اعمال رَسولان 23 - گیله ماز1 پولُس شورای اعضا رِه بِیشیِه و باگوتِه: «اَداشان، مَن تا امروز وِجدانِ پاکِ هَمرهَ خُدای حُضور زندگی هَکُردَم.» 2 وَختِی اینه باگوتِه، کاهِن اعظم، حَنانیا، اوشانیکه پولُسِ ور هیسَا بان رِه، دَستور هَدَه تا اونِه تُک سَرِ بَزِنِن. 3 پولُس حَنانیا رِه باگوتِه: «خدا تِرِه زَنِه، اِی اِسبی هَبا دیوار! تو اون تَختِ سَر نیشتی تا طِبق شریعَت مَرِه محاکمِه هَکُنی، وَلی تو بَرخَلافِ شریعَت، دَستور دَنی مَرِه بَزِنِن؟» 4 اوشانیکه پولُسِ وَر ایسَبان، باگوتِن: «خُدای کاهنِ اعظمِ بی حِرمتی کانی؟» 5 پولُس باگوتِه: «اِی آداشان، مَن نِدانِسَّم کاهِنِ اعظمِ؛ چون توراتِ دِلِه بَنوِشت هَبا: ”تی قومِ رَهبَرِ بَد نُگو.“ 6 ایما پولُس که دانِسِّه بعضی از اوشان عُلَمای فِرقه صَدّوقی و بعضیان عُلَمای فِرقِه فریسین، شورای دِلِه بلَندِ صِدای هَمرهَ باگوتِه: «اِی آداشان، مَن فَریسی و فَریسی زاده اَم، اینه خاطِری که مُردِگان زندِه هَبوسَّنِ امید دارم، دَرَم محاکمِه هَبوم.» 7 وَختِی پولُس اینه باگوتِه، فَریسیِان و صَدوقیِان میَن جَرّ و بَحث دَکِتِه و جَماعت دو دَسِّه هَبان، 8 چون صَدوقیِان مُردِگانِ زندِه هَبوسَّن و فِرشتِه و روحِ اعتقاد نِدارَن، وَلی فَریسیِان تمام ایشانِ اعتقاد دارِن. 9 ایتا گَتِه بَلبَشو هَبا! بَعضی اَز توراتِ مُعَلِمین که فَریسی بان، وَرِسَن و بدجور اعتراض هَکُردَن و باگوتِن: «این مَردایِ دِلِه هیچ خَطایی نَینیم. اَز کوجِه معلوم که ایتا روح یا فِرِشتِه اونِه هَمرهَ گَب نَزَه بو.» 10 دَعوا جوری بالا بِیتِه که فرماندِه بَترسیِه نَکُنِه پولُسِ تیکه پارِه هَکُنَن. پَس سَربازانِ دَستور هَدَه جیر بوشون و پولُسِ اوشانِ چَنگِ جی دَر بیارِن، وَ قلعه یه دِلِه بَبِرَن. 11 هَمون شُو، خُداوَند پولُسِ وَر بیِسَا و باگوتِه: «تی دِل قُرص هَبو! هَمونجور که اورشلیمِ دِلِه مَرِه شَهادَت هَدَیی، رومِ دِلِه هَم بایسّی شَهادَت هَدی.» پولُسِ بَکوشتَن دَسیسِه 12 وَختِی صُب هَبا، یهَودیِان هَمدیگَرِ هَمرهَ دَسیسِه دَچین، قَسَم بُخاردِن تا پولُسِ نَکوشِن، هیچی نُخارَن و هیچی نَنوشِن. 13 این دَسیسِه دِلِه بیشتَر از چِهل نَفر دَس داشتِن. 14 اوشان گَتِه کاهِنان و مَشایِخِ وَر بَشَن و باگوتِن: «اَما قَسَم بُخاردِیم تا پولُسِ نَکوشیم، هیچی نُخاریم. 15 پس اَسه شما و شورای اعضا، رومی فَرماندِه یه جی بِخواین اونِه شِیمی وَرجه بیارِه، این بَهونِه یه هَمرهَ که خَنین دقیقتر اونِه قضیِه رِه بَررِسی هَکُنین. اَما آماده ایم پِیش اَز اینکه ایجه بَرِسِه اونِه بَکوشیم.» 16 وَلی پولُسِ خاخورزا این دَسیسِه یه جی خَبَردار هَبا و به قَلعه بَشَه و پولُسِ خبردار هَکردِه. 17 پولُس ایتا از اَفسران دُخواندِه و باگوتِه: «این جَوانِ فرماندِه یه وَرجه بَبِر، چون اونه وَسین ایتا خَبَر داره.» 18 پس اَفسَر اونِه فرمانده یه وَرجه بَبِردِه و اونِه باگوتِه: «پولُسِ زندانی مَرِه دُخواندِه و میجی بِخَسِّه این جَوانِ شِیمی وَرجه بیارِم؛ خَنِه شِمِرِه یِچی باگو.» 19 فرماندِه اون جَوان دَسِ بِیتِه، اونِه ایتا گوشِه بَکِشیِه و بَپُرسیِه: «چی خَنی مَرِه باگویی؟» 20 پولُسِ خاخورزا باگوتِه: «یَهودیِان هَمدَس هَبان شِیمی جی بِخوان که فَردا پولُسِ شورایه وَر بَبِرین، این بَهانِه یه هَمرهَ که خَنِن دقیقتر اونِه قضیِه رِه بَررِسی هَکُنَن. 21 اوشانِ دَرخواسِ قبول نَکُنین، چون بیشتَر اَز چِهل نَفَر اونِه کَمین نیشتِن. اوشان قَسَم بُخاردِن تا اونِه نَکوشِن، هیچی نُخارِن و نَنوشِن. اَسه آمادِئَن، وَ فقط منتَظِرن شما اوشانِ دَرخواسِ قَبول هَکُنین.» 22 فرماندِه، جَوانِ مرخَص هَکردِه و اونِه قَدِغَن هَکردِه، باگوتِه: «هیچکَسِ نُگو این چیزان رِه مَرِه خَبَر هَدَیی.» پولُسِ به قیصریه روانه کانَن 23 پس فرماندِه دو نَفَر اَز خودِشِه اَفسَرانِ خودِشِه وَر دُخوانِسِّه و اوشانِه باگوتِه: «دویست تا پیادِه سَرباز، هَفتاد تا سوارِه سَرباز و دویست تا نِیزه دارِ آمادِه هَکُنین تا اِمشو ساعتِ نُه به قیصریه بوشون. 24 پولُسِ وَسین هَم ایتا اَسب فَراهَم هَکُنین و اونه صحیح و سالم فِلیکْسِ فَرماندارِ تَحویل هَدین.» 25 ایتا نامِه هَم، اینجوری بَنویشتِه: 26 «ا کْلودیوس لیسیاسِ جی بِه عالیجناب فِلیکْسِ فرماندار: سَلام، 27 یَهودیِان این مَردای رِه بِیتَن، خَسَّن اونِه بَکوشَن، وَلی مَن می سَربازان هَمرهَ بَشَم اونِه نِجات هَدَم، چون بِشنَوِسِّه بام رومِ تابعیَتِ رِه داره. 28 چون خَسَّم بِدانَم چیه وَسین اونِه اِتِهام زَنِن، اونِه اوشانِ شورای وَر بَبِردَم. 29 بِفَهمِسَّم اونِه اِتهام مربوط بِه خودِشانِه شریعتِ و اونِه جُرم اینقدر نیِه که اون سِزا مرگ یا حَبس هَبو. 30 ایما وَختِی خَبَردار هَبام اونه عَلیه دَسیسِه دَچیَن، دَرجا اونِه شِیمی وَر روانه هَکوردَم. اونِه شاکیِان رِه هَم دستور هَدَم تا شکایَتی که اونه جی دارِن رِه، شِیمی وَر بیارِن.» 31 اینجوری، سَربازان طِبق دستور، پولُسِ شَبانِه خودِشانِه هَمرهَ به آنتیپاتْریس شهر بَبِردَن. 32 فردَئی، پیادِه سَربازان به قلعه وَگِرِسَّن، فقط سوارِه سَربازان اونِه هَمراهی کِانِه بان. 33 وَختِی سواره سَربازان به قیصریه شهر بَرِسیَن، اون نامِه رِه فَرماندارِ تَحویل هَدَئن و پولُس رِه هم اونِه وَر بیاردِن. 34 فَرماندار نامِه رِه بُخوانِسِّه و پولُسِ جی بَپُرسیِه کوجه یه جی هیسی. وَختِی بِفَهمِسِّه کیلیکیه یه مَنطَقه یه جییِه، 35 اونِه باگوتِه: «وَختِی تی شاکیِان ایجِه بَرِسییَن، تی گَبِ گوش دَنَم.» ایما دَستور هَدَه تا پولُسِ هیرودیسِ کاخِ دِلِه بِدارَن و اونه بِپّائَن. |
@ 2024 Korpu Company