اعمال رَسولان 20 - گیله ماز

پولُس به مقدونیه و یونان شونه

¹ وَختی بَلوا تَمام هَبا، پولُس شاگِردانِ خودِشِه وَرجه دُخوانِسِّه و بعدِ اینکه اوشانِه تَشویق هَکردِه، اوشانِ هَمرهَ خُدافِظی هَکردِه و مَقدونیِه یه منطقه یه سَمت رادَکِتِه.

² پولُس اون منطقه یه جی گذر هَکردِه، خودِشِه گَبِ هَمرهَ ایمانداران خِیلی دِلگَرمی هَدَه، تا به یونان بَرِسیَه.

³ پولُس سِه ماه اوجِه بُمانِسّه. موقِه ایی که خَسِّه کَشتی یه هَمرهَ به سوریِه بوشو، یَهودیِان اونه علیِه دَسیسِه هَکوردَن. پَس تَصمیم بِیتِه مَقدونیه یه راهِ جی وَگِردِه.

⁴ پولُسِ هَمراهِان ایشان بان: بیریه جی سوپاتِر پیروسِ ریکا، تِسالونیکی یه جی آریستارخوس و سِکوندوس، دِربِه جی گایوس و تیموتائوس، آسیای جی تیخیکوس و تْروفیموس.

⁵ اوشان پیش اَز اَما بَشَن و تْروآسِ دِلِه اَمِی اِنتظارِ کَشِنِه بان.

⁶ ولی اَما بعدِ فَطیر عید، کَشتی یه هَمرهَ فیلیپی یه شهرِ جی رادَکِتِم و بَعدِ پَنج روز، تْروآسِ دِلِه اوشانِه مُلحق هَبَیم و هفت روز اوجِه بُمانِسّیم.

پولُس تْروآسِ دِلِه

⁷ هَفته یه اوَّلین روزِ دِلِه، نان پارِه هَکُردَنِ وَسین جَم هَبَیم. پولُس مَردُمِ وَسین موعظه کانِه با، وَ چون تَصمیم داشتِه فردَئی اوجِه یه جی بوشو تا نِصفِ شُو خودِشِه گَبِ ادامِه هَدَه.

⁸ اون بالاخانه‌ یه دِلِه که جَم هَبَبِیم، خِیلی لَمپا روشِن با.

⁹ ایتا جَوان که اونِه اِسم اِفتیخوس با و آبِشکِه یه وَر نیشته با، موقِه ایی که پولُس هَلَه دَبا خودِشِه گَبِ ادامِه هَدِه، اون جَوان کَم کَم سَنگین خواب دِلِه بَشَه و یدَفه سِوّمین طَبقه یه جی جیر بَکِته، وَختِی اونِه بِیتَن بَدییَن اون بَمِردِه.

¹⁰ پولُس جیر بَشَه، خودِشه اون جَوانِ مَردای یه سَر توُوادَه و اونِه کَشِه بَزه و باگوتِه: «نَتِرسین، هَلَه جان داره!»

¹¹ ایما جآر بَشَه و نان پارِه هَکردِه و بُخاردِه. اون تا سَحر اوشانِ هَمرهَ گَب بَزه، وَ ایما اوجِه یه جی بَشَه.

¹² مَردم اون جَوانِ زندِه سِرِه بَبِردَن و خِیلی تَسلّی بِیتَن.

¹³ وَلی اَما اَمی سَفرِ دِلِه، پولُس جی پیشتر ایتا کَشتی سَوار هَبَیم و آسوسِ شهرِ سَمت رادَکِتِیم. تا طِبقِ پولُسِ قَرار اوجِه اونِه کَشتی یه دِلِه بیاریم، چون پولُس بِخَسِّه با تا اوجِه رِه خشکی یه راهِ جی بوشو.

¹⁴ پَس وَختِی پولُسِ آسوسِ دِلِه بَدییَیم، اونِه کَشتی یه دِلِه بیاردِیم وبه میتیلینی شهر بَشَیم.

¹⁵ اوجِه جی کَشتی یه هَمرهَ رادَکِتِیم و فردای اون روز به جزیره خیوس بَرِسییَم. فَردَئی به جزیره ساموس بَشَیم و پس فَردَئی، به میلیتوس شهر بَرِسییَم.

¹⁶ پولُس تَصمیم داشتِه دَریای راهه جی اَفِسُسِ وَرِ جی بگذرِه تا خودِشِه وَختِ آسیای منطقه یه دِلِه هَدَر نَدِه، چون عجله داشتِه که اَگه هَبو، پِنتیکاست روز اورشلیمِ دِلِه دَبو.

پولُس اَفِسُسِ مَشایِخِ هَمرهَ خدافِظی کانِه

¹⁷ اون میلیتوسِ جی ایتا پِیغام اَفِسُسِ وَسین روانه هَکوردِه و کلیسای مَشایِخ رِه خودِشِه وَر دُخوانِسِّه.

¹⁸ وَختِی بومَن، پولس اوشانِه باگوتِه: شما خودِتان هم خَبَر دارِین که هَمون اَوَّلین روز که می لنگ آسیای منطقه یه دِلِه بَنَم، چِطور تمام می وَختِ شِیمی هَمرهَ سَر هَکُردَم.

¹⁹ چِطور تمام فروتنی و آرسویِ هَمرهَ خداوَندِ خِدمَت کانِه بام، سختیهایی که یَهودیِان دَسیسه یه خاطری می سَر بوما رِه تَحمل هَکُردَم.

²⁰ دانید که چِطور اونچه که ممکن با شیمی وَسین فایدِه بِدارِه رِه، هیچ دَریغ نَکُردم، بَلکِه پِیغامِ شمِرِه اعلام هَکُردَم، چه جَمعِ دِلِه چه سِرِه به سِرِه شِمِرِه تَعلیم هَدَم.

²¹ هَم یَهودیان و هم یونانیانِ اعلام هَکُردَم که بایسّی توبه یه هَمرهَ خُدایِ سَمت وَگِردَن و اَمِی خُداوند عیسی یه مَسیحِ ایمان بیارِن.

²² «وَ اَسه، خُدای روحِ هِدایتِ هَمرهَ به اورشَلیمِ شونَم و نِدانَم اوجِه چی می سَر هَنِه؛

²³ جز اونکه هر شَهرِ دِلِه روح القُدُس هُشدار دَنِه که سَختی و زندان می انتظار دَرِه.

²⁴ وَلی مَن هَم جان و هَم زِندگی رِه می وَسین بی اَرزِش دانَم، فقط اگه بَتَّنَم می دورِه رِه تَمام هَکُنَم و خِدمَتی که عیسی یه خُداوند جی هِیتَم رِه، سَر اَنجام بَرِسانِم، وَ خُدای فیضِ خَبَرِ خوشِ شهادَت هَدَم.

²⁵ «اَسه دانَم شیمی جی هیچکِدام که مَن شِیمی دِلِه بَگرِسَّم و خُدای پادشاهی رِه اعلام هَکُردَم، دِ مَرِه نَینِه.

²⁶ پَس امروز شیمی وَسین شهادَت دَنَم که مَن هَمه یه خون جی پاکم،

²⁷ چون مَن هیچکَسِ حَقِّ کوتاهی نَکُردَم، بَلکِه تمام خُدایِ پِیغامِ هَمِه یه وَسین اعلام هَکوردَم.

²⁸ شیمی حَواس دَبو و تمام گَلِّه ایی که روح القُدُس شِمِرِه اوشانِ نظارتِ وَسین بَنَه یه مواظب هَبین، وَ خُدایِ کلیسا رِه که اون خودِشِه خون هَمرهَ بَهیَّه، گالِشی هَکُنین.

²⁹ دانَم بعدِ می رفتن، دَرَندِه وِرکِشان شِیمی دِلِه هَنِن که گَلِّه رِه رَحم نُکانَن.

³⁰ حتّی شِیمی دِلِه کَسایی وَرِسِنَن که حقیقَتِ وَگِرداندِنَن تا شاگِردانِ خودِشانِه دُمّال بَکِشانَن و راه جی به دَر هَکُنَن.

³¹ پَس هوشیار هَبین و شیمی خاطِر بیارین که مَن سِه سالِ تَمام، شُو و روز، آرسوی هَمرهَ یه لحظه هَم شِیمی هُشدار هَدَئنِ جی، نییَسَم.

³² «اَسه شِمِرِه خدا و اونِه فیض بَخش کَلامِ دَس اِسپاردِنَم که تانه شِمِرِه بَنا هَکونِه و تمام کَسانِ دِلِه که تقدیس هَبان، اِرثیه هَدِه.

³³ مَن هیچکسِ نقره و طِلا یا لِواسِ چِش نِداشتم.

³⁴ شما خودِتان دانید که می دَس هَمرهَ، خودَم و می هَمراهانِ نیازِشانِه فراهم هَکُردَم.

³⁵ همه جورِ شِمِرِه نشان هَدَم که باید اینجور سخت کار هَکنیم تا بَتَّنیم ضَعیفانِ دَسِ بَگیریم، وَ عیسی یه خداوند گَبِ اَمی یاد بِداریم که چِطور خودِش باگوته: ”هَدَئن، بِیتَن جی بِهتَرِه.“‌»

³⁶ پولُس وَختِی خودِشِه گَبِ تَمام هَکردِه، زانو بَزه و همه یه هَمرهَ دُعا هَکردِه.

³⁷ هَمِه خِیلی بِرمِه هَکُردَن، وَ اونِه کَشِه زَنِه بان و خُش دَنِه بان.

³⁸ اونچه بیشتَر اَز هَمِه اوشانِه ناراحَت کانِه با، پولُسِ این گَب با که باگوتِه: «دیگه مَرِه نَینین.» ایما تا کَشتی یه وَر اونِه بَدرَقِه هَکُردَن.