اعمال رَسولان 21 - گیله ماز

پولس به اورشلیمِ شونه

¹ بعد اَز اینکه اوشانِ جی سیفا هَبَیم، دریای جی سَفرِ وَسین راهی هَبَیم و مستَقیم تا ’کوس‘ جزیره یه سَمت پیش بَشَیم. فردای اون روز، به جزیره رودِس بَرِسییَیم و اوجِه یه جی به پاتارای بَندرِ بَشَیم.

² اوجِه ایتا کشتی پیدا هکوردیم که دَبا بوشو فینیقیه. اونِه سَوار هَبَیم و راه دَکِتِیم.

³ قبرسِ اَمی چَپِ وَر بَدییَیم و اوجِه یه جی بُگذشتِیم، سوریه یه سَمت رادَکِتِیم. ایما صورِ دِلِه پیادِه هَبَیم، چون بایِسّی اوجِه کَشتی یه بارِ خالی هَکونَن.

⁴ شاگِردانِ اوجِه پیدا هکوردیم، هفت روز اوشانِ وَرجه بُمانِسّیم. اوشان خُدای روحِ هِدایتِ هَمرهَ پولُسِ باگوتِن به اورشَلیمِ نَشو.

⁵ وَختِی اَمِی بُمانِسَّن فرصَت تَمام هَبا، سَفرِ وَسین راهی هَبَیم. تمام شاگِردِان خودِشانِه زِناکان و وَچِه هانه هَمرهَ اَمَرِه تا شهرِ دِرگا بَدرَقِه هَکُردَن. اوجِه دریاکنار زانو بَزَیم و دُعا هَکُردیم.

⁶ بعدِ اینکه خدافظی هَکُردیم، کَشتی رِه سَوار هَبَیم، وَ اوشان هَم خودِشانِه سِرِه وَگرِسَّن.

⁷ اَما اَمی دریایی سَفرِ صورِ بندرِ جی شروع هَکُردیم و به پْتولامائیس شهر بَرِسییَیم. اوجِه اَداشانِ جی دیدَن هَکُردیم و ایتا روز اوشانِ وَر بُمانِسِّیم.

⁸ فردَئی، اوجِه یه جی بَشَیم و به قیصریه شهر بومَیم. مُبَشر فیلیپُسِ سِرِه بَشَیم که ایتا اَزون هَفت نفری با که خِدمتِ وَسین انتخاب هَبا با، وَ اونِه وَرجه بُمانِسّیم.

⁹ فیلیپُس چهار تا اَذَب کیجا داشتِه که نَبوَّت کِانِه بان.

¹⁰ بعد چند روز که اوجِه دَبَییم، ایتا پِیغمبر که اونِه اِسم آگابوس با یَهودیه جی بَرِسیه.

¹¹ اون اَمِی وَرجه بوما و پولُسِ قیشِ بِیتِه، خودِشِه دَس و لِنگِ اونه هَمرهَ دَبِسِّه و باگوتِه: «روح القُدُس گونِه: ”اورشلیمِ یَهودیِان این قِیشِ صاحابِ اینجوری دَبِدِنِن و غیرِ یهودیِان دَس تَسلیم کانِن.“‌»

¹² وَختِی اینه بِشنَویسّیم، اَما و اوجِه یه مَردم پولُسِ اِلتماس هَکُردیم که به اورشلیمِ نَشو.

¹³ وَلی پولُس جواب هَدَه: «این چه کاریِه کانین؟ چِرا شیمی بِرمِه یه هَمرهَ می دِلِ اِشکِندِنین؟ مَن حاضِرم عیسی خُداوند اِسمِ خاطری نه فقط زِندان بوشوم، بَلکِه اورشلیمِ دِلِه بَمیرم.»

¹⁴ وَختِی بَدییَیم قانِع نَبونِه، دَس بَکِشییَیم و باگوتیم: «اونچه خداوند خَنِه، هَبو.»

¹⁵ بعدِ این روزا، سَفرِ وَسین تَدارک بَدییَیم و اورشلیمِ سمت رادَکِتِیم.

¹⁶ شاگردان جی بعضیان که قیصریه زندگی کِانِه بان هَم اَمِی هَمرهَ بومَن و اَمَرِه مِناسونِ سِرِه بَبِردَن تا اونِه مِهمان هَبیم. مِناسون، قبرس جی و ایتا اَز قَدیمی شاگردان با.

پولُس یَعقوبِ دینه

¹⁷ وَختِی اورشَلیم بَرِسییَم، آداشان خوشحالی یه هَمرهَ اَمِی پیشواز بومَن.

¹⁸ فردَئی پولُسِ هَمرهَ یعقوبِ بَدییَین وَسین بَشَیم. تمام مشایخ اوجه دَبان.

¹⁹ پولُس اوشانِه سَلام هَکردِه و اونچه که خدا اونِه خِدمتِ هَمرهَ غیر یهودیِان دِلِه هَکُرد با رِه ایتا ایتا توضیح هَدَه.

²⁰ اوشان وَختِی بِشنَوِسَّن، خدا رِه حمد و ثنا باگوتِن. ایما پولُسِ باگوتِن: «اِی اَداش، هَمونجور که دینی هِزاران یَهودی ایمان بیاردِن و همه شریعَتِ وَسین غیرت دارِن.

²¹ اوشانِ میِن اینجور شایع هَبا که تو تمام یَهودیِانی که غیرِ یهودیِان دِلِه زندگی کانَن رِه تَعلیم دَنی که موسی یه پیغمبرِ شَریعَتِ جی وَگِردِن، وَ اوشانِه گونی نباید خودِشانِه وَچِهان رِه خَتنِه هَکُنَن و طِبق رَسم و رُسوم رفتار هَکُنَن.

²² اَسه چه باید هَکُردَن؟ حتما، اوشان تی بَموئَنِ جی خَبَردار بونَن.

²³ پَس اونچه که تِرِه گونیم رِه هَکُن. ایجِه اَمِی وَر چهار تا مَردای دَرِن که نَذر دارِن.

²⁴ اوشانِه تی هَمرهَ بَبِر و اوِشانِ هَمرهَ تطهیرِ رَسم و رُسومِ بِجا بیار و اوشانِ خَرجِ هَدِه تا بَتَّنَن خودِشانِه سَرِ بِتراشَن. اینجوری هَمِه فَهمِنِن این چیزان که تی باره چو دَکِتِه راس نییِه، بَلکِه تو هَم شریعَتِ داری، وَ اونه دِلِه زندگی کانی.

²⁵ وَلی غیرِ یَهودی ایماندارنِ بارِه، اَما اَمی حکمِ ایتا نامِه یه دِلِه اوشانِ وَسین بَرِساندیم و باگوتیم که بایسّی بُتِشانه تَقدیم هَبا خُوراکی یه جی، خون جی، خَفِه هَبا حیوان گوشتِ جی، وَ زَنایه جی دوری هَکُنَن.»

²⁶ پس، فردای اون روز پولُس اون آدَمان رِه خودِشِه هَمرهَ بَبِردِه و اوشانِ هَمرهَ تطهیرِ رَسم و رُسومِ بِجا بیاردِه. ایما معبدِ دِلِه بَشَه تا تطهیر تاریخ تمام هَبوسَّنِ روزِ که اون دِلِه هر کدام از اوشانِ رَه قربانی پیشکش بونه با رِه اعلام هَکونه.

پولُسِ معبدِ دِلِه گیرِنِن

²⁷ چیزی نُمانِسِّه با تطهیرِ هفت روز تَمام هَبو که چَن یَهودی آسیای منطقه یه جی، پولُسِ مَعبدِ دِلِه بَدییَن. اوشان تمام جَماعتِ آنتریک هَکُردَن و اونِه بِیتَن،

²⁸ شول کَشِنِه بان: «اِی یَهودیِان، کمک هَکُنین؛ این هَمونِه که تمام مَردم رِه هَمِه جا اَمِی قوم و اَمِی شریعَت علیه و این مَکان علیه تعلیم دَنِه. پِیش از این یونانیِان رِه مَعبدِ دِلِه بیاردِه و این مقدَّس جا رِه نَجِس هَکردِه.»

²⁹ اوشان پِیش تَر تْروفیموسِ اَفِسُسی رِه شَهرِ دِلِه پولُسِ هَمرهَ بَدیه بان و خیال هَکُردَن پولُس اونِه مَعبدِ دِلِه بَبِردِه.

³⁰ تمام شَهر شلوغ هَبا! مَردم هر طرف جی هجوم بیاردِن و پولُسِ بِیتَن، مَعبدِ جی دِرگا بَکِشین و دَرجا مَعبدِ دَرِشانِ خودِشانِ دُمّالسَر دَبِسَّن.

³¹ وَ هَمونجور که خَسَّن اونِه بَکوشَن، رومِ سَربازان فرماندِه رِه خَبَر هَدَئن که تمام اورشلیمِ دِلِه آشوب هَبا.

³² اون فَرماندِه بِتیش خودِشِه سَربازان و اَفسَرانِ هَمرهَ جَماعتِ سمت بَشَه. وَختِی جَماعتِ چِشم فَرماندِه و اونِه سَربازانِ بخاردِه، پولُسِ بَزَئنِ جی دَس بَکِشییَن.

³³ فَرماندِه پِیش بوما و پولُسِ دَسگیر هَکردِه و دَستور هَدَه اونِه دو زنجیلِ هَمرهَ دَبِدَن. ایما بَپرسیِه که اون کیِه و چه هَکردِه.

³⁴ جَماعتِ میَن جی هر کی داد زَنِه با و یِچی گونِه با. فَرماندِه که اون همه سَر و صدای جی نَتَّنِسِّه حَقیقَتِ بِفَهمِه، دَستور هَدَه پولُسِ قلعه یه سَمت بَبِرَن.

³⁵ وَختِی پولُس قلعه یه پِلِّه یه نَزیکی بَرِسیِه، جَماعت اینقدر عصبانی بان که سَربازان مَجبور هَبان اونِه خودشانِه بالِ سَر بَبِرَن.

³⁶ جماعتی که اوشانِ دُمّالسَر هَنِه بان، داد زَنِه بان: «اونِه بَکوشین!»

پولُس مَردُمِ هَمرهَ گَب زَنِه

³⁷ هَلَه پولُس رِه قَلعه یه دِلِه نَبِردِه بان که فَرماندِه رِه باگوتِه: «اِجازه دَنی یِچی شِمِرِه باگوم؟» فَرماندِه باگوتِه: «تو یونانی بَلَدی؟

³⁸ مَگِه تو هَمون مِصری نییَیی که چَن وَخت پیش شورِش هَکردِه و چهار هِزار تا آدمکشِ خودِشِه هَمرهَ صَحرای دِلِه بَبِردِه؟»

³⁹ پولُس جِواب هَدَه: «مَن یَهودیمِ و کیلیکیه‌ تارسوسِ جی هیسَم، شَهری که بی‌نام و نِشان نیِه. خواهش کانَم اِجازه هَدین مَردُمِ هَمرهَ گَب بَزِنَم.»

⁴⁰ وَختِی فَرماندِه اِجازه هَدَه، پولُس پِلِّه‌ یه سَر بیِسَا و خودِشِه دَسِ مَردُمِ سَمت تِکان هَدَه، وَختِی همه جا کُلاً ساکِت هَبا، عبرانیانِ زَبانِ هَمرهَ اوشانِه اینجور باگوتِه: