اعمال رَسولان 16 - گیله ماز

تیموتائوس، پولُس و سیلاسِ هَمراهی کانِه

¹ پولُس اوَّل دِربِه و ایما به لِستْره شهر بَشَه. اوجِه ایتا شاگرد که اونِه اِسم تیموتائوس با زندگی کانِه با که اونِه مآر یهودِی و ایماندار با، وَلی اونِه پیر یونانی با.

² لِستْره و قونیه یه دِلِه آداشان اونِه خُوبی رِه گونه بان.

³ پولُس چون خَسِّه اون سَفرِ دِلِه اونِه هَمراهی هَکونِه، یَهودیانِ خاطِری که اون مَنطقه یه دِلِه زندِگی کانِه بان، اونِه خَتنِه هَکردِه، چون هَمِه دانِسَّن اونِه پیَر یونانیِه.

⁴ اوشان وَختِی ایتا شَهرِ جی ایتا شَهرِ دیگَر شونه بان، اون قانونایی که رَسولان و مَشایخ، اورشلیمِ دِلِه باگوته بان رِه، مَردم رِه گونه بان تا اوشانِ رعایت هَکُنَن.

⁵ پَس، کلیسا شان ایمانِ دِلِه قوَّت گیرنِه بان و هر روز اوشانِ تعداد بیشتَر بونِه با.

پولُس مقدونیه ایی مَردایِ رویا رِه دینه

⁶ ایما، اوشان تمام فْریجیه و غَلاطیه یه منطقه رِه بَگَرسَّن چون روح القُدُس اوشانِه اَز اینکه کَلامِ آسیای منطقه یه دِلِه بَرِسانَن مَنع هَکُرده با.

⁷ وَختِی میسیه یه منطقه یه دِلِه بَرِسیَن، تَقَلّا هَکُردَن به بیطینیه بوشون، وَلی عیسی یه روح اوشانِه اِجازه نَده.

⁸ اینه وَسین، میسیه یه جی رَد هَبان و به تْروآسِ شهر بَشَن.

⁹ شُویه موقِه، پولُس رویای دِلِه بَدییَه که ایتا مَقدونیه ایی مَردای اونِه پیش اِیساَ و اونِه التماس کانِه «به مَقدونیه بییِه و اَمَرِه کمک هَکُن.»

¹⁰ پولُس وَختِی این رویا رِه بَدییِه، بِتیش مَقدونیه سَمت بَشَیم، چون مُطمئِن هَبَیم خدا اَمَرِه دُخوانِسِّه تا اِنجیلِ خَبَرِ خوشِ اوشانِه هَدیم.

لیدیه، ایمان هارنِه

¹¹ پَس، کَشتی یه هَمرهَ یِکراست تروآسِ شهرِ جی به جزیره ساموتْراکی بَشَیم، وَ فردَئی به نیاپولیس بَرِسییَم.

¹² اوجِه یه جی به شهر فیلیپی بَشَیم که ایتا از شهرایی با که رومیِان اوجِه زندگی کانِه بان و مَقدونیه یه خاک دِلِه دَبا. وَ چَن روز اون شَهرِ دِلِه بُمانِسّیم.

¹³ مُقَدَّسِ شنبه یه روز شَهرِ جی دِرگا بومَیم و ایتا روخِانِه یه وَر بَشَیم، این اِنتظارِ هَمرهَ که اوجِه یِجا دُعایِ وَسین دَرِه. پس بَنیشتیم و زِناکانی که اوجِه جَم هَبا بانِ هَمرهَ گَب بَزَیم.

¹⁴ اوشانِ دِلِه ایتا خداپَرسِ زِنا تیاتیرا یه شَهرِ جی دَبا که اَمِی گَبِ گوش دَنِه با. اونِه اِسم لیدیه با و اَرغوانی پارچه که خیلی گِران با رِه روشِنِه با. خُداوَند اونِه دِلِ واز هَکردِه تا پولُسِ پِیغامِ گوش هَدِه.

¹⁵ وَختِی لیدیه خودِشِه خانِوادِه یه هَمرهَ غسلِ تَعمید هَیتِه، خِیلی اِصرار هَکردِه و اَمَرِه باگوتِه: «اَگِه باوَر دارِین که خداوَندِ ایمان بیاردِم، بییَین و می سِرِه یه دِلِه بمانین.» سَرآخَر اونِه خواسِّه یه تَسلیم هَبَیم.

پولُس و سیلاس زندان دِلِه

¹⁶ یِبار به اون محلی که هَمَش دُعا کانه بِیم شونِه بِیم، ایتا کُلفَتِ بَر بخاردِیم که غیبگویی روحِ داشتِه و فالگیری یه هَمرهَ خودِشِه اَربابانِ خِیلی سود رَساندِنِه با.

¹⁷ اون اَما و پولُسِ دُمّالسَر هَنِه با و دادِ هَمرهَ گونِه با: «این مَردِکان، خدای متعالِ خادِمِن و نِجاتِ راه رِه شِمِرِه اعلام کانَن.»

¹⁸ اون خِیلی روزا اینجور کانِه با. سَرآخَر پولُسِ صَبر سَر بوما و وَگِرِسِّه اون روحِ رِه باگوتِه: «به اِسمِ عیسی یه مَسیح ترِه دَستور دَنَم این کیجای جی دِرگا بیئَیی!» هَمون دَم، روح اونه جی دِرگا بوما.

¹⁹ وَلی اون کُلفَت اَربابان وَختِی بَدییَن اوشانِ کسب و کاسِبی به باد بَشَه، پولُس و سیلاسِ بِیتَن و اوشانِه کِرِش هَدَن و شهرِ میدانِ میَن رَئیسان وَرجه بَبِردَن.

²⁰ پَس اوشانِه قاضیِان وَرجه بیاردِن و باگوتِن: «این مَردِکان یَهودیَن و اَمِی شَهرِ آشوب بَکِشیَن.

²¹ رَسم و رُسومایی رِه تبلیغ کانَن که اوشانِ قبول هَکُردَن و بِجا بیاردَن اَما رومیِانِ وَسین جایِز نیِه.»

²² مَردم پولُس و سیلاسِ هجوم بیاردِن و اوشانِ هَمرهَ هَمدَس هَبان. وَ قاضیِان دستور هَدَن اوشانِ لِواسِ در بیارِن و اوشانِه چُو بَزِنِن.

²³ وَختِی اوشانِه خِیلی چُو بَزَن، اوشانِه زندان دِلِه تُووادَن و زندانبانِ دستور هَدَئن خِیلی اوشانِ مواظِب هَبو.

²⁴ وَختِی زندانبان این دستورِ بِیتِه، اوشانِه دِلِه زندان میَن دِلِه بَبِردِه و اوشانِ لِنگِ دار بینه یه کَش زَنجیلِ هَمرهَ دَبِسِّه.

²⁵ نِصفِ شُو، پولُس و سیلاس دَبان دُعا کانه بان و سُرودِ هَمرهَ خدا رِه پَرَسِش کِانِه بان و بَقیِه زندانیان هَم اوشانِه گوش دَنِه بان

²⁶ که یَدَفِه ایتا گَتِه زلزِلِه دَکِتِه، جوریکه زندان بُنوار لَرزه دَکِتِه و دَرجا زندان دَرِشان واز هَبان و تمام زَنجیلِشان واز هَبان.

²⁷ زندانبان بیدار هَبا، وَختِی زندانِ واز هَبا دَرِ بَدییَه، شَمشیر بَکشیَه تا خودِشه بَکوشِه، چون خیال هَکوردِه زندانی شان دَر بَشَن.

²⁸ وَلی پولُس دادِ هَمرهَ، باگوتِه: «تِرِه صَدمِه نَزِن که اَما هَمِه ایجِه دَریم!»

²⁹ زندانبان لَمپائیشانِ بِخَسِّه و هُولِ هَمرهَ زندان دِلِه بَشَه و هَمونجور که ترسِ جی پَرکَنِه با پولُس و سیلاسِ لنگ دَکِتِه.

³⁰ ایما، اوشانِه دِرگا بیاردِه و بَپُرسیِه: «آقایان، چه هَکُنَم تا نِجات هَگیرم؟»

³¹ اوشان جَواب هَدَن: «عیسی یه مَسیحِ خُداوندِ ایمان بیار که تو و تی خانِوادِه نِجات گیرِنین.»

³² ایما خُداوند کَلامِ اونه وَسین و تمام اوشانیکه اونِه سِرِه یه دِلِه دَبان وَسین، باگوتِه.

³³ هَمون موقِه اَز شُو، زندانبان اوشانِه دِرگا بیاردِه، اوشانِ زَخمِ بَشوردِه، وَ دَرجا اون و تمام اونِه خانِوادِه تَعمید بِیتَن.

³⁴ اون اوشانِه خودِشِه سِرِه بَبِردِه و اوشانِ وَسین سفره پَهن هَکردِه. اون و تمام اونِه خانِوادِه اینه جی که خدا رِه ایمان بیارد بان خِیلی خوشحال بان.

³⁵ وَلی وَختِی روز هَبا، قاضیِان مأمورانِ زندانبانِ وَر روانه هَکوردَن، باگوتِن: «اون مَردِکان رِه آزاد هَکُن!»

³⁶ زندانبان پولُسِ این پیغامِ جی خَبَردار هَکردِه و باگوتِه: «قاضیِان دَستور هَدَئن که شِمِرِه آزاد هَکُنَم. پس اَسِه دِرگا بیئَین و بیشین بِسلامت.»

³⁷ وَلی پولُس اونِه جِواب باگوتِه: «اَما که رومِ تابعیتِ داریم رِه بی محاکمِه و همه یه چِشمِ وَر چُو بَزَن و زندان دِلِه تُووادَن. اَسه خَنِن یَواشکی اَمَرِه آزاد هَکُنَن؟ اصلاً! بَنی خُدِشان بیئِن و اَمَرِه ایجه یه جی دِرگا بیارِن.»

³⁸ مأموران اینه قاضیِان باگوتِن، اوشان وَختِی بِشنَوِسَّن پولُس و سیلاس رومِ تابعیتِ دارِن، خِیلی بَتِرسین

³⁹ پس بومَن و اوشانِ جی عذرخواهی هَکُردَن و تا زندان دِرگایِ وَر اوشانِه هَمراهی هَکُردَن، خواهِش هَکُردَن که شَهرِ جی بوشون.

⁴⁰ اوشان بعدِ اینکه زندان جی دِرگا بَشَن، لیدیه یه سِرِه بَشَن. اوجِه اَداشانِ بَدییَن و اوشانِه تَشویق هَکُردَن. ایما اوجِه یه جی بَشَن.