اعمال رَسولان 17 - گیله ماز

پولس و سیلاس تِسالونیکی یه میَن

¹ پولُس و سیلاس آمْفیپولیس و آپولونیایه شهرانِ جی بُگذشتَن و به شهرِ تِسالونیکی بومَن، که اوجِه یَهودیِان عبادتگاه با.

² پولُس طِبق خودِشِه عادت به عبادتگاه بَشَه، اون سِه تا مُقَدَّسِ شَنبِه اوشانِ هَمرهَ نِوشتِه های مُقَدَسِ جی بَحث کانِه با

³ و توضیح دَنِه با و دَلیل هارنه با که بایسّی مَسیح عذاب بَکِشِه و مُردِگانِ جی زندِه هَبو. اون گونِه با: «این عیسی که اونِه شِمِرِه اِعلام کانَم، هَمون مَسیحِ موعودِ.»

⁴ بَعضی از اوشان قانع هَبان که پولُس و سیلاسِ مُلحَق هَبون. وَ هَمینجور ایتا گَتِه دَسّه یونانیِان خداپَرَس و خِیلی سَرشِناس زِناکان جی، اوشانِه مُلحَق هَبان.

⁵ وَلی یَهودیِان حَسودی هَکُردَن و چَن تا شریرِ آدَمانِ بازارِ جی جَم هَکُردَن، یه دَسِّه لات و لوت راه تُووادَن و شَهرِ دِلِه بَلوا هَکُردَن. اوشان پولُس و سیلاسِ پیدا هَکوردَنِ وَسین یاسونِ سِرِه یه سَمت هُجوم بَبِردَن تا اوشانِه جَماعتِ دِلِه دِرگا بیارِن.

⁶ وَلی وَختِی اوشانِه پیدا نَکوردَن، یاسون و بعضی دیگَر اَز اَداشانِ شَهرِ حاکِمانِ وَر بَکِشاندَن و داد بَزَئن که «این مَرداکان که تمام دنیا رِه زیر و رو هَکُردَن، اَسه ایجِه بومَن

⁷ و یاسون اوشانِه خودِشِه سِرِه بَبِردِه. ایشان هَمه رومِ پادشاه قیصرِ دَستوراتِ جی سَرپیچی کانَن و مدَعین که ایتا دیگَه پادشاه، بِه اِسم عیسی دَرِه.»

⁸ وَختِی مَردم و شَهرِ حاکِمان اینه بِشنَوِسَّن، پَریشان هَبان.

⁹ ایما یاسون و بَقیِه جی ضِمانت بِیتَن، اوشانِه آزاد هَکُردَن.

پولُس و سیلاس بیریه شهرِ دِلِه

¹⁰ آداشان شَبانِه دَرجا پولُس و سیلاسِ به بیریِه شهر راهی هَکُردَن. وَختِی اوشان اوجِه بَرِسین، یَهودیانِ عبادتگاهِ دِلِه بَشَن.

¹¹ این یَهودیان اون یَهودیان جی که تِسالونیکی یه دِلِه دَبان نَجیب تَر بان، اوشان ذوقِ هَمرهَ پِیغامِ قبول هَکُردَن و هر روز مُقَدَّسِ بَنویشتِه شان رِه خواندِنِه بان تا بِینَن پولُس و سیلاسِ گَب خُدایِ کلامِ مِثان هیسه یا نه.

¹² اینجوری، خِیلی اَز یهودیِان، وَ خِیلی از سَرشِناسِ یونانی زِناکان و مَرداکان هَم ایمان بیاردِن.

¹³ ولی وَختِی تِسالونیکی یه یَهودیِان بِفَهمِسِّن که پولُس بیریه یه دِلِه هَم خُدای کَلام اعلام کانِه، اوجِه بَشَن و مَردمِ آنتریک هَکُردَن و شهرِبه آشوب بَکِشیَن.

¹⁴ آداشان دَرجا پولُسِ دریا کِنار سَمت راهی هَکُردَن، وَلی سیلاس و تیموتائوس بیریه دِلِه بُمانِسَّن.

¹⁵ اوشانیکه پولُسِ هَمراهی کانِه بان اونِه تا آتِن بیاردِن. بعدِ اینکه پولُسِ جی سیلاس و تیموتائوسِ وَسین دستور بِیتَن که هر‌ چه تُن تَر پولُسِ مُلحَق هَبون، اوجِه یه جی بَشَن.

پولُس آتِنِ دِلِه

¹⁶ اون موقِه که پولُس آتِنِ دِلِه اون دُتای اِنتظارِ کَشِنِه با، اَز اینکه دینِه با شَهر بُتشانه جی پُرِ، اونِه روح غُصِّه بِیتِه.

¹⁷ اینه وَسین، عبادتگاهِ دِلِه یهودیِان و خُداپَرَس یونانیِان، وَ هم هر روز شَهرِ میدانِ دِلِه اون مَردُمِ هَمرهَ هَم که اوجِه دَبان بَحث کانِه با.

¹⁸ رَواقی و اِپیکوری یه فیلسوفان جی بعضیان هَم اونِه هَمرهَ بَحث کِانِه بان. بعضی اَز اوشان گونه بان: «این مُفت گَب زَن چی خَنِه باگو؟» بَقیِه گونه بان: «اِنگار غریبِ خِدایانِ تبلیغ کانِه.» چون پولُس، عیسی و مردگانِ زندِه هَبوسَّنِ بارِه اوشانِ هَمرَه گَب زَنِه با.

¹⁹ ایما پولُسِ بِیتَن، ’آریوپاگوسِ‘ دِلِه که ایتا کوچِ کوتی آتِنِ دِلِه با و مَردم اوجِه جَم بونه بان بَبِردَن و اونِه باگوتِن: «تانیم بِدانیم این جَدیدِ تَعلیم که تو دَنی، چیِه؟»

²⁰ تی گَب اَمِی گوش عجیب هَنِه. پَس خَنیم اونِه معنی رِه بِدانیم.»

²¹ تمام آتِنیان و غَریبه شان که اوجِه زندگی کِانِه بان، کاری نداشتِن بِجُز اینکه خودِشانِه وَختِ تازِه عقاید گب بَزَئنِ سَر بَنَن.

²² پَس پولُس ’آریوپاگوسِ‘ میَن وَرِسَه و باگوتِه: «اِی آتِنی مَردِکان، مَن شِمِرِه هر لحاظ جی خِیلی دیندار بَدییَم.

²³ چون وَختِی که شَهرِ دِلِه گَردِنِه بام و اونچه که شما پَرَسِش کانین رِه بَدییَم، ایتا قربانگاه پیدا هَکوردَم که اونه سَر بَنوِشت هَبا با: ”تَقدیم بِه خُدایی که هَلَه بِشناخته نَبا“. اَسه مَن اونچه که شما اونِه نِشناسِنِین و پرَسِش کانین رِه شِمِرِه اِعلام کانَم.

²⁴ «خُدایی که دُنیا و هر اونچه اونه دِلِه دَرِه رِه خَلق هَکردِه، آسِمان و زمینِ صاحاب هیسِه و معبدایی که آدَمی یه دَس هَمرَه بِساته هَبا یه دِلِه زندگی نُکانِه.

²⁵ آدَمی یه دَس نَتَّنِه اونِه خِدمتی هَکونِه، جوریکه گونی یِچّی یه مُحتاج هَبو، چون خودِش اونییِکه که تمام آدَمانِ زندگی و نَفس و هر چی یه دیگَرِ بِبَخشییَه.

²⁶ اون تمام مَردمان ایتا آدَمِ جی بِوجود بیاردِه تا تمام زمین دِلِه زندگی هَکُنَن؛ وَ اوشانِ وَسین تعیین هَبا وخت و اوشانِ زندگی یه مُحلِ حَد و حدودِ تعیین هَکردِه.

²⁷ تا مَردم خُدای دُمّال بَگِردن و شاید اونِه دُمّال بوشون، اونِه پیدا هَکونَن، هر چَن خدا اَمی هیچ کُدامِ جی دور نیِه.

²⁸ چون اونِه دِلِه یه که زندگی و حرکت و هَستی داریم؛ هَمونجور که بعضی اَز شِیمی شاعِران هَم باگوتِن که راس راسی اونِه نَسلِ جی هیسیم.

²⁹ «اَسه که خُدای نَسلِ جی هیسیم، خوب نیِه اینجور فِکر هَکنیم که خدا ایتا طِلا یا نُقره یا سَنگِ مِثانِ، ایتا مجَسَمِه یه مِثان که آدَمی یه هنر و خیالات هَمرهَ بِتراشیه هَبا بو.

³⁰ اولارسالان، خدا اینجور نادانی یه جی چِشم پوشی کانِه با. وَلی اَلَان تمام مَردم، اَسه هر جا که دَرِن رِه دستور دَنِه که توبِه هَکُنَن.

³¹ چون اون ایتا روز تعیین هَکردِه که اونه دِلِه اون آدَمی طریق که مُعیَن هَکردِه، دنیا رِه عِدالتِ هَمرهَ داوری کانِه، وَ اونِه زندِه هَکِردَنِ هَمرهَ مُردِگانِ جی، هَمِه رِه این جَریانِ جی مُطمئِن هَکردِه.»

³² وَختِی اوشان مُردِگانِ زندِه هَبوسَّنِ باره بِشنَوِسَّن، بعضیان پوسخَن بَزَن، وَلی بَقیِه باگوتَن: «اَما خَنیم این جَریانِ بارِه باز هم تی جی بِشنوئیم.»

³³ پس پولُس اوشانِ جَمعِ جی بَشَه.

³⁴ وَلی چَن نفر اونِه مُلحَق هَبان و ایمان بیاردِن. وَ اوشانِ میَن دیونیسیوس که ’آریوپاگوسِ‘ دَسِّه یه جی با، ایتا زِنا به اِسم داماریس، وَ چَن نَفر دیگَر هَم، اون دَسِّه یه جی بان.