کولُسیان 1 - گیله ماز

¹ پولُس طرفِ جی که خُدایِ خواسِّ هَمرَه، مسیحِ عیسی یِه رسولِ، وَ اَمیی اَداش، تیموتائوسِ طرَفِ جی،

² مسیحِ دِلِه یه مُقَدَسین و وفادارِ اَداشان کِه کولسیِ یه شهرِ دِلِه دَرِن: فیض وصُلح و سلامتی اَمیی پیَر، خُدایِ طرفِ جی، شِیمی وَسین بیه.

شکر هَکوردَن و دُعا

³ اَما هَمَش دعایِ موقِه شیمی وَسین، خُدا، اَمیی خُداوند عیسی مسیح پیَرِ شکر کانَیم،

⁴ چون اَما شیمی ایمان باره مسیحِ عیسی دِلِه و محبتی که تمامِ مُقَدَسینِ دارین رِه بِشنَوِسّیم.

⁵ که ایشان اون امیدِ جی سَر چِشمِه گیرنِه کِه شیمی وَسین آسِمانِ دِلهِ محفوظِ که پیشتر اون حَقیقَتِ کلامِ باره، یعنی انجیل، بِشنَوِسّین.

⁶ اِنجیلی که شِمِره بَرِسییَه، و تمامِ دُنیایِ دِلِه ثمر هارنه و زیاد بونِه، همونطور که شیمی مین هم، اون روزِ جی که اونِه بِشنَوِسّین و خُدایِ فیضِ حقیقتِ دِلِه بِفهمِسّین، کار هَکُردِه.

⁷ شُما اونه اَمی عزیزِ هَمخِدمَت اِپافْراسِ جی یاد بِیتین. اونیکه اَمیی طَرفِ جی مسیحِ وفادارِ پاکارِ.

⁸ اون اَمَرِهِ شیمی محبتِ جی که روحِ دِلِه دَره، باخَبر هَکوردِه.

⁹ اینه وَسین، اَما هم از اون روز که اینه بِشنَوِسّیم، شیمی دُعا هَکُردَنِ جی دَس نَکِشییَیم، بلکه یِکسَرِه خُدایِ جی خَنیم که شُما اونه اِراده یه بِشناختَنِ همرَه، هر حکمت و روحانی فهمِ دِلِه پُرهَبین؛

¹⁰ تا شیمی رفتار خُداوَندِ لایق هَبو، وَ بِتَّنید اونه کامِلاً خُشحال هَکُنید: هر خُجیرِ کارِ دِلِه ثمر بیارین و خُدایِ بِشناختَنِ دِلِه رشد هَکُنید؛

¹¹ وَ تمامِ قُوَّتِ هَمرَه که اونه پُرجلالِ قدرت جی هَنِه، هر لحاظِ جی رَسدار هَبین، تا خُشحالی یه همره، کاملاً صَبر و تَحَمُل بِدارین؛

¹² پیَرِ شُکر هَکُنید که شِمِرِه لایقِ شَریک هَبوسَّن مقدسینِ میراث نورِ قَلَمرو دِلِه هَکوردِه.

¹³ اون اَمَرِه ظُلَمات قلمرویه جی آزاد هَکُردِه و خودشه عزیز ریکایِ پادشاهِی یه سمت بَرِساندِه،

¹⁴ که اونه دِلِه اَما آزادی، یَعنی گُناهِانِ آمُرزِش ره دَاریم.

مَسیح شخصیت و کار

¹⁵ او، اون خُدایِی که نَشَئنِه اونه بَدییَنِ شِکلِ، اوّلین وَچِه، تمامِ خِلقتِ جی بالاتر

¹⁶ چون هَمِه چی اونه طَریقِ جی خلق هَبا: اونچه آسِمانِ دِلِه و اونچه زَمینِ سَر دَرِه، اون چیزانی که شَئنِه بَدییَن و اون چیزانی که نَشَئنِه بَدییَن، چه پادشاهی یه تختها یا قلمروها، ریاستها، یا قدرتها؛ همه چی اونه طَریقِ جی و اونه وَسین خلق هَبان.

¹⁷ او هَمِه چی یه جی پیشتر دَبا، و اونه دِلِه همه چی باهم نِگَه داشته بونه.

¹⁸ اون، تَن رِه که کلیسائه، سَرِ، اون شِروع و اوّلین نَفرِه که مُردِگانِ جی زنده هَبا، تا هَمِه چی یه دِلِه، اون سَر هَبو.

¹⁹ راس راسی تمام خُدایِ خوشحالی اینه دِلِه با که تمام کمال هَمرَه اونه دِلِه بُمانِه،

²⁰ و اونه طَریقِ جی هَمِه چی رِه، چه آسِمانِ دِلهِ وچه زَمینِ سَر، خودشه هَمرَه آشتی هَدِه، صُلحِ طَریق جی که اونه خونِ بریختن هَمرَه صلیبِ سَر بوجود بیاردِه.

²¹ شُما هَم یه وَختی خدایِ هَمرَه غریبه بِین، وَ شیمی فِکرایِ دِلهِ اونه دُشمَن بِین، وَ این شیمی شریرانِه کارانِ دِلِه معلوم بونه با.

²² وَلی اَسِه مسیح شِمِرِه خودشه جسمانی تنِ طریق ومرگ راهِ جی آشتی هَدَه، تا شِمِرِه مُقَدَّس و بی‌عیب و بدون هیچ سَرامکویی خُدایِ وَر بیارِه،

²³ به‌ شرطی کِه ایمان دِلهِ محکم هَبین و پابرجا بُمانید و انجیلِ امیدِ جی دَنِکین، هَمون اِنجیل که آسِمان جیر تمام خلقتِ رَه اعلام هَبا، و مَن، پولُس، اونه پاکار هَبام.

پولُس خِدمت کلیسایِ وَسین

²⁴ اَسه اون زَجرهایی که شیمی خاطِری بَکِشییَمِ وَسین خُشحالم، و مَسیح هر رنجهایِ کم و کَسری رِه اونه تنِ خاطِری که کلیسائِه می تَنِ دِلهِ جبران کانَم،

²⁵ من طبق مأمورییَتی که خُدا مَره بِسپارِسِّه، کلیسایِ خادم هَبام، تا خُدایِ کلامِ کامِل شِمِرِه بِشناسانَم،

²⁶ یَعنی اون راز که خیلی زَمان، نسلهای جی قایم هَکُرده بُمانِسِّه با وَلی اَسه اونه مُقَدَسینِ وَسین معلوم هَبا.

²⁷ خُدا اینجور بِخَسِّه که ایشانه وَسین معلوم هَکُونه که این راز، چه گَته جلالی غیرِ یهودیِانِ مین هیسِه، این راز اینِه که، مَسیح شیمی میَن، جَلالِ اُمیدِ.

²⁸ اَما اونه اعلام کانیم، وَ همه رِه هُشدار دَنیم، و همه کَسِ تمام حکمتِ همره تعلیم دَنیم، تا هَمِه رِه مسیحِ دِلِه بالغِ آدمانِ مِثان خُدایِ وَر بیاریم.

²⁹ اینه وَسینِ که مَن زَحمَت کَشِنَم و تمام می قُوَّتِ همره اونه طریقِ جی که می دِلِه قُوَّتِ همره کار کانه، تَقَّلا کانم.