اعمال رَسولان 2 - گیله ماز

روح القدس پِنتیکاست دِلِه بوما

¹ وَختِی پِنتیکاست روز بَرِسییَه، هَمِه یکدِل یِجا جَم بان

² که یدَفه ایتا صدا تُنِّ وایه صدایِ مِثان آسِمانِ جی بوما و تمام سِرِه ایی که اونه میَن نیشته بان رِه، پُر هَکردِه.

³ ایما یِچّی تَشِ اَلویه مِثان بَدییَن که تقسیم هَبا و هر کُدامِ سَر بَنیشتِه.

⁴ ایما هَمِه روح القُدُسِ جی پُر هَبان و هَمونجور که روح اوشانِه قُوَّتِ گَب بَزَئن دَنِه با، دیگَر زَبانانِ هَمرهَ گَب بَزئنِ شروع هَکُردَن.

⁵ اون روزان، دیندار یَهودیِان، آسِمانِ جیر تمام مَملِکَتانِ جی، اورشَلیمِ شهرِ دِلِه دَبان.

⁶ وَختِی این صِدا وَرِسَه، جماعَت جَم هَبان، اوشان بُهت بَزَه بان، چون هر کدام از اوشان اِشنَوِسَّن که اوشان، اوشانه زَبان هَمرَه، گَب زَنِن.

⁷ پس بُهت و حیرَتِ هَمرهَ گونه بان: «مَگِه ایشان که گَب زَنِن هَمِه جَلیلی نییَن؟

⁸ پَس چِطوره که اِشنَوِنیم هر کدام اَمِی مآری زَبانِ مِثان گَب زَنَن؟

⁹ پارتها و مادها و عیلامیِان، بین‌النهرینِ مَردم و یهودیه و کاپادوکیه و پونتوس و آسیایه منطقه یه امپراطوری

¹⁰ فْریجیه و پامفیلیه و مصر و لیبی یه اون قسمتان که قیرَوانی جی با، وَ رُوم زائِران

¹¹ هَم یَهودی و هَم اوشانیکه یَهودِ دینِ قبول هَکُردَن؛ وَ همینجور کْرِت و عربستان مَردم - هَمِه اِشنَوِنیم که ایشان اَمِی زَبان هَمرَه خُدای قوَّت و عجیبِ کارانِ جی گَب زَنِن.»

¹² پس هَمه حیران و سَرگَردان هَمدیگر گونه بان: «این اِتِّفاق معنی چیِه؟»

¹³ وَلی بعضیان ریشخَن زَنِه بان گونه بان: «ایشان تازِه شَرابِ جی مَس هَبان!»

پِطرُس پِیغام پنتیکاست روز

¹⁴ ایما پِطرُس اون یازدَه رَسولِ هَمرهَ وَرِسَه و خودِشِه صِدا رِه بُلَند هَکردِه، اوشونه باگوتِه: «اِی یَهودیان و اِی اورشلیمِ مَردم، اینِ بِفَهمین و اونچه گونَم رِه دِقَّتِ هَمرهَ گوش هَدین!

¹⁵ این مَرداکان اونجور که شما گَمان کانین مَس نییَن، چون اَلَان ساعَت نُه صُبِ!

¹⁶ بَلکِه این هَمونِه که یوئیلِ پِیغَمبَر اونِه بارِه اینجور پیشگویی هَکُرده با:

¹⁷ «‌”خدا گونِه: آخرین روزای دِلِه می روحِ جی تمام مَردُمِ سَر ریزِنَم. شِیمی ریکاشان و کیجاشان نَبُوّت کانَن، شِیمی جَوانان رؤیاها و شِیمی پیران خواب دینَن.

¹⁸ اون روزان، حتّی می پاکاران و کُلفتان سَر، می روحِ جی ریزِنَم و اوشان نَبوَّت کانَن.

¹⁹ جآر آسِمانِ دِلِه عجیبِ چیزا وَ جیر، زَمین سَر نِشانِه ها ظاهِر کانَم، خون و تَش و دود.

²⁰ پیش اَز اونکه خداوَندِ روز بَرِسِه، اون پُرشکوه و گَتِ روز خُرشید تاریک بونِه و ماه خونِ رَنگ بونِه.

²¹ وَ اینجور بونِه که هر کی خُداوند اِسمِ دُخوانِه، نِجات گیرنِه.“

²² «اِی یَهودیان، اینِ بِشنُئین: عیسی یه ناصِری، اونکه خدا معجزات و عجیبِ چیزان و نِشانِه هایی که اونِه دَس هَمرهَ شِیمی میَن ظاهِر هَکردِه، اون حقیقَتِ گَواهی هَدَه، همونجور که خُدِتان دانین.

²³ این عیسی طِبقِ خُدای اِراده و نقشِه شِیمی تَسلیم هَبا، وَ شما کافَرانِ دَس اونِه صَلیب بَکِشیَن و بَکوشتین.

²⁴ وَلی خدا اونِه مَرگِ دَردای جی آزاد هَکردِه و زندِه هَکردِه. چون مَحال با مَرگ بِتَّنه اونِه خودِشِه چَنگِ دِلِه بِدارِه.

²⁵ همونجور که داوود عیسی یه بارِه گونِه: «‌”خداوندِ هَمَش می چِشمِ پیش بَدییَم چون اون می راسِ دَس وَر دَرِه تا لَرزِه دَنِکَم.

²⁶ اینه وَسین می دِل شادِ و می زَبان خوشحالی کانِه می تَن اُمیدِ دِلِه ماندِنِه؛

²⁷ چون می جانِ مُردگانِ دُنیای دِلِه وِل نُکانِی، وَ نُزارنی تی اِنتخاب هَبوسِّه یه تَن بَپیسِه.

²⁸ تو زندگی یه راهِشانِ مَرِه یاد هَدَیی، تو تی حضورِ هَمرهَ مَرِه شادی یه جی پِرُ کانی

²⁹ «اِی آداشان، تانَم یَقینِ هَمرهَ شِمِرِه باگوم که اَمِی جَد داوود بَمِردِه و دَفن هَبا و اونِه مَقبَره هَم تا امروز اَمِی وَرجه دَرِه.

³⁰ داوود ایتا پِیغَمبر با و دانِسِّه خدا اونه وَسین قَسَم بُخاردِه که اونِه نَسلِ جی یِنَفرِ اونِه سَلطَنَتِ تَختِ سَر نیشاندِنِه.

³¹ داوود پیشتَر آیندِه رِه بَدیِه، اون مَسیحِ زندِه هَبوسَّنِ بارِه باگوتِه که اونِه جان مردگانِ دُنیای دِلِه نُماندِنِه و اونِه تَن نَپیسِنِه

³² خدا هَمین عیسی رِه زندِه هَکردِه و اَما هَمه هَم شاهِدیم.

³³ عیسی خُدای راسِ دَس وَر جآر بَبِردِه هَبا و آسِمانِی پیَرِ جی، روح القُدُسِ موعودِ بِیتِه و بَریختِه، اینه که اَلان دینین و اِشنَوِنِن رِه.

³⁴ داوود به آسِمان جآر نَشَه، وَلی خودِش گونِه: «‌”خداوند، می خداوَندِ باگوتِه: «’می راسِ دَس وَر بِنیش

³⁵ تا تی دُشمنانِ تی لِنگِ جیر تُووادَم.»“‘

³⁶ «پَس اِی یَهودِ قوم، هَمِه یَقینِ هَمرهَ بِدانین که خدا این عیسی رِه که شما اونِه صَلیب بَکِشییَین، هم خداوند و هم مسیحِ موعود هَکردِه.»

³⁷ وَختِی اوشان این گَبان رِه بِشنَوِسَّن جوری هَبان که اِنگار اوشانِ دِل خَنجر بُخاردهِ بو، پِطرُس و دیگَر رَسولانِ باگوتِن: «اِی آداشان، چی هَکنیم؟»

³⁸ پِطرُس اوشانِه باگوتِه: «توبِه هَکُنین و هر کُدام از شما عیسی یه مسیحِ اِسمِ هَمرهَ شیمی گناهانِ آمرزِشِ وَسین غسلِ تَعمید هَگیرین، که روح القُدُسِ عطا رِه گیرنین.

³⁹ چون این وَعدِه شیمی و شِیمی وَچِهان وَسین و تمام اوشانه وَسین هیسه که دور دَرِن، یعنی هر کی خُداوند اَمِی خدا اونِه خودِشِه وَر دُخانِه.»

⁴⁰ پِطرُس خِیلی گَبایِ دیگَرِ هَمرهَ شهادَت هَدَه و اوشانِه تَشویق هَکردِه باگوتِه: «شِمِرِه این نا خَلَفِ نَسلِ جی آزاد هَکُنین!»

⁴¹ پس اوشانیکه پِطرُسِ پیغامِ قبول هَکُردَن، تَعمید بِیتَن. همون روز حدودِ سِه هزار نفر اوشانِه مُلحَق هَبان.

ایماندارانِ زِندگی

⁴² اوشان خودِشان رِه وَقف تَعلیم بِیتَن رَسولانِ جی و دیگَر ایماندارانِ هَمرهَ مُشارکت و نان پارِه هَکُردَن و دُعا هَکُردَن.

⁴³ هر کدام از اوشانِه تَرس بِیتِه، وَ خِیلی عجیبِ چیزان و نِشانِه ها رَسولانِ دَس همرَه اَنجام بونِه با.

⁴⁴ تمام ایمانداران هَمدیگَرِ هَمرهَ دَبان و همه چی یه دِلِه شَریک بان.

⁴⁵ خودِشانِه مال و مَنالِ روشِنِه بان و اونِه پولِ هر کسِ اِحتیاجِ قدر هَمه یه میِن تقسیم کِانِه بان.

⁴⁶ اوشان هر روز مَعبَدِ دِلِه جَم بونه بان و هَمدیگَرِ هَمرهَ خودِشانِه سِرِه یه دِلِه نان پارِه کِانِه بان، وَ خوشی و سادِه دِلِی یه هَمرهَ غَذا خارنه بان.

⁴⁷ اوشان خَدا رِه حَمد و ثَنا گونِه بان. تمام مَردم اوشانِه اِحترام نَنِه بان، وَ خُداوند هر روز اوشانیکه نِجات گیرنِه بان رِه اوشانِ جَمع دِلِه اِضافِه کانهِ با.