندگی کانِه بِیم، و اَمی جسمِ خواسّه‌ها و فِکران رِه بِجا هارنِه بِیم؛ و اَما هَم بَقیِه آدمانِ مِثان، طبقِ اَمی ذات خُدایِ غضبِ مَحکوم بِیم.

⁴ وَلی خُدایِ رحم که بی حد و حسابِ، خودِشِه گَتِ مُحبتِ خاطِری اَمَرِه دوس داشتِه،

⁵ حتّی وَختی که اَمی خَطاهای دِلهِ بَمِرده بِیم، اَمَرِه مَسیح هَمرَه زندهِ هَکُردِه - شما، فیضِ راهِ جی نِجات بِیتین؛

⁶ وَ خدا اَمَرِه مَسیح هَمرَه زندهِ هَکُردِه و آسِمانِ جاهایِ دِلِه عیسی مسیحِ هَمرَه بِنیشاندِه،

⁷ تا اون زمانهای دِلِه که خَنِه بییِه، خودشه بی حد و حساب فیضِ، خودِشِ مِهرَبانی یه طریق نسبت به اَما، مسیحْ عیسی یه دِلِه نِشان هَدِه،

⁸ چون فیضِ همره و ایمانِ راهِ جی نِجات بِیتین. وَ این شیمی جی نیِه؛ بَلکه خدایِ هَدیِه هیسه،

⁹ و این اَمی اَعمالِ جی نییِه، تا هیچکَس نَتَّنِه خودِش رِه فخر هَکونِه.

¹⁰ چون خُدای دَس اَمَرِه بِساتِه، وَ مسیحْ عیسی دِلِه خَلق هَبَیم تا خَجیرِ کاران هَکُنیم، اون کارایی که خُدا پیشتر آمادِه هَکُردِه تا اوشانِ دِلِه قَدم بَنیم.

مَسیح دِلِه ایتا هَبوسَّن

¹¹ پس شما که غیر یهودی به دُنیا بومَین، و اوشان که خودِشان رِه خَتنِه هَبوسِّه دُخواندِنِن وشِمِرِه خَتنِه نَبوسِّه دانَن- اَسه اونکه اوشانِ خَتنِه کاری جسمانیِه که آدَمی یه دَسِ هَمرَه اَنجام هَبا-

¹² و شیمی یاد بِدارین موقِه ایی که مَسیح جی سیفا، اسرائیلِ تابِعیَت جی مَحروم و عَهدهایِ هَمرَه که شامِلِ وَعده بونه با، غریبه بِین، وَ بی‌امید و بی‌خدا این دُنیایِ دِلهِ زندگی کانه بِین.

¹³ وَلی اَسِه عیسی مسیحِ دِلهِ، شُما که یه وَختی دور بِین، مَسیحِ خونِ طَریقِ جی نزّیک هَبَین.

¹⁴ چون مسیح خودِش اَمی صُلح و سلامتیِه، اونیکه اَما هَر دو دَسِّه رِه، یعنی یهود و غیرِ یهودِ ایتا هَکُردِه. و خودِشِه جسمِ دِلِه جُدایِی یه دیفارِ که دُشمنی یه باعث با رِه فور بیاردِه،

¹⁵ رسم و رسومی که شریعَتِ احکامِ دِلِه دَبا رِه باطل هَکُردِه، این نیَّتِ هَمرَه که اون دُتا دَسِّه یه جی ایتا تازِه آدَم خلق هَکونه، تا صُلح و سَلامتی برقرار هَکونِه

¹⁶ وَ هر دُتا دَسِّه رِه ایتا تَنِ دِلِه خُدایِ هَمره آشتی هَدِه، خودِشِ صَلیبِ طریقِ جی که، دُشمَنی رِه بَکوشتِه.

¹⁷ اون بوما و صُلح و سلامتی خَبِر خُوشِ شِمِره که دور بِین و اوشانیکه نَزدیک بان رِه، اعلام هَکوردِه،

¹⁸ چون اونه طریقِ جی، اَما دوتا، ایتا روحِ دِلِه آسمانی پیَرِ دسرَسی داریم.

¹⁹ پَس دِ شُما غَریبِه و اَجنبی نییَین، بَلکه مُقَدَّسینِ همره هَموطن و خُدایِ خانواده یه اعضای جی هیسین؛

²⁰ شُما اون عمارتِ سَر که رَسولان و پِیغَمبَران اونه پِی بان، بَنا هَبَین، که مسیحْ عیسی خودِش اون بَنایِ اَصلی سَنگ هیسِه.

²¹ مسیحِ دِلِه تمام این بَنا همدیگرِ وصل بونِه، و ایتا مُقَدَّسِ مَعبد خُداوَندِ دِلِه بَرپا بونِه.

²² وَ شُما هَم هَمدیگَر هَمره مسیحِ دِلِه بَنا بونِین تا ایتا سِرِه مِثان دَر بییَین که خُدا خودِشِه روحِ طریقِ جی اونه دِلِه ماندِنِه.