اعمال رَسولان 3 - گیله مازایتا چُلاقِ مادرزادِ شفا 1 ایتا روز ساعت سه بعد از ظهر که دُعایِ موقِه با، پِطرُس و یوحَنا دَبان معبَد سَمت بوشون. 2 اون موقِه، چَن نَفر ایتا مَردای که مادر زادی چُلاق با رِه، هارنِه بان. اوشان اونِه هر روز اون معبدِ دَروازِه یه وَر که اونِه اِسم «قَشَنگِ دروازه» با نَنِه بان تا مَردُمی که مَعبدِ دِلِه شونه بان جی صَدَقِه هَگیره. 3 وَختی اون مَردای پِطرُس و یوحنا رِه بَدییِه که خَنِن مَعبدِ دِلِه بوشون، اوشانِ جی صَدَقِه بِخَسِّه. 4 پِطرُس و یوحنا اونِه زُل بَزَن؛ پِطرُس باگوتِه: «اَمَرِه بِیش!» 5 اون مَردای اوشانِه بِیشیِه و اِنتظار داشتِه یِچّی اونِه هَدِن. 6 وَلی پِطرُس اونِه باگوتِه: «مَن نه نُقرِه دارمِ نه طِلا، وَلی اونچه دارمِ رِه تِرِه دَنَم! به اِسمِ عیسی مسیحِ ناصری وَرِس و راه بوشو!» 7 ایما پطرس اون مَردای یه راسِ دَسِ بِیتِه و اونِه وَرِساندِه. هَمون دَم اونِه لنگ و زانو قُوَّت بِیتِه 8 خودِشِه جایه سَر وَرِسَه و خودِشِه لِنگِ سَر بیِسَا رادَکِتِه. ایما همونجور که پَرنِه با، اوشانِ هَمرهَ معبدِ دِلِه بَشَه و خَدارِه شکر کانِه با. 9 تمام مَردم اونِه همونجور که راه شونِه با و خدا رِه شُکر کانه با بَدییَن، 10 وَ بِفَهمِسِّن اون هَمونیِه که قبلاً صَدقِه هَیتَن وَسِین ’قَشنگِ دَروازه یه‘ وَر نیشِنِه با، پس، اونچه جی که اونه وَسین اِتِّفاق دَکِت با، خِیلی تعَجِب هَکُردَن. پِطرُس پِیغام معبدِ دِلِه 11 هَمون موقِه که اون مَردای پطرس و یوحَنایِ هَمرهَ شونِه با و اوشانِ جی سیفا نَبونِه با، تمام جَماعَت حیرتِ هَمرَه سُلیمانِ ایوانِ سمت، اوشانِ سَمت دُو هَکُردَن. 12 وَختِی پِطرُس اینه بَدییِه، جَماعَتِ باگوتِه: «اِی یَهودی مَرداکان، چِرا اینقدر تَعجِب هَکوردین؟ چِرا زُل بَزَیین اَمَرِه نِگاه کانین، اِنگار که اَما اَمی قُوَّت و شریعتِ ایمانِ هَمرهَ، این مَردای رِه باگوتیم راه بوشو؟ 13 ابراهیم خدا و اِسحاق خدا و یعقوبِ خدا، اَمِی پیَرانِ خدا، خودِشه خادِم عیسی رِه جَلال هَدَه، هَمونیکه شما اونِه تَسلیم هَکوردین و پیلاتُسِ فرماندارِ وَرجه اونِه حَشا هَکوردین، هر چَن پیلاتُسِ نَظر این با که اونِه آزاد هَکونِه. 14 وَلی شما اون صالِح و قُدّوسِ رَد هَکوردین و بِخَسّین اونه عوَض ایتا قاتِل آزاد هَبو. 15 شما زندگی یه سَر چِشمِه رِه بَکوشتین، وَلی خدا اونِه مُردِگانِ جی زندِه هَکردِه و اَما اینه شاهِدیم. 16 عیسی یه اِسمِ ایمانِ خاطِری، اونِه اِسم، این مَردای رِه قُوَّت هَدَه، کسی که دینین و اِشناسِنین رِه، وَ اون ایمانِی که اونه تَوَسطِ، این مَردای رِه شما هَمه یه وَر کامِلاً شفا هَدَه. 17 «وَ اَسه اِی آداشان، دانَم که شما و شِیمی قومِ گَتِه یه رَفتار، نادانی یه جی با. 18 وَلی خدا این راهِ جی اونچه رِه که تمام پِیغمبَران زَبانِ جی پیشگویی هَکُرده با که اونه مسیح زَجر کَشِنِه رِه، اَنجام هَدَه. 19 پَس توبِه هَکُنین و خُدای سَمت وَگِردین تا شِیمی گُناهان پاک هَبو و خداوند حضورِ جی شیمی وَسین وَختایی بیِه که شِمِرِه تازِگی هَدِه. 20 وَ تا خدا، هَمون مسیحِ موعود یعنی عیسی که پیشتَر شیمی وَسین اِنتخاب هَبوسِّه با رِه، روانه هَکونه، 21 که آسِمان بایِسّی اونِه قَبول هَکونِه تا روزایی که هَمه چی طبقِ اونچه که خدا قدیم جی تمام خودِشِه مُقَدَّسِ پِیغَمبَرانِ زَبانِ جی باگوتِه، هَبو. 22 موسی یه پیغمبر باگوته: ”خداوند، شِیمی خدا، شِیمی اَداشان میِن، ایتا پِیغمبَر می مِثان شِمِرِه روانه کانه، بایِسّی اونچه که اون شِمِرِه گونِه رِه گوش هَدین. 23 هر کی اون پِیغمبَرِ گوش نَدِه، قومِ میَنِ جی نابود بونِه.“ 24 «تمام پِیغَمبَران هَم، سَموئیلِ جی به بعد، هَمه یک صِدا این روزانِ بارِه پِشگویی هَکُردَن. 25 وَ شما پِیغَمبَرانِ وَچِهانید. اون عهدِ وَچِهان که خدا شِیمی پیرانِ هَمرهَ دَبِسِّه. خدا اِبراهیمِ باگوتِه: ”تی نَسل ِجی تمام زَمین ِطایفِه شان بَرکَت گیرِنِن.“ 26 وَختِی که خدا خودِشِه خادِم عیسی رِه اِنتخاب هَکردِه، اَوَّل اونِه شِیمی وَرجه روانه هَکوردِه تا شیمی جی هرکُدام رِه شِیمی گناهانِ راهانِ جی وَگِردانه و شِمِرِه بَرکت هَدِه.» |
@ 2024 Korpu Company