کولُسیان 3 - گیله ماز

تازه زندگی مَسیحِ دِلِه

¹ پَس اگه شُما مَسیحِ همره زنده هَبَین، اونچه که جآر دَرِه یه دُمّال بیشین، اوجِه که مَسیح خُدایِ راس دَسِ وَر نیشتِه.

² شیمی فِکران رِه اون چیزانی که جآر دَرِه یه سَر بَنین، نه اون چیزانی که زَمینِ سَر دَرِه.

³ چون بَمِردین و اَسِه شِیمی زندگی مَسیح هَمرَه خُدایِ دِلهِ جا هَدَئِه.

⁴ وختی مَسیح که شیمی زندگیئِه، آشکار هَبو، اون وَخت شُما هَم اونه همره جلالِ دِلِه آشکار بونید.

⁵ پَس، هر اونچه شیمی وجودِ دِلهِ زَمینیِه رِه، بَکوشین، یَعنی بی‌عفتی، ناپاکی، هوا و هوس، بَدِ خواسِّه ها وطمع که همون بُت‌پرسّیه.

⁶ اینه وَسین خُدایِ غَضب نافرمانِ ریکاشانِ سَر هَنِه.

⁷ شُما هَم شیمی قدیمی زندِگی یه دِلِه این راه ها رِه شونِه بین.

⁸ وَلی اَسه بایسّی تمام ایشان رِه شیمی جی دور هَکونید.، یَعنی غیظ، غضب، بدخواهی، تُهمت و بَدِ گَب که شیمی دَهنِ جی دِرگا هَنه.

⁹ هَمدِیگر دُرو نَگوئیین، چون اون قَدیمِ آدم رِه اونه کارانِ هَمرَه شیمی تنِ جی دِرگا هَکُردین

¹⁰ وَ نُو آدمِ لِواسِ دَکُردین، که حقیقی معرفتِ دِلِه هر لحظه تازه بونِه تا خودِشِه خالقِ مثان دَربیِه.

¹¹ این نُو آدمِ دِلِه، یونانی یا یهودی، ختنِه‌ هَبوسِّه یا ختنِه نَبوسِّه، بَربَر یا سَکایی، پاکار یا آزاد، دِ مَعنی نِداره، بَلکه مَسیح هَمِه چی هیسه و هَمِه یه دِلِه دَرِه.

¹² پَس ایتا خُدایِ اِنتخاب هَبوسِّه قومِ مثان که مُقَدَّس و عَزیزِن، دِلسوزی، مِهرَبانی، فروتنی، مُلایمت و صَبرِ لِواسِ دَکُنین.

¹³ هَمدِیگَرِه تَحمُل هَکُنید، و اگه یِنَفَر، یِنَفَر دیگَرِ جی شکایتی داره، همدیگَرِ بِبَخشین، هَمونجور که خُداوَند شِمرِه بِبخشییَه، شِما هَم بایسّی هَمدِیگَرِه بِبَخشین.

¹⁴ و تمامِ ایشانِ سَر مُحبتِ لِواسِ دَکُنین، که همه چیرِه همدیگَرِ همره پیوند دَنِه و شِمِرِه کامل کانه.

¹⁵ مسیحِ صُلح و سلامتی شیمی دِلِ میَن حاکم هَبو، چونکه دُخوانده هَبَین تا ایتا تن اعضا‌ مِثان صلح و سلامتی دِلِه زندگی هَکونید و شکرگزار هَبین.

¹⁶ بَنین مسیحِ کلام شیمی دِلِه فَراوانی یه همره بُمانِه؛ تمامِ حکمتِ همره هَمدِیگَرِ نصحیت هَکُنید و تعلیم هَدین؛ مزامیر، سرودها و روحانی آوازها بُخوانید، شُکر هَکُردنِ هَمره که شیمی دِلِ میَن خُدایِ وَسین دارین.

¹⁷ وَ هر کاری که کانید، چه باگوتَنِ دِلِه و چه رفتارِ دِلِه، هَمِه رِه خُداوند عیسی اسمِ همره هَکُنید، وَ اونه طریقِ جی خُدای پیَرِ شُکر هَکُنید.

ایماندارانِ رابطه

¹⁸ اِی زِناکان، شیمی مردِکانِ جی اطاعت هَکُنید، هَمونجور که خُداوَندِ لایقِ.

¹⁹ اِی مَردِکان، شیمی زِناکان دوس بِدارید و اوشانه هَمرَه تندی نَکُنین.

²⁰ اِی وَچِه هان، هر کارِ دِلهِ شیمی پیر و مارِ جی اِطاعَت هَکُنید، چون این خُداوَندِ خوشحال کانِه.

²¹ اِی پیَرِان، شیمی وَچِه هان رِه نا اُمید نَکُنید، نَکُنِه دلسرد هَبون.

²² اِی پاکاران، هر کارِ دِلِه شیمی زمینِی اربابِانِ جی اِطاعَت هَکُنید، نه فقط اون موقه که شیمی مُواظِب هیسَن، ویا ایتا اون آدمانِ مِثان که اینه دُمّال دَرِن که مردُمِ راضی هَکُنَن، بلکه پاکِ دِلِ همره و خُداوندِ ترسِ همره.

²³ هر کاری که کانید دِل و جانِ همره هَکونید، جوریکه اِنگار خُداوندِ وَسین کانید، نه مَردُمِ وَسین.

²⁴ چون که دانید شیمی پاداش اِرثیِه که خُداوَندِ جی گیرنید. چونکه راس راسی شُما خُداوند، مَسیحِ خِدمَت کانید.

²⁵ چون هر کی بَدی هَکونه، خودشه بَدِ کاران عَوَضِ دینِه وهیچ فرقی وجود نداره.