اعمال رَسولان 26 - گیله مازپولُسِ دِفاع آگریپاسی وَر 1 آگْریپاس پولُسِ باگوتِه: «اِجازه داری تی جی دِفاع هَکُنی.» ایما پولُس خودِشِه دَسِ پِیش بَبِردِه و خودِشه جی اینجور دِفاع هَکردِه: 2 «اِی آگْریپاس پادشاه، چِقدر خُش شانسِم که امروز شِیمی پِیش هیسَم، تا تمام یَهودیِان شِکایَتِ پِیش می جی دِفاع هَکُنَم. 3 خصوصاً اینکه دانَم شما یَهودِ رَسم و رُسوم و اوشانِ میَن اِختلافانِ جی کامِلاً آشنایی. اَسه خَواهِش کانَم صبرِ هَمرهَ می گَبِ گوش هَدین. 4 «تمام یَهودیِان می زندگی رِه جَوانی جی دانَن، هَمون اَوَّل جی که می قومِ مین و اورشلیمِ دِلِه زندگی کانِه بام. 5 اوشان قَدیم جی خَبَر دارِن و اَگه بخوان، تانَن شهادت هَدَن که مَن بعنوانِ ایتا فَریسی، می دینِ سَخت گیرتَرین فِرقِه یه جی پیرَوی کانِه بام. 6 وَ امروز اون امیدِ خاطری که خدا اَمِی پیرانِ وَعدِه هَدَه با، مُحاکِمِه بونَم. 7 این هَمون وَعدِه ایی یه که اَمِی دوازده تا قبیله اُمید داشتِن که اونِه بِدَس بیارِن. اینه وَسین خودِشانِه دِلِ جی شُو و روز دُعا کِانِه بان تا اونِه بَرِسِن. آرِه، اِی پادشاه، یَهودیان هَمین اُمیدِ خاطری یه که مَرِه متَهم کانَن. 8 چِرا شِیمی نظر، اینکه خدا مردِگانِ زندِه کانِه اینقدر عجیب غَریب هَنِه؟ 9 «می باوَر هم این با که عیسی یه ناصری یه اِسم علیه هَر کاری که می دَس بَر هَنِه رِه هَکُنَم. 10 وَ این هَمون کاری با که اورشلیمِ دِلِه هَکُردَم. مَن گَتِه کاهِنانِ جی مُجَوِز گیرنه بام و مقدّسینِ زیادی رِه زندانِ دِلِه تُووادِنه بام، وَ وَختِی مرگِ وَسین محکوم بونه بان، اوشانِ علیه رأی دَنهِ بام. 11 خیلی وَختان اوشانِ مجازاتِ وَسین، عِبادَتگاهانِ دِلِه شونه بام و تَقَلّا کانِه بام و اوشانِه مَجبور کانِه بام کُفر باگون. می خَشم اینقدر با که حتّی تا غریبه شانه شَهران هم اوشانِه تَعقیب کانِه بام. 12 «ایتا اَز این سَفرانِ دِلِه، اون حکم و اختیارِ کامل هَمرهَ که گَتِه کاهِنانِ جی بَیتِم، دَمشقِ شهرِ سَمت راهی هَبام. 13 ظُهر موقِه، اِی پادشاه، راه دِلِه ایتا نور خُرشیدِ نورِ جی روشنتَر آسِمانِ جی مَن و می هَمراهانِ دُور بتابِسِّه. 14 همه زَمین سَربَکِتیم، وَ مَن ایتا صِدا بِشنَوِسَّم که عبرانیِانِ زَبانِ هَمرهَ مَرِه باگوتِه: ”شائول، شائول، چِرا مَرِه عذاب دَنی؟ مِیخِشانِه لَگَد هَکُردَن تِرِه سَختِه، فقط تِرِه اَذیت کانی!“ 15 «بَپرسیمِ: ”خُداوندا، تو کی هیسی؟“ «خُداوَند باگوتِه: ”من هَمون عیسی هیسَم که تو اونِه آزار رساندنی. 16 وَرِس و تی لِنگِ سَر بییَس. مَن اینه وَسین تِرِه ظاهر هَبام تا تِرِه می خادِم و می شاهِد هَکُنَم، تا اونچه یه دِلِه که مَرِه بدییَی و اونچه یه دِلِه تِرِه ظاهِر بونَم، شهادت هَدی. 17 مَن تِرِه تی قوم و غیرِ یَهودِیانِ دَس جی، که تِرِه اوشانِ وَر روانه کانَم نِجات دَنَم 18 تا اوشانِ چِشمِ واز هَکُنی، جوریکه تاریکی یه جی نورِ سَمت، وَ شیطانِ قُدرَتِ جی خُدای سَمت وَگِردَن، تا اوشانِ گُناهان آمُرزیدِه هَبو، وَ اون ایمانِ خاطری که مَرِه دارِن مُقَدَّسینِ بَرَکاتِ دِلِه سهمی بِدارِن.“ 19 «پَس اون موقِه، اِی آگْریپاسِ پادشاه، مَن آسِمانِ رؤیای جی که می وَسین بوما سَرپیچی نَکُردَم. 20 بَلکِه اَوَل دَمشقیانِ میَن، ایما اورشلیم و تمام یَهودیِه منطقه یه دِلِه، وَ غیرِ یهودیِان میَن هَم این پِیغامِ اعلام هَکُردَم که بایسّی توبِه هَکُنَن و خُدای سَمت وَگِردن و خودشانِه عَملِ هَمرهَ نِشان هَدن که واقِعاً توبِه هَکُردَن. 21 اینه وَسین با که یهودیِان مَرِه معبدِ دِلِه دَسگیر هَکُردَن و خَسَّن مَرِه بَکوشَن. 22 وَلی تا امروز، خدا مَرِه کُمَک هَکردِه و اَلان ایجِه ایسَم و هَمِه یه وَسین، اَز گَت تا کوچیک، شهادت دَنَم. اونچه گونَم هیچی نیِه بِجُز اونچه پِیغَمبَران و موسی یه پیغمبر باگوتَن که باید اِتِفاق دَکِه: 23 اینکه مَسیح بایسّی رَنج بِینِه و اوّلین نَفَری هَبو که مُردِگانِ جی زندِه بونِه، تا روشِنایی رِه هم اَمِی قوم و هم دیگَر قوما ن رِه اِعلام هَکونِه.» 24 وَختِی پولُس این گَبانِ هَمرهَ خودِشه جی دِفاع کانِه با، فِستوس داد بَزه: «پولُس، تو تی عَقلِ بُخاردی! عِلم زیادی، تِرِه خُل هَکردِه.» 25 ولی پولُس جِواب هَدَه: «عالیجناب فِستوس، مَن خُل نییَم، بَلکِه عقلِ هَمرهَ حَقیقَتِ گونَم. 26 پادشاه خودِش این کارِ جی خَبَر داره و مَنَم واضِح اوشانِ هَمرهَ گَب زَنَم، چون باوَر دارمِ هیچکِدام اَز ایشان اوشانِ نظرِ جی دور نیِه، چون چیزی نَبا که خَلوَتِ دِلِه یَواشکی اِتِفاق دَکِت بو. 27 اِی آگْریپاس پادشاه، تو پِیغَمبَرانِ اعتقاد داری؟ دانَم که داری.» 28 آگْریپاس پولُسِ باگوتِه: «اینقدر زود خَنی مَرِه قانع هَکُنی مسیحی هَبوم؟» 29 پولُس اونِه جَواب باگوتِه: «خُدای جی خَنَم که دیر یا زود، نه فقط شما، بَلکِه تمام کَسایی که امروز می گَبِ اِشنَوِنَن، می مِثان هَبون، البته نه زنجیلِ دِلِه!» 30 ایما پادشاه وَرِسَه و اونِه هَمرهَ فرماندار و بِرنیکی و بقیه مجلسیان هَم وَرِسَن، 31 وَ وَختِی دَبان گَب زَنِه بان دِرگا بَشَن، هَمدیگر گونه بان: «این مَردای کاری که بَمِردَن یا زندان مستَحق هَبو نَکُردِه.» 32 آگْریپاس فِستوسِ باگوتِه: «اَگه این مَردای نَخَسِّه بو اونِه قضیِه امپراطورِ جی رسیدگی هَبو، اَلان هَم بونِه با اونِه آزاد هَکُردَن.» |
@ 2024 Korpu Company