اِفِسُسیان 1 - گیله ماز1 پولُس طَرَفِ جی که خدایِ خواسِّ هَمرَه عیسی مسیحِ رَسولِ، مقدّسینِ وَسین که اَفِسُسِ شهرِ دِلِه دَرِن، اوشانیکه مسیحِ عیسی دِلِه وَفا دارِن: 2 فیض وصلح و سلامتی، اَمیی پیَر، خدا، وَ خداوند عیسیِ مَسیحِ طَرَفِ جی، شِمِرِه بیِه. روحانی بَرکَات مَسیح دِلهِ 3 مُبارَک هَبو خُدا و اَمیی خُداوند عیسی مَسیح پیَر، که اَمَرِه مَسیح دِلهِ هر روحانی بَرکَتِ هَمرَه که آسِمانِ جاهای دِلِه دَرِه موبارَک هَکورده. 4 چون پِیش اَز اینکه دُنیا خلق هَبو، اَمَرِه مسیحِ دِلِه دوجین هَکُردِه، تا اونه حُضور مُقَدَّس و بی‌عیب هَبیم. مِحبتِ دِلِه، 5 اون خودِشِه خُجیرِ خواسّ و اِرادِه یه هَمرَه، اَمَرِه پیشتر خودِشِه فرزند خواندگی یه وَسین تعیین هَکُردِه، تا عیسی مسیحِ طریقِ جی خُدایِ ریکاشان هَبیم، 6 تا اینجوری اونه پُر جَلالِ فیضِ شُکر هَکُنیم، فیضی که اونه عزیزِ ریکای دِلهِ مَجانی اَمَرِه بَخشیدِه هَبا. 7 اَما مسیحِ دِلِه، اونه خونِ طریقِ جی، آزادی داریم؛ که این هَمون خطاهای بَخشِشِ، که اونِه خودِشِه بی حَد و حسابِ فیضِ قَدَر، 8 حِکمت و کاملِ فَهمِ هَمرَه، فَت و فَراوان اَمَرِه هَدَه. 9 اون خودِشِه اِراده یه راز رِه اَمَرِه بِشناساندِه، طبقِ خودِشِه خُجیرِ خواسِّ هَمرَه که مَسیح دِلِه ظاهِر هَکُردِه 10 خُدایِ نَخشِه این با، تا همونجور که اونه وخت بَرسِه، همه چیرِه، چه آسمانِ دِلِه و چه زمینِ سَر، همدیگر همره مسیحِ دِلِه جَم هَکونِه. 11 اَما اونه دِلِه وارِثان هَبَیم. چون طبقِ اونه خواسِّه که هَمِه چیرِه طِبقِ خودِشِه اِراده انجام دَنِه، پیشتر انتخاب هَبَبِیم. 12 تا اَما که اوَّلین کَسایی بِیم که مَسیحِ اُمید دَبِسّیم، اونه جَلالِ حمد و ثنا هَکُنیم. 13 شُما هَم اونه دِلهِ جا بِیتین، اون موقِه کهِ حَقیقَت پِیغام، یَعنی شیمی نِجاتِ خَبَرِ خوش بِشنَوِسّین و اونِه ایمان بیاردین، روح‌القدسِ موعودِ هَمره مُهر هَبَین، 14 که اَمیی میراثِ بیانِه هیسِه، و اوشانِ آزادی یه تَضمینِ وَسینِ که خُدای شییَن، تا اونه جَلال حمد و ثَنا هَبو. دُعا و شُکر هَکُردَن 15 اینه وَسین، همونجور که مَنَم شیمی ایمانِ تعریفِ به عیسی خُداوند و شیمی مُحبتِ به تمام مُقَدَسینِ بِشنَوِسَّم، 16 شیمی شُکر هَکُردنِ جی دَس نَکِشییَم، شِمِرِه هَمِش می دِعاهای دِلِه یاد هارنَم، 17 تا اَمی خُداوند عیسی مَسیحِ خُدا، اون پُر جلالِ پیَر، خَنَم حِکمت و مکاشفه یه روح رِه شِمِرِه هَدِه، تا اونه بِشناسین، 18 تا شیمی چِشِ دِل روشَن هَبو، تا اون اُمیدی که خُدا شِمِرِه اونه وَسین دُخوانِسِّه بِشناسین، و خُدایِ اون بی حد و حِساب و پُرجلالِ میراثِ، مقَدَّسینِ دِلِه بِفهمین، 19 وَ اونه بی حد و حِساب قوّتِ جی نسبت به اَما که ایمان داریم، باخَبَر هَبین. اون قُوَّت، خُدایِ پُر زورِ قدرتِ جی که دَرِه کار کانه، هَنِه 20 که اونِه مَسیح دِلِه بِکار بِیته، اون موقِه که اونه مُردِگانِ جی زندهِ هَکُردِه و آسِمانِ جاهایِ دِلِه، خودشه راسِ دَسه ور بِنیشاندِه، 21 هر ریاست و اقتدار و قُوَّت و فرمانروایی جی بالاتر، و هر اِسمِ جی بالاتر نه فقط این دوره یه دِلِه بَلکه آینده یه دورانِ دِلِه هم همینجور. 22 وَ اون هَمِه چیرِه مسیحِ لِنگِ جیر بَنَه، وَ تعیین هَکُردِه که کلیسایِ وَسین هَمِه چی یه دِلِه سَر هَبو، 23 کلیسایی که اونه تَنِ، وَ اونه پُری، هَمِه چیرِه هَمِه چی یه دِلِه پُر کانه. |
@ 2024 Korpu Company