کولُسیان 2 - گیله ماز

¹ خَنَم بِدانید که شیمی وَسین و اوشانِ خاطری که لائودیکیه یه منطقه دِلِه دَرِن، وَ تمام اوشانِ وَسین که مَرِه نَدییَن، چطور تَقلّا کانَم،

² تا دِلگرم هَبون، و مُحبتِ دِلِه همدیگَر همره مُتحد هَبون، وهمه پُری یه فهم و درکِ کامِلِ جی سود بَبِرَن، خُدایِ راز، یَعنی مَسیح رِه بِشناسِن،

³ که تمامِ حکمت و معرفت گنجها اونه دِلِه جا هَدَئه.

⁴ اینه گونَم تا هیچکَس اون دَلیلایِ همره که قانع کانه شمِرِه گول نَزِنِه.

⁵ چون هر چَن جسم دِلِه شیمی وَر دَنییَم، ولی روحِ دِلِه شیمی همره دَرِم، و شیمی نظم و قُرصِ ایمان که مَسیحِ دارین رِه دینَم، خُشحالم.

مَسیحِ دِلِه زندگی

⁶ پَس هَمونجور که مسیحِ عیسی یه خُداوَندِ قبول هَکُردین، اونه دِلِه زندگی هَکُنید:

⁷ اونه دِلهِ بَنِه دَبِدین و رشد هَکُنید، و ایمان دِلِه پابرجا هَبین، هَمونجور که یاد بِیتین، شُکر هَکُردَنِ جی پُر هَبین.

⁸ هوشیار هَبین تا هیچکَس شِمِرِه فلسفه و بیخُدی گول بَزَئنِ همره گِرفتار نَکُنِه، که نه مَسیحِ سَر، بَلکه آدمانِ رَسم و رُسومات و این دُنیایِ اصولِ سَر پا برجائه.

⁹ چون تمام ذاتِ الهی یه پُری، جسمِ مِثان مسیحِ دِلِه دَرِه،

¹⁰ وَ شُما هم مسیحِ دِلِه، که تمامِ ریاستها و قدرتها رِه سَرِ، پُر هَبین.

¹¹ وَ مسیحِ دِلِه خَتنِه هَم هَبَین، خَتنِه‌ای که دَسِّ همره نَبا. بلکه جِسمانی تَنِ دِرگا بیاردنِ همره، مسیحِ طریقِ جی خَتنِه هَبَین.

¹² اونه همره غُسلِ تعمیدِ دِلِه دَفن هَبَین، و ایمانِ طریقِ جی که خُدایِ قُوَّتِ همره عمل کانه، که مسیحِ مُردِگانِ جی زنده هَکُردِه، اونه هَمره زنده هَبَین.

¹³ و خُدا شِمِرِه که شیمی گُناهان و شیمی خَتنِه نَبوسِّه جسمی دِلِه بَمِرده بِین، مَسیحِ همره زنده هَکُردِه. اون تمامُ اَمی خطاها رِه بِبَخشییَه

¹⁴ و اون قرضهایِ سَنَد رِه که قانونهایِ طریقِ جی اَمی عَلیِه بَنویشتِ هَبا رِه باطِل هَکُردِه و اَز بین بَبِردِه. و صلیبِ سَر میخکوب هَکُردِه.

¹⁵ اون، ریاستها و قدرتهایِ سِلاحها رِه بِیتِه، و صلیبِ همره اوشانِ سَر مسلط هَبا، و اوشانه همه یه وَر رُسوا هَکُردِه.

¹⁶ پَس نُزارید هیچکی شِمِرِه اونچه یه باره که خارنین و نوشِنین، یا عیدها و تازه ماه و مُقدس شنبه یه روز خَبَری، قضاوت هَکونه.

¹⁷ ایشان اون چیزانِ سایِه هیسَن که هَنِه، وَلی اَصلِ اوشان مَسیحِ دِلِه پیدا بونِه.

¹⁸ نُزارید کسیکه خودِشِه خوار هَکوردَن و فرشتگان عبادَتِ مشغولِ شِمِرِه محروم هَکونِه. اینجور آدَم فقط خودِشِ رویاها رِه تَکیِه کانه و بدونِ اینکه دلیلی بِدارِه خودِشِ بیخُدی فِکرانِ همره مغرور بونِه.

¹⁹ اینجور آدم دِ سَر رِه وصل نیِه، اون سَری که تمامِ تَن اونه همره جان گیرنِه، و مَفصلا و بَندهایِ طَریقِ جی همدیگرِ همره وصل بونِه، و اون جور که خُدا خَنِه رشد کانه.

²⁰ پس اَسه که شُما مَسیحِ همره نسبت به این دُنیایِ اصول بَمِردین، چِرا اوشانِ مِثان که انگار هَلَه این دُنیا رِه تعلق دارِن، اونه قانونان رِه عمل کانید، اون قانونایی که گونه:

²¹ «اینه لمس نَکُن! اونه تُک نَزِن، اونه سَر دَس نُزار!»؟

²² ایشان هَمِه اون چیزانِ بارِئه که استفاده هَکُردنِ همره اَز بین شونِه، وَ آدمی یه دستورات و تعلیمی سَر بَنا هَبا.

²³ وَ هر چَن وختی که خودِشان این بَساتِ دینِ جی و تَنِ ریاضت و تَنِ سخت بِیتنِ جی گَب زَنِن، حکیمانِه به نظر هَنِه، ولی اوشان از اینکه هوا و هوسِ جلوه هَگیرَن هیچ کاری اوشانِ دَس بَر نییَنِه.