اعمال رَسولان 24 - گیله ماز

پولس محاکمه فِلیکْسی وَر

¹ بَعدِ پَنج روز، کاهِن اعظم حَنانیا، چَن نفر اَز مَشایِخ و ایتا وَکیلِ هَمرهَ که اونِه اِسم تِرتولُس با به قیصریه بومَن. اوشان خودِشانِه شِکایتِ پولُس عَلیه، فَرماندارِ پِیش بَبِردَن.

² وَختِی پولُسِ احضار هَکُردَن، تِرتولُس، پولُسِ مُتهَم هَکردِه و باگوتِه: «عالیجناب فِلیکس، چون خِیلی وَخت شِیمی سایِه یه جیر صلح و آرامِش داریم و شِیمی پیشبینی باعِث هَبا این قومِ وَضع خُجیرتَر هَبو،

³ اَمی وَظیفِه دانیم هر وَخت و هر جا، شِیمی جی قدردانی هَکنیم.

⁴ وَلی اینه وَسین که شِیمی وَختِ بیشتَر نَگیریم، خَواهِش کانیم لُطف هَکُنی و یِکَم اَمِی گَبِ بِشنُئی.

⁵ «اَمِرِه ثابت هَبا که این مَردای، آدَمی یِه که فِتنِه تُووادِنِه و تمام دنیای یَهودیِان میَن آشوب به پا کانِه. هَمینجورَم ناصری یه فِرقه یه سَردَسِّیِه.

⁶ وَ این آدم حتّی تَقَلّا هَکُردِه مَعبدِ بی‌حرمت هَکونِه؛ ولی اَما اونِه دَسگیر هَکردیم. وَ خَسّیم طِبق اَمی شریعَت اونِه محاکمه هَکنیم

⁷ وَلی لیسیاسِ فرماندِه بوما و اونِه بِزور اَمِی دَسِ جیر دِرگا بیاردِه،

⁸ وَ اونِه شاکیِان دَستور هَدَه تا شِیمی وَر بیَئن. اَسه اَگه شما اونه جی بازخواس هَکُنین، هر اونچه ایی حقیقَتِ که اونِه متَهم کانیم، شِمِرِه آشکار بونِه.»

⁹ یَهودیان هَم یکصدا تمام این چیزان رِه تأیید هَکُردَن.

¹⁰ وَختِی فرماندار پولُسِ اِشارِه هَکردِه که گَب بَزِنِه، اون اینجور جَواب هَدَه: «دانَم خِیلی سالِ که این قومِ داوَری کانی؛ پَس خوشحالی یه هَمرهَ، می جی دِفاع کانَم.

¹¹ شما خودِتان تانید تحقیق هَکُنین و بِفَهمین اون موقه یه جی که مَن عِبادَتِ وَسِین به اورشَلیمِ بَشَم، دَوازده روز بیشتَر نُگذَرنِه،

¹² وَ این مدّت دِلِه، نَدییَن مَن هیچکسِ هَمرهَ مَعبَدِ دِلِه جَرّ و بَحث هَکُنَم یا اینکه عِبادَتگاها یا شَهرِ دِلِه، مَردمِ آنتِریک هَکُنَم.

¹³ اوشان نَتّنَن اِتهامایی که مَرِه زَنَن رِه ثابت هَکُنَن.

¹⁴ وَلی شِیمی وَر اعتراف کانَم که طبق طریقت که اوشان اونِه ایتا فِرقِه دانَن، می پیَرانِ خدا رِه پَرَسِّش کانَم و هر اونچه هم که تورات و پیغَمبَران نِوشتِه یه دِلِه بَنویشته هَبا رِه، اعتقاد دارم.

¹⁵ وَ مَن هم اوشان مِثان خدا رِه اُمید دارم و اعتقاد دارم خُجیرِه آدَمان و بَدِ آدَمانِ وَسین زندِه هَبوسَّن دَرکارِه. دُرس این آدَمان مِثان که قبول دارِن.

¹⁶ اینه وَسین، خِیلی تَقَلّا کانَم تا خدا و مَردُمِ وَر پاکِ وجدانِ هَمرهَ زندگی هَکُنَم.

¹⁷ «مَن بعدِ چَن سال، به اورشَلیمِ بَشَم تا می قومِ وَسین صدَقِه بَبِرَم و هَدایا تقدیم هَکُنَم.

¹⁸ وقتیکه دَبام اینه بِجا بیارَم مَرِه موقِه ایی که پاک بام، مَعبدِ دِلِه پیدا هَکوردَن. نه جَماعتی دَر کار با و نه بَلوایی با.

¹⁹ وَلی اوجِه چَن تا یَهودی آسیای مَنطقه یه جی دَبان که بایِسّی ایجِه شِیمی پِیش حاضِر بونه بان تا اَگه می عَلیه شکایتی دارِن، باگون.

²⁰ وَ یا اینکه اوشانیکه ایجِه دَرِن، باگون وَختِی که شورای پیش ایسَه بام، می دِلِه چه جُرمی پیدا هَکوردَن،

²¹ بِجُز اینکه اوشانِ میَن بلَندِ صدای هَمرهَ باگوتَم: ”مردِگان زندِه هَبوسَّنِ خاطری یِه که امروز شِیمی وَر مُحاکِمِه بونَم»

²² ایما فِلیکْس که طریقَتِ خِیلی خوب شِناسِنِه با، محاکمِه رِه یه وَخت دیگَر بَنِه و باگوتِه: «وَختِی فرمانده لیسیاس بیِه، اون موقِه شِیمی شکایت وَسین تصمیم گیرنَم.»

²³ ایما اَفسَری که مَسئول با رِه دستور هَدَه تا پولُس رِه بِپّائِه، وَلی یِکَم آزادی هم اونِه هَدِه و اونِه جِلوه نَگیره که اونِه آشنایان اونِه احتیاجاتِ برطرف هَکُنَن.

²⁴ چَن روز دیگَه، فِلیکْس خودِشِه زِنا دْروسیلای هَمرهَ که یَهودی با، بوما و پولُسِ دُمّال روانه هَکوردِه، اون پولُسِ گَبِ که عیسی یه مسیحِ ایمان خبری با رِه گوش هَدَه.

²⁵ وَختِی پولُس، صالِح هَبوسَّن و پرهیزگاری و آینده یه داوری جی گَب میَن بیاردِه، فِلیکْس هَراسان هَبا و باگوتِه: «فعلاً بَسِّه! تانی بیشی. باز یِدَفِه دیگَه تِرِه می وَر دُخواندِنَم.»

²⁶ علاوِه بر این، اُمید داشتِه پولُس اونِه رِشوِه هَدِه. اینه وَسین، چَن دَفِه اونِه احضار هَکوردِه و اونِه هَمرهَ گَب زَنِه با.

²⁷ دو سال دیگَه، پورکیوس فِستوس، فِلیکْسِ جانِشین هَبا. وَلی فِلیکْس، اینه وَسین که یَهودیِان سَر مِنَّت بَنِه، پولُسِ هَمونجور زندان دِلِه داشتِه.