اعمال رَسولان 19 - گیله ماز

پولُس اَفَسُسِ دِلِه

¹ وَلی موقِه ایی که آپولُس قُرِنتُسِ شهرِ دِلِه دَبا، پولُس بعدِ اینکه اون منطقه یه خُشکی یه راهِ جی بُگذشتِه، به اَفِسُسِ شهر بَرِسیِه. اوجِه چَن تا شاگِرد پیدا هَکوردِه

² و اوشانِ جی بَپُرسیِه: «اون موقِه که ایمان بیاردین، روح القُدُسِ بِیتین؟» اوشان باگوتِن: «نه، اَما حَتّی نِشنَوِسّیم که روح القُدُس هَم دَرِه.»

³ پولُس اوشانِه باگوتِه: «چه غُسل تعمیدی هَیتین؟» اوشان باگوتِن: «یحیی یه تَعمید.»

⁴ پولُس باگوتِه: «یَحیی اوشانیکه توبِه کانِه بان رِه تَعمید دَنِه با. اون قومِ گونِه با، اونیکه بعدِ اون هَنِه رِه ایمان بیارِن، یَعنی عیسی رِه.»

⁵ اوشان وَختِی اینه بِشنَوِسَّن، به اِسمِ عیسی یه خُداوَند تَعمید بِیتَن.

⁶ وَ موقِه ایی که پولُس اوشانِ سَر دَس بَنَه، روح القُدُس اوشانِ سَر بوما، اوشان ایتا دیگَه زَبانِ هَمرهَ گَب بَزَن و نَبوَّت هَکُردَن.

⁷ اون مَرداکان، حدودِ دوازده نَفر بان.

⁸ ایما پولُس یَهودیِان عبادتگاه دِلِه بَشَه، اوجِه سِه ماه جرأتِ هَمرهَ گَب زَنِه با و خُدای پادشاهی یه بارِه بَحث کانه با و اوشانِه قانع کانِه با.

⁹ وَلی بَعضیان سَرسَختی کانِه بان و ایمان نیارنه بان و همه یه چِشمِ وَر اَهلِ ’طَریقَتِ‘ بَد گونه بان. پَس پولُس خودِشِه شاگِردانِه بِیتِه و اوشانِ جی دور هَبا، وَ تمام روز تیرانوسِ مَدرِسِه یه دِلِه بَحث کانِه با و گَب زَنِه با.

¹⁰ دو سال هَمینجور بُگذشتِه و این مدّت دِلِه، تمام آسیایِ منطقه یه مَردم، چه یَهودی و چه یونانی، خُداوند کَلامِ بِشنَوِسَّن.

اسکیوای ریکاشان

¹¹ خدا پولُسِ دَس هَمرَه عَجیب غَریبِ معجزات کانِه با،

¹² جوریکه مَردم دسمال و پیشبندهایی که پولوسِ تَنِ بُخارد با رِه مریضانِ وَسین بَرنِه بان، وَ اوشانِ مریضی خوب بونِه با و پلیدِ اَرواح اوشانِ جی دِرگا شونِه با.

¹³ پَس چَن تا یَهودی دورِه گَرد که جِن گیر بان هَم تَقَلّا هَکُردَن عیسی یه خداوَندِ اِسمِ اوشانِ وَسین که پَلیدِ اَرواح داشتِن، بُخوانَن. اوشان گونه بان: «بِه اون عیسی که پولُس اونِه موعظه کانِه شِمِرِه قَسم دَنیم!»

¹⁴ اوشانیکه اینجور کانِه بان، اِسکیوایِ هَفتا ریکا بان، که ایتا اَز یَهودِ گَتِ کاهِنان با.

¹⁵ وَلی پَلیدِ روح اوشانِ جواب باگوتِه: «عیسی رِه اِشناسِنَم، پولُس رِه هَم اِشناسِنَم، وَلی شما کی هیسین؟»

¹⁶ پَس اون مَردای که پَلیدِ روح داشتِه اوشانِ سَر بَپِّرِسِه، همه رِه بکُتاندِه، وَ جوری اوشانِه بَزه که زَخمی و لخت اون سِرِه یه جی دَر بَشَن.

¹⁷ اَفِسُسِ شهرِ تمام مَردم، چه یَهودی و چه یونانی، این جریانِ جی خَبَردار هَبان، هَمِه یه اوشان رِه تَرس بِیتِه، جوریکه مین بعد عیسی یه خداوند اِسمِ خِیلی اِحترام نَنِه بان.

¹⁸ وَ خِیلی از اوشانیکه ایمان بیارد بان، پیش بومَن، خودشانِه کاران رِه آشکارا اعتراف هَکُردَن.

¹⁹ خِیلیان هَم که پِش اَزون جادوگری کِانِه بان، خودشانِه کتابِشانِ بیاردِن و همه یه چِشمِ وَر بَسوزاندِن. وَختِی کتابِشانِ قیمَتِ حِساب هَکُردَن، پَنجاه هِزار تا سِکِّه نِقره با.

²⁰ اینجوری، خُداوند کَلام همه جا پَخش بونِه با و قِوَّت گیرنِه با.

²¹ بعدِ این اِتفاقان، پولُس خُدای روحِ هَمرهَ هِدایت هَبا که مَقدونیه و اَخائیه یه منطقه یه راهِ جی به اورشَلیمِ وَگِردِه. پولُس گونِه با: «بعدِ اینکه اوجِه بَشَم، بایسّی رومِ شهرِ جی هم دیدَن هَکُنَم.»

²² ایما خودِشِه همکارانِ جی دو نفر، تیموتائوس و اِراستوسِ به مَقدونیه روانه هَکوردِه و خودِش چَن وَخت آسیای منطقه یه دِلِه بُمانِسّه.

اَفِسُسِ دِلِه بَلوا بونِه

²³ هَمون موقِه، علیِه اَهلِ ’طریقت‘ ایتا گَتِه بَلوا بُلَند هَبا.

²⁴ ایتا نقره‌ کار که اونِه اِسم دیمیتریوس با و آرتِمیسِ معبدِ جی نُقرِه ایی چیزان سازِنِه با، وَ این راهِ جی خِیلی درآمد صنعتگرانِ عایِد هَکُرده با،

²⁵ اوشان و اینجور کارانِ صاحابِ جَم هَکردِه و اوشانِ باگوتِه: «آقایان، اَمِی دارایی این کارِ جیه.

²⁶ وَلی هَمونجور که دینین و اِشنوِنین، این پولُس نه فقط اَفِسُسِ دِلِه بَلکِه تمام آسیای منطقه یه دِلِه خِیلی از مَردمِ قانع و گُمراه هَکردِه. اون گونِه خدایِانی که آدَم دَس جی بِساتِ بونَن، خدایِان نییَن.

²⁷ وَ این خطر دَرِه که نه فقط اَمِی کاسبی رونقِ جی دَکِه، بَلکِه آرتِمیس اَمِی گَتِه اِلهه یه معبد هم هیچ هَبو، وَ حتی خودِشِه عَظِمَتِ اَز دَس هَدِه. اونکه تمام آسیای منطقه و دُنیایِ دِلِه پَرسِش بونِه.»

²⁸ اوشان وَختِی اینه بِشنَوِسَّن، خِیلی عَصبانی هَبان، داد بَزَن که «گَتِه هیسِه، اَفِسُسیِانِ آرتِمیس!»

²⁹ تمام شَهرِ دِلِه بَلوا هَبا! تمام مَردم هَمدَس هَبان و میدانِ مسابقاتِ سَمت هُجوم بَبِردَن. اوشان گایوس و آریستارخوس که اَهل مَقدونیه و پولُسِ هَمراهِان بان رِه، کِرِش دَنِه بان و خودشانِه هَمرهَ بَرنِه بان.

³⁰ پولُس خَسِّه خودِش رِه جمعیتِ نَشان هَدِه، وَلی شاگِردِان نُزاشتن.

³¹ حتّی بعضی اَز آسیای منطقه یه حاکِمان که اونِه رَفِیقان بان اونه رَه پِیغام روانه هَکوردَن و اونه جی خواهش هَکُردَن تی لِنگِ مسابقاتِ مِیدانِ دِلِه نُزار.

³² جمعیتِ دلِه غوغا با و مَردم گیج بان. هَمِه شول کَشِنِه بان و هر کَس یِچی گونِه با و بیشتَرِ مَردم نُدانِسَّن چی یه وَسین جَم هَبان.

³³ بعضیان گمان هَکُردَن اسکندر مَسئولِ، چون یَهودیِان اسکندرِ پِش تُوواده بان، وَ بعضیان جمعیتِ میَنِ جی اونِه دَستوراتِی دَنِه بان. اون خودِشِه دَسِ تِکان هَدَه، مَردُمِ جی بِخَسِّه ساکت هَبون و تَقَلّا هَکردِه یِچی باگو و خودِشِه جی دِفاع هَکونِه.

³⁴ وَلی وَختِی مَردم بِفَهمِسِّن یَهودیِه، هَمِه یِک صِدا، حدودِ دو ساعَت شول کَشِنِه بان: «گَتِ هیسِه، اَفِسُسیِان آرتِمیس!»

³⁵ سَرآخَر، شَهرِ داروغۀ جمعیتِ آرام هَکردِه و باگوتِه: «اِی اَفِسُسِ مَردِکان، کیِه که نِدانه اَفِسُس شهر گَتِ آرتِمیسِ مَعبدِ نِگهبانِ؟ کیِه که نِدانه اَفِسُس شهر مُقَدَّسِ سَنگِ نِگهبانِ که آسِمانِ جی جیر بَکِته؟

³⁶ پَس اَسه که نَبونِه این چیزان رِه حَشا هَکُردَن، شما بایسّی آرام هَبین و هُول هُولِی کاری نَکُنین.

³⁷ چون شما این مَردِکانی که ایجِه بیاردین، نه اَمِی مَعبدِ بی حِرمتی هَکُردَن نه اَمِی الهۀ رِه کُفر باگوتِن.

³⁸ اَگه دیمیتریوس و اونِه صَنعتگر هَمکاران، کَسی یه جی شِکایت دارِن، مَحکَمه‌ شانه دَر وازِ و حاکِمان هَم آمادِئَن. تانَن خودِشانِ شِکایتِ اوجِه بَبِرَن.

³⁹ وَلی اَگه شکایَتِ بیشتَری دارِین، بایسّی اونِه شَهرِ اَنجمَن رَسمی یه جَلسات دِلِه حَل و فصل هَکُنید.

⁴⁰ چون این خطرِ دِلِه دَریم که امروزِ اِتِفاقایِ خاطِری، مُتَّهَم بِه شورِش هَبیم. اَگه اینجور هَبو، نَتَّنیم این بَلوای وَسین دَلیلِی بیاریم.»

⁴¹ وَختِی که داروغه این گَبِ بَزه جَمعیَتِ متفرِق هَکردِه.