اعمال رَسولان 8 - گیله ماز

سولُس کلیسا رِه اذیت کانِه

¹ سولُس اِستیفانِ بَکوشتَن هَمرهَ موافِق با. از اون روز به بعد، ایتا گَتِه آزار و اَذیت اورشلیمِ کلیسا علیِه شِروع هَبا. جوریکه بِجز رَسولان، همه یَهودیِه و سامِرِه یه منطقه سَمت پَخش و پَلا هَبان.

² وَلی چَن تا خداشناسِ مَردای اِستیفانِ جِنازِه رِه دَفن هَکُردَن و اونه وَسین گَتِ عزاداری بِیتَن.

³ وَلی سولُس تمام خودِشِه غِیظِ هَمرهَ کلیسا رِه حملِه کانِه با و سِرِه به سِرِه گَردِنِه با، زِناکان و مَردِکان رِه دِرگا کَشِنِه با و زندان دِلِه تُووادِنِه با.

فیلیپُس سامِره یه دِلِه

⁴ وَلی اون ایماندارنی که اَذیت و آزار خاطِری پَخش و پَلا هَبا بان، هر جا که شونه بان، خُدایِ کَلامِ خَبَرِ خوشِ دَنِه بان.

⁵ فیلیپُس هَم سامِره یه ایتا شَهرانِ دِلِه بَشَه و اوجِه مَسیحِ پیغامِ مَردمِ تعلیم دَنِه با.

⁶ جَمائَتِشان هَمدِل فیلیپُسِ گَبِ بِشنَوِسَّن و معجِزاتی که اون کانِه با رِه بَدییَن، همه دِقّتِ هَمرهَ اونچه که گونِه با رِه گوش دَنِه بان،

⁷ چون پَلیدِ اَرواح بلَندِ صدا و نَعرِه یه هَمرهَ خیلیانِ جی که اوشانه گِرِفتار بان دِرگا هَنِه بان و خیلی از چُلاقان و شَلان شَفا گیرنِه بان.

⁸ اینه وَسین اون شهر خوشحالی یه جی پُر هَبا.

جادوگرِ شَعمون ایمان هارنِه

⁹ وَلی اون شهرِ دِلِه ایتا مَردای که اونِه اِسم شَمعون با زندگی کانِه با، اون سامِره یه مَردمِ پیشتَر خودِشِه جادوگَری یه هَمرهَ متَعجب هَکوردِه با و اِدّعا کانِه با، خودِشِه رَه کَسییِه.

¹⁰ از گَت تا کوچیک همه اونِه گَبِ گوش دَنِه بان و گونه بان: این مَردای هَمون خُدای قدرتِ، که اونِه گَتِه قدرت گونَن.»

¹¹ مَردم اونِه گَبِ گوش دَنِه بان، چون خیلی وَخت با خودِشِه جادوگری یه هَمرهَ، اوشانِه متَعجب هَکُردِ با.

¹² وَلی وَختِی مَردم فیلپُسِ پِیغامِ هَمرهَ که خُدای پادشاهی یه خَبَرِ خُش و عیسی یه مسیحِ اِسمِ بارِه با رِه ایمان بیاردِن، همه، چه زَن و چه مَرد غسلِ تَعمید بِیتَن.

¹³ حتّی شَمعون هَم ایمان بیاردِه و بَعدِ اینکه تعمید بِیتِه هَمَش فیلیپُسِ هَمرهَ دَبا و گَتِ معجِزات و نِشانه یه بَدییَنِ جی که اَنجام بونِه با، مات و مَبهوت با.

¹⁴ وَختِی رَسولان اورشلیمِ دِلِه خَبَردار هَبان که سامِریِان خُدای کَلامِ قبول هَکُردَن، پِطرُس و یوحنا رِه اوشانِ وَر بَرِساندِن.

¹⁵ اون دُتا به سامِرِه بَرِسیَن، مَردُمِ وَسین دُعا هَکُردَن تا روح القُدُسِ هَگیرِن،

¹⁶ چون روح القُدُس هَلَه هیچ کدام سَر نوماَ با، بلکه فقط به اسمِ عیسی یه خُداوند تعمید بِیته بان و بَس.

¹⁷ پَس پِطرُس و یوحنا خودِشانِه دَسِ اوشانِ سَر بَنَن و اوشان روح القُدُسِ بِیتَن.

¹⁸ وَختِی شَمعون بَدییِه رَسولان خودِشانِه دَسِ مَردُمِ سَر نَنَن و مَردم خُدای روحِ گیرِنِن، یِکَم پول بیاردِه و

¹⁹ رَسولانِ باگوتِه: «این قدرَتِ مَرِه هم هَدین تا هر کَسِ سَر دَس بَنَم، روح القُدُسِ هَگیرِه.»

²⁰ وَلی پِطرُس باگوتِه: «تی نُقرِه، تی هَمرهَ نابود هَبو! چون خیال هَکُردی خُدای هَدیِه رِه تانی پولِ هَمرهَ بَهینی!

²¹ تو این خِدمتِ دِلِه هیچ سهم و نقشی نِداری، چون تی دِل خُدایِ هَمرهَ راس نیِه.

²² پس تی این شرارت جی توبِه هَکُن و خداوَندِ جی بِخواه تا شاید تی دِلِ این فِکر آمُرزیدِه هَبو؛

²³ چون دینَم حَسودی و گُناه، تی دِلِ سیا هَکردِه.»

²⁴ شَمعون باگوتِه: «شما خُداوند وَر مَرِه دُعا هَکُنین تا اونچه باگوتین می سَر نیِه.»

²⁵ پِطرُس و یوحنا بعد از اینکه شَهادَت هَدَن و خُداوند کَلامِ اعلام هَکُردَن، به اورشَلیمِ وَگرِسَّن و سامِرِه یه خیلی دِهاتِ دِلِه اِنجیلِ خَبَرِ خُشِ هَدَئن.

فیلیپس و دَرباری خواجِه‌

²⁶ ایما خُداوندِ ایتا فِرِشتِه فیلیپُسِ باگوتِه: «وَرِس و جنوبِ سَمت بوشو، اون راهی که اورشلیمِ جی به غزه شونه.» این راه بیابانِ دِلِه با.

²⁷ پس فیلیپُس وَرِسَه و را دَکِتِه. اوجِه ایتا خواجِه مَردای دَبا که حَبَشه یه جی با. اون حَبَشه یه مَلکِه یه دَرباریان جی با که اونِه اِسم کَنداکِه با، وَ مَلکِه یه خزانِه داری اونِه دَس دَبا. اون به اورشلیمِ بوما با تا خدا رِه پَرَسِش هَکونِه.

²⁸ اَلَان دَبا وَگِرده و خودِشِه اَرابِه یه دِلِه نیشته با و اِشعیایه پِیغَمبَرِ کِتابِ خواندِنِه با.

²⁹ ایما خُدای روح فیلیپُس باگوتِه: «نَزیک بوشو و اون اَرابِه رِه بَرِس.»

³⁰ فیلیپُس اونِه سَمت دُو هَکردِه و بِشنَوسِّه که دَرباری خواجِه اِشعیایه پِیغمبر کِتابِ خواندِنِه. اونِه باگوتِه: «اونچه خواندِنی رِه، فَهمِنی؟»

³¹ دَرباری خواجِه باگوتِه: «اگه کَسی مَرِه راهنِمایی نَکُنِه، چِطور تانَم بِفَهمم؟» پس فیلیپُسِ جی خواهِش هَکردِه سَوار هَبو و اونِه وَر بِنیشِه.

³² خواجِه دَبا مُقَدَّسِ نوشته یه اون قِسمَتِ بُخوانِه که گونِه با: «دُرُس، ایتا گوسَندِ مِثان که اونِه کُشتارِ سَمت بَرنِن، وَ ایتا وَرِّه یه مِثان که خودِشِه پَشم چینِ پیش آرامِ، اون هَمونجورهم خودِشِه دَهَنِ واز نُکانِه.

³³ اونِه کوچیک هَبوسَّنِ موقِه، هرجور بی عِدالَتِی ایی اونِه حَق هَکُردَن، کی تانِه باگو اون کیه نَسلِ جیه؟ چون اونِه زندگی، زَمینِ جی بِیتِه هَبا.»

³⁴ خواجِه‌ فیلیپُسِ باگوتِه: «خواهش کانَم مَرِه باگویی پِیغمبر ایجه کیه باره گَب زَنِه، خودِشه جی یا یَنفَر دیگَری جی؟»

³⁵ پس فیلیپُس شِروع به گب بَزَن هَکردِه و مُقَدَّسِ نوشتِه یه هَمون قِسمتِ جی شِروع هَکردِه و عیسی یه بارِه خَبَرِ خُش هَدَه.

³⁶ هَمونجور که راه دِلِه شونه بان، یِجا بَرِسین که اُو دَبا. خواجِه‌ باگوتِه: «بِیش، ایجه اُو دَرِه، اَلان چی می تَعمید بِیتَن جلوه گیرنِه؟»

³⁷ فیلیپُس باگوتِه: «اَگه تمام تی دِلِ هَمرهَ ایمان بیاردی، هیچی تی جلوه نِگیرنِه.» خواجِه‌ باگوتِه: «ایمان دارمِ که عیسی مَسیح خُدایه ریکائِه.»

³⁸ پس خواجِه‌ دَستور هَدَه اَرابِه رِه بِدارَن، وَ فیلیپُس و خواجِه، هر دو اُویه دِلِه بَشَن و فیلیپُس اونِه تَعمید هَدَه.

³⁹ وَختِی اُویه جی دِرگا بومَن، یِدَفه خُداوند روح فیلیپُسِ بِیتِه و بَبِردِه و خواجِه دیگه اونِه نَدییَه، وَ خوشحالی یه هَمرهَ خودِشِه راهِ بَشَه.

⁴⁰ وَلی فیلیپُس خودِشه اَشدودِ منطقه یه دِلِه پیداهَکوردِه. اون تمام اون منطقه یه شَهرایِ دِلِه گَردِنِه با و اِنجیلِ خَبَرِ خوشِ دَنِه با، تا به قیصریه شَهر بَرِسییَه.