اعمال رَسولان 6 - گیله ماز

هفت نفر خِدمَتِ وَسین انتخاب بونَن

¹ اون روزان که شاگِردان بیشتَر بونه بان، یَهودیان یونانی زَبان، یَهودیان عبرانی زَبانِ جی گِلِه هَکوردَن که اوشانِ بیوِه زِناکانِ سَرچِش نَگیرنِن و اوشانِ هر روزِه غذایِ سهمِ دُرُس نَدِنِن.

² پس اون دوازدَه تا رَسول، تمام شاگِردانِ خودِشانِه وَر دُخوانِسَّن و باگوتِن: «دُرُس نیِه اَما مَردُمِ غذا هَدَئنِ وَسین، خُدای کَلامِ تَعلیم هَدَئنِ وِل هَکنیم.

³ اِی آداشان، اینه وَسین شیمی میِن هَفت نَفَر که خُش نامَن و خُدای روح و حکمتِ جی پُرِن رِه دوجین هَکُنین تا اوشانِ این کارِ سَر بَنیم.

⁴ ولی اَما اَمرِه دُعا هَکُردَن و خُدای کلامِ خِدمتِ وَسین وقف کانیم.»

⁵ اونچه که رَسولان باگوتِن هَمِه یه نَظر خوب بوما، وَ این آدَمانِ دوجین هَکُردَن: استیفان مَردی که روح القُدُس و ایمانِ جی پُر با، فیلیپُس، پْروخُرُس، نیکانُر، تیمُن، پارمِناس، وَ نیکُلائوس که اَنطاکیِه یه دِلِه یَهودی هَبا با.

⁶ این مَردِکان رِه رَسولانِ وَرجه بیاردِن و رَسولان اوشانِ وَسین دُعا هَکُردَن و اوشانِ سَر دَس بَنَن و اوشانِ این خِدمتِ سَر بَنَن.

⁷ پس خُدای کَلام همه جا اعلام بونِه با و اورشلیمِ دِلِه یه شاگِردان خیلی زیاد بونه بان، وَ یَهودی کاهِنانِ جی ایتا گَتِ جماعَت ایمان بیاردِن.

استیفان دَسگیر بونِه

⁸ استیفان فیض و قوَّتِ جی پُر با و قومِ دِلِه خِیلی عجیبِ کارا و معجِزات کانِه با.

⁹ اون موقِه چَن نفر ایتا عبادتگاهِ جی که اونه اِسم ’آزاد هَبوسِّه شانه عبادتگاه‘ با، که قیرَوانی یَهودیِان جی و اسکندریِه و کیلیکیه و آسیایه منطقه یه جی هَم بان، اِستیفانِ هَمرهَ بَحث هَکُردَن.

¹⁰ وَلی اِستیفان اون حِکمت و خُدای روحِ هَمرَه که گَب زَنِه با، هیچکی نَتِنِسِّه اونِه پیش بییَسِه.

¹¹ پَس اوشان یَواشکی چَن نَفَرِ خَلوتِ جا بَبِردَن و اوشانِه آنتریک هَکُردَن تا باگون: «اَما بِشنَویسّیم که اِستیفان، موسی یه پیغمبر و خَدارِه کُفر گونِه با.»

¹² اوشان مَردم و مشایخ و توراتِ مُعلِّمینِ علیِه استیفان آنتیریک هَکُردَن، وَ اوشان استیفانِ سَر بَریختِن، اونِه دَسگیر و شورایِ وَر بَبِردَن.

¹³ اوشان چَن تا دروزَن شاهِد هَم بیاردِن که گونه بان: «این آدَم این کارِ جی دَس نَکِشِنه و هَمَش مقدَّسِ مَعبَد و شریعتِ بَد گونِه.

¹⁴ چون اَما خودِمان بِشنَویسّیم که گونِه با این عیسی یه ناصِری این مَعبَدِ فور هارنِه و رَسم و رسومی رِه که موسی اَمَرِه هَدَه رِه، عَوَض کانِه.»

¹⁵ هَمون موقِه، تمام اوشانیکه شورای دِلِه نیشته بان و استیفانِ زُل بَزه بان، بَدییَن که اِستیفانِ دیم ایتا فِرشته یه دیمِ مِثان هَبا.