کولُسیان 4 - گیله ماز

¹ اِی اربابان، شیمی پاکارانِ هَمرَه عدل و انصافِ هَمرَه رفتار هَکُنید، چون دانید شما هم ایتا اَباب آسمانِ دِلهِ دارین.

² همَش دُعایِ دِلِه استوار هَبین، و دُعایِ دِلِه شُکر هَکُردنِ همره شیمی حواس جم هَبو.

³ وَ اَمَرِه هَم دُعا هَکُنید، تا خُدا ایتا دَر کلام وَسین اَمَرِه واز هَکونِه تا بِتَّنیم مسیحِ راز رِه اعلام هَکونیم. اون رازی که اونه خاطری زندانِ دِلِه دَرِم

⁴ دُعا هَکُنید که بِتَّنَم اونجور که لایقِ، اونِه واضح باگوم.

⁵ اون مردُمِ همره که کلیسایِ دِرگا دَرِن حکیمانِه رفتار هَکُنید و هر فرصَتِ جی، به خوبی استفاده هَکُنید.

⁶ شیمی گَب هَمَش فیضِ جی پُر و سنجیده هَبو، تا بِدانین هر کی رِه چِطور جَواب هَدین.

آخَرین سلامها

⁷ تیخیکوس شِمِرِه می احوالِ جی کاملاً باخَبر کانه. اون ایتا عَزیزِ اَداش و اَمین خادِم و می همکار خُداوَندِ دِلهِ هَیسِه.

⁸ اونه شِیمی ور روانه کانَم تا اَمی احوالِ جی باخَبر هَبین، تا شِمِرِه دلگرم هَکونه.

⁹ اون اونیسیموسِ هَمرَه، اَمی عزیز و وفادارِ اَداش که شیمی جی هیسِه، شِیمی ور هَنه. اوشان شِمِرِه هر اونچه که ایجه اتفاق دَکِنِه یه جی باخَبر کانِن.

¹⁰ آریستارخوس که می هَمرَه زِندانِ دِلِه دَرِه، شِمِرِه سلام رِساندِنِه؛ همینجور هم مَرقُس، برنابایِ عمو پِسر، شِمِرِه سلام داره. پِیش تَر اونه بارِه شِمِرِه سِفارِش هَکُردَم که هر وخت شِیمی ور بیِه، گرمی یه هَمرَه اونه قبول هَکُنید.

¹¹ عیسی که یوستوس هم اونه گونَن، شِمِرِه سلام رِساندِنِه. می همکاران میَن خدایِ پادشاهی یه کارِ دِلهِ، فقط این چن نفر یهودِ نسلِ جی هیسَن، وَ اوشان می تسلی یه باعِث بان.

¹² اِپافْراس، که خودِش شیمی جی و عیسیِ مسیحِ خادِمِ، شِمِرِه سلام داره. اون هَمَش دُعایِ دِلِه خُدایِ جی خَنِه که شُما اون آدمانِ مِثان که بالغ و خاطرجَم هیسین، پابرجا بُمانید، و خُدایِ اِراده یه جی کامِلاً اطاعت هَکُنید.

¹³ مَن شاهِدمِ که اون شِمِرِه و اوشانِ وَسین که لائودیکیه و هیراپولیس دِلِه دَرِن، سخت زحمت بَکِشییَه.

¹⁴ عزیزِ دکتر لوقا و هَمینجور دیماس شِمِرِه سلام رِساندِنَن.

¹⁵ اَمِی اَداشان و خاخُران لائودیکیه یه دِلِه و هَمینجور نیمفا و کلیسایی که این زِنایِ سِرِه بَرپا بونِه رِه، سلام بَرسانین.

¹⁶ بعدِ اینکه این نامه شیمی میَن خوانده هَبا، ترتیبِی هَدین که لائودیکیه کلیسایِ دِلِه هَم بُخوانِسِّه هَبو؛ و شُما هَم می نامِه که لائودیکیه وَسین بنویشتِم رِه بُخوانید.

¹⁷ آرخیپوسِ باگویید: «مُواظِب هَبو تا خدمتی که خُداوَندِ دِلهِ تِرِه بِسپارِسِّه هَبا کامل انجام هَدی.»

¹⁸ مَن، پولُس، این سلام می دَس خَطِ هَمرَه نِویسِنِم. می قُل و زنجیلِ این زندانِ دِلِه شیمی یاد بیارین. فیض شِیمی هَمرَه دَبو.