اعمال رَسولان 15 - گیله مازاورشلیمِ شورا 1 وَلی چَن نَفر یهودیه منطقه یه جی به اَنطاکیِه بومَن. اوشان اَداشانِ تعلیم دَنِه بان که: «اگه موسی یه شَریعت طَریق خَتنِه نَبین، نَتَّنین نِجات هَگیرین.» 2 پس وَختِی پولُس و بَرنابا خِیلی اوشانِ هَمرهَ مخالِفَت و بَحث هَکُردَن، اینجور قرار بَنَن که اون دُتا چَن نفر دیگَرِ هَمرهَ که اوشانِ جی بان به اورشلیمِ بوشون و این قضیِه رِه رَسولان و مشایخِ هَمرهَ دَر میَن بَنِن. 3 پَس کلیسا اوشانِه راهی هَکُردِه؛ اوشان وَختِی دَبان فینیقیه و سامِره یه جی رَد هَبون، اینه بارِه که چِطور غیرِ یَهودیِان ایمان بیاردِن گَب بَزَن و تمام آداشانِ این خَبَرِ جی خِیلی خوشحالی هَکُردَن. 4 وَختِی به اورشَلیم بَرِسیَن، کلیسا و رَسولان و مشایخ اوشانِ پیشواز بومَن. پولُس و بَرنابا هر اونچه خدا اوشانِ دَس هَمرهَ هَکُرده با رِه، اوشانِه باگوتِن. 5 وَلی بعضی از علمای فِرقِه فَریسی که ایمان بیارد بان، وَرِسَن، باگوتِن: «واجِبِ که اوشان خَتنِه هَبون، وَ اوشانِه دَستور هَدَئن که موسی یه شریعَتِ بِدارِن.» 6 پَس رَسولان و مشایخ جَم هَبان تا این قضیِه رِه بَررِسی هَکُنَن. 7 بعدِ اینکه خِیلی بَحث هَکُردَن، سَرآخَر پِطرُس وَرِسَه و اوشانِه باگوتِه: «اِی آداشان، شما دانین که اوَّلین روزایِ دِلِه، خدا مَرِه شِیمی میَن اِنتِخاب هَکردِه تا غیرِ یَهودیِان، می زَبانِ جی اِنجیلِ پِیغام بِشنُئَن و ایمان بیارِن. 8 وَ خُدایی که دِلِ جی خَبَر داره اوشانِ وَسین شهادت هَدَه، وَ روح القُدُسِ اوشانِه هَدَه، هَمونجور که اَمَرِه هَدَه. 9 خدا اوشانِ میِن و اَمِی میِن هیچ فرقی نُذاشته، بَلکِه ایمانِ خاطِری، اوشانِ دِلِ پاک هَکردِه. 10 پَس اَسه چِرا خَدا رِه آزمون کانین و ایتا گاجمه شاگِردانِ گردَن نَنین که نه اَما تِانِسِّیم اونِه بَکِشیم، نه اَمِی پیران؟ 11 چون اَما ایمان داریم که عیسی یه خداوندِ فیضِ هَمرهَ نِجات بِیتیم، هَمونجور که اوشان هَم بِیتَن.» 12 ایما تمام اوشانیکه اوجِه جَم بان ساکت هَبان و بَرنابا و پولُسِ گَبِ گوش هَدَئن. اوشان نِشانه ها و مُعجزاتی رِه که خدا اوشانِ دَس هَمرهَ غیرِ یَهودیِانِ میَن هَکُرد با رِه، گونه بان. 13 وَختِی اوشانِ گَب تَمام هَبا، یعقوب باگوتِه: «اِی آداشان، می گَبِ گوش هَدین! 14 شَمعونِ پطرس باگوتِه که چِطور خدا اوَّلین دَفه غیرِ یَهودیان لُطف هَکردِه و اوشانِ دِلِه ایتا قومِ خودِشِه وَسین دوجین هَکردِه. 15 این دُرس هَمونیِه که عاموسِ پِیغَمبَرِ کتابِ دِلِه بَنویشته هَبا: 16 «”بعد اَز این، وَگِردِنَم و داوود فوسِسِّه خیمه رِه دومَرتِبِه سازِنَم؛ یِدَفِه دیگَه اونِه خَرابی رِه گیرنَم، وَ اونِه خودِشِه اوَّلِ مِثان کانَم، 17 تا اوشانیکه آدَمِ نَسلِ جی بِجا بُمانِسَّن و تمام غیرِ یَهودیان که می اِسمِ خودِشانِه سَر دارِن، خُداوند دُمّال بَگِردَن. خداوند گونِه، خُداوندی که 18 این چیزان رِه قدیم جی مَعلوم هَکردِه.“ 19 «پَس می نَظر اینه، اوشانیکه غیرِ یَهودیِانِ جی خُدایِ سَمت وَگِردَنِن رِه، زَحمَت نَدیم. 20 وَلی بایِسّی ایتا نامِه یه دِلِه اوشانِ جی بِخوایم که بُتشانه قربانی خُراک، زَنا، خَفِه هَبا حیوانان گوشت و خونِ جی دوری هَکُنَن. 21 چون قدیم جی موسی هَر شَهرِ دِلِه کَسایی رِه داشتِه که اونه رَه موعظه هَکُنَن، هَمونجور که هرمُقَدَّسِ شَنبِه یه دِلِه اونِه نِوِشتِه شانِه عبادَتگاهانِ دِلِه خواندِنِن.» شورای نامِه غیرِ یهودِ ایماندارنِ وَسین 22 پَس رَسولان و مشایخ، تمام کلیسایِ هَمرهَ تَصمیم بِیتَن خودِشانِه میَن مَردِکانی رِه دوجین هَکُنَن و اوشانِه پولُس و بَرنابایِ هَمرهَ به شهرِ اَنطاکیه روانه هَکونَن. پَس یهودای مَعروف بِه بَرسابا و سیلاس که اَداشانِ میَن رَهبر بان رِه، انتخاب هَکُردَن. 23 ایما ایتا نامِه اوشانِ دَس هَدَن، که بَنوِشت با: «اَما رَسولان ومَشایخ جی که شیمی اَداشان هیسیم، به شما غیرِ یهودِ اَداشان که اَنطاکیه، سوریه و کیلیکیه یه دِلِه دَرین، سَلام! 24 اوجه یه جی که بِشنَوِسّیم کَسایی اَمِی میَنِ جی، بی اینکه اَمِی جی دَستوری بِدارِن، بومَن و شِمِرِه خودِشانِه گَبِ هَمرهَ نارحت هَکُردَن، وَ باعث هَبان شِیمی فِکر پَریشان هَبو. 25 پس اَما یکدِل اینجور صَلاح بَدییَیم که مَردِکانی رِه اِنتخاب هَکنیم و اوشانِه اَمی عَزیزان، بَرنابا و پولُسِ هَمرهَ، شِیمی وَرجه روانه هَکونیم، 26 این مَردِکان هَمرهَ که اَمِی خداوند عیسی یه مسیحِ اِسمِ خاطری، خودِشانِه جانِ خودِشانِه دَس دِلِه بَنَن. 27 پَس یهودا و سیلاسِ شِیمی وَر روانه هَکوردیم تا گَبِ هَمرهَ شِمِرِه این کارانِ جی خَبَردار هَکُنَن. 28 اَما و روح القُدُس اینجور صَلاح بَدییَیم که باری شِیمی دوشِ سَر نَنیم، بِجُز ایشان که ضَروریَن 29 بُتِشانه قربانی خُراک و خون و خَفِه هَبا حیوانان گوشت و زَنایه جی دوری هَکُنین. اَگه ایشانِ جی دوری هَکُنین، خَجیرِ کارِ کانید. سلامت هَبین.» 30 پَس اوشان رادَکِتَن، به اَنطاکیه شهر بَشَن. اوجِه کلیسای آدَمانِ جَم هَکُردَن، نامِه رِه بَرِساندَن. 31 وَختِی اوشان نامِه رِه بُخوانِسَّن، اون دِلگرمِ پِیغامِ جی خوشحال هَبان. 32 یهودا و سیلاس هَم که پیغمبر بان، خِیلی گَبایِ هَمرهَ، اَداشانِ تَشویق هَکُردَن و قوَّت هَدَن. 33 یهودا و سیلاس چَن وَخت اوجِه بُمانِسَّن، وَ ایما آداشان اوشانِه بِسلامت راهی هَکُردَن تا خودِشانِه بَرِساندِه یه وَرجه وَگِردِن. 34 وَلی پولُس و بَرنابا اَنطاکیه یه دِلِه بُمانِسَّن. 35 اوشان دیگَر ایماندارانِ هَمرهَ خداوَندِ کَلامِ تعلیم دَنِه بان و اعلام کانِه بان. پولُس و بَرنابای میَن اختلاف دَکِنِه 36 بعدِ چَن وَخت، پولُس، بَرنابا رِه باگوتِه: «اون شهرانِ دِلِه که خداوند کَلامِ اوجِه اعلام هَکُردِیم، وَگِردیم و اَداشانِ جی دیدَن هَکنیم تا بَینیم چه وَضعی دارِن.» 37 برنابا خَسِّه یوحنای مَعروف بِه مَرقُس رِه هَم خودِشانه هَمرَه بَبِرَن، 38 وَلی پولُس صَلاح نَدییَه کَسی که پامفیلیه یه دِلِه اوشانِه تَنها بَنَه و خودِشِه هَمکاری رِه اِدامِه نَدَبا رِه خودِشِه هَمرهَ بَبِرِه. 39 اوجِه پولُس و بَرنابایه میَن بَدجورِ اختلاف دَکِتِه جوریکه هَمدیگَرِ جی سیفا هَبان. بَرنابا، مَرقُس رِه بیتِه و دَریای راهِ جی به قبرسِ بَشَن؛ 40 وَلی پولُس، سیلاسِ بِیتِه و اَداشانِ دَس و خداوَندِ فیضِ هَمرهَ سَفر راهی هَبا. 41 پولُس وَختِی دَبا سوریه و کیلیکیه یه جی رَد هَبو، کلیسا شانِه تقویت کانِه با. |
@ 2024 Korpu Company