اعمال رَسولان 28 - گیله ماز

مالتِ جَزیرِه

¹ وَختِی سَلامتی یه هَمرهَ دریاکنار بَرِسییَم، بِفَهمِسّیم اون جزیره یه اِسم مالتِ.

² اون جزیره یه مَردم اَمَرِه خیلی محبت هَکُردَن. اوشان اَمِرِه تَش روشِن هَکُردَن، چون وارِش وارِسِّه و هَوا سرد با، وَ اَمِی جی گرمی یه هَمرهَ پذیرایی هَکُردَن.

³ پولُس یِمقدار هیمِه جَم هَکردِه و وَختِی اونِه تَشِ سَر نَنِه با، تَشِ گرمی یه وَسین، ایتا مار اونه جی دِرگا بوما و اونِه دَس کَش بَچِسبِسِّه.

⁴ اون جزیره یه مَردم وَختِی بَدییَن که مار اونِه دَس جی آویزانِه، هَمدیگر باگوتِن: «بی شَک این مَردای قاتلِ، هر چَن دَریای جی نِجات بَیتِه، عِدالَت نُزارنه زندِه بُمانِه.»

⁵ وَلی پولُس مارِ تَشِ میَن تُووادَه و خودِش هیچی نَبا.

⁶ مَردم اِنتِظار داشتِن اونِه تَن وَرَم هَکونِه یا اینکه یدَفه بَکِّه و بَمیرِه. وَلی بعدِ اینکه خیلی اِنتظار بَکِشیَن، وَختِی بَدییَن اونِه هیچی نَبا، اوشانِ فِکر عَوض هَبا و باگوتِن اون ایتا از خدایِانِ.

⁷ اون نَزیکی زَمینایی دَبا که جزیره یه رَئیسِ شی با که اونِه اِسم پوبلیوس با. اون اَمَرِه خودِشِه سِرِه دَعوَت هَکردِه و سِه روز اَمِی جی گرمی یه هَمرهَ پَذیرایی هَکردِه.

⁸ اَز قضا، پوبلیوسِ پیَر مَریض با و تَو و اِسهال داشتِه. پولُس اونِه وَر بَشَه و دُعا هَکردِه، خودِشِه دَسِ اونِه سَر بَنَه و اونِه شَفا هَدَه.

⁹ بعدِ این اِتِفاق، بَقیِه مَریضان که جزیره یه دِلِه دَبان، هَنِه بان و شَفا گیرنِه بان.

¹⁰ اوشان اَمَرِه خِیلی احترام بَنَن، وَ وَختِی خَسّیم اوجِه یه جی بیشیم، هر چی که لازم داشتیم رِه کَشتی یه دِلِه اَمِی وَسین بَنَن.

پولُس رومِ دِلِه

¹¹ بعدِ سِه ماه، اون کَشتی یه هَمرهَ که زِمِسّان جزیره یه دِلِه بُمانِسّه با، دَریای دِلِه راهی هَبَیم. اون کَشتی اسکندریه یه جی با و ”خدایانِ دوقولویه“ نِشانه رِه داشتِه.

¹² به سیراکوز بَرِسییَم، لَعبَر توُوادَیم و سِه روز اوجِه بُمانِسِّیم.

¹³ ایما دَریایی سَفَرِ اِدامِه هَدَیم و به ریگیونِ شَهر بَرِسییَم. فردَئی، جِنوبی وا شِروع هَبا، وَ پس فَردَیی به پوتیوُلی یه شَهر بَرِسییَم.

¹⁴ اَما چَن تا اَداش اوجِه پیدا هکوردیم که اَمِی جی دَعوَت هَکُردَن هفت روز اوشانِ هَمرهَ بُمانیم. سَرآخَر به رومِ شهر بَرِسییَم.

¹⁵ اوجِه یه آداشان وَختِی بِشنَوِسِّه بان که راهِ دِلِه دَریم، تا آپیوس و ’سِه میخِانه یه‘ بازارِ دِلِه بومَن تا اَمِی پِشواز بیئِن. پولُس وَختِی اوشانِه بَدییِه خدا رِه شُکر هَکردِه و اونِه دِل قُوَّت بِیتِه.

¹⁶ وَختِی به رومِ بَرِسییَم، پولُسِ اِجازه هَدَن ایتا سَربازِ مُحافِظِ هَمرهَ خودِشِه سِرِه یه دِلِه بُمانِه.

¹⁷ بَعدِ سِه روز، پولُس یهودِ گَتِه شان رِه خودِشِه وَر دُخوانِسِّه. وَختِی جَم هَبان، اوشانِه باگوتِه: «اِی آداشان، با اونکه مَن کاری عَلیِه می قوم یا می پیَرانِ رَسم و رُسوم نَکُردِه بام، مَرِه اورشلیمِ دِلِه دَسگیر هَکُردَن و رومیانِ تَحویل هَدَن.

¹⁸ اوشان میجی بازخواس هَکُردَن و خَسَّن مَرِه آزاد هَکُنَن، چون می دِلِه جُرمی نَدییَن که اونِه سِزا مرگ هَبو.

¹⁹ وَلی وَختِی یَهودیِان اعتراض هَکُردَن، مجبور هَبام امپراطورِ جی رسیدگی بِخوام، البتِه نه تا می قومِ جی شکایت هَکُردِ بوم.

²⁰ اینه وَسین بِخَسَّم شِمِرِه بِینَم و شِیمی هَمرهَ گَب بَزِنِم، چون اون اسرائیلِ امیدِ خاطری یِه که مَرِه این زنجیلِ هَمرهَ دَبِسَّن.»

²¹ اوشان پولُسِ جِواب باگوتِن: «اَما هیچ نامه‌ایی تی بارِه یهودیه یه جی نِیتِیم، وَ هیچکِدام اَز اَداشانی که اوجِه یه جی بومَن، هیچ بَدِ چی ایی تی بارِه نَگوتَن و خَبَری نَدَن.

²² وَلی خَنیم تی نظراتِ بِشنُئیم، چون دانَم که مَردم این فِرقِه علیِه هَمه جا گَب زَنِن.»

²³ پَس اوشان ایتا روز تَعیین هَکُردَن و خِیلی آدَمان پولُسِ سِرِه بومَن تا اونِه بَینِن. اون صُب تا شُو، خُدای پادشاهی یه بارِه اوشانِ وَسین شهادت دَنِه با. وَ تَقَلّا کانِه با موسایه تورات و پِیغَمبَرانِ نِوِشتِه های هَمرهَ، عیسی یه بارِه اوشانه قانع هَکونِه.

²⁴ بَعضیان اونِه گَب قبول هَکُردَن، وَلی بَقیِه ایمان نیاردِن.

²⁵ پَس همونجور که هَمدیگَرِ هَمرهَ جَرّ و بَحث کِانِه بان، اوجِه یه جی بَشَن. وَلی پیش اَز اونکه اوجِه یه جی بوشون، پولُس خودِشِه آخَرین گَبِ بَزه و باگوتِه: «روح القُدُس چَنّی خوب شِیمی پیَرانِ هَمرهَ گَب بَزه، اون موقِه که توَسطِ اِشعیایه پِیغَمبَر باگوتِه:

²⁶ «‌”این قومِ وَر بوشو و باگو، ’راس راسی شیمی گوشِ هَمرهَ اِشنَوِنِین، وَلی هیچ وَخت نِفَهمِنِین؛ راس راسی شیمی چِشمِ هَمرهَ دینین، وَلی هیچ وَخت دَرک نُکانین.‘

²⁷ چون این قومِ دِل سنگ هَبا، اوِشانِ گوش سنگین هَبا، وَ خودشانِه چِشمِ دَبِسَّن، نَکُنِه خوشانِه چِشمِ هَمرهَ بَینِن، وَ خودشانِه گوشِ هَمرهَ بِشنُئِن، وَ خودشانِه دِلِ میَن بِفهمِن و وَگِردَن و مَن اوشانِه شَفا هَدَم.“

²⁸ «پَس بِدانین که خُدای نِجات غیرِ یهودیِان وَر بَرِساندِه هَبا و اوشان گوش دَنِن!»

²⁹ بعدِ اونکه پولُس اینه باگوتِه، یَهودیِان هَمونجور که هَمدیگَرِ هَمرهَ جَرّ و بَحث کِانِه بان، اوجه یه جی بَشَن.

³⁰ اینجوری پولُس دو سال تَمام خودِشِه سِرِه یه دِلِه که اِجارِه هَکُردِه با دَبا و هَر کی که اونِه وَر هَنِه با رِه، قبول کانِه با.

³¹ پولُس خُدای پادشاهی رِه اِعلام کانِه با و تمام جُرأتِ هَمرهَ و بِدون اینکه کسی اونِه جلوه هَگیره خداوند عیسی یه مَسیحِ بارِه تَعلیم دَنِه با.