اعمال رَسولان 14 - گیله ماز

پولُس و بَرنابا قونیه دِلِه

¹ پولُس و بَرنابا قونیه یه شهرِ دِلِه هَم یَهودِ عِبادتگاهِ دِلِه بَشَن و جوری گَب بَزَن که خِیلی از یَهودیِان و یونانیِان ایمان بیاردِن.

² وَلی یهودیِانی که ایمان نیاردِ بان، غیر یهودیِانِ آنتریک هَکُردَن و اوشانِ فکرِ علیِه آداشان، مَسموم هَکُردَن.

³ پس پولُس و بَرنابا خِیلی زَمان اوجِه بُمانِسَّن و جرأتِ هَمرهَ خُداوند وَسین گَب بَزَن، خُداوندی که اوشانِه قوَّت هَدَه تا نِشانه ها بیارِن و مُعجِزات هَکُنَن، اینجوری خودِشِه فیض بَخشِ پِیغامِ تأیید کانه با.

⁴ اون شَهرِ مَردم دو دَسِّه هَبان؛ یه دَسِّه یَهودیِان طَرَفدار هَبان و یِه دَسِّه رَسولانِ طَرَفدار.

⁵ وختی غیرِ یَهودیِان و یَهودیِان خودِشانِه گَتِه شانِ هَمرهَ تَصمیم بِیتَن که پولس و برنابا رِه اَذیَت هَکُنَن و سَنگسار هَکُنَن،

⁶ پولُس و بَرنابا این جریانِ جی خَبَردار هَبان، لِسترِه و دِربه یه سَمت که لیکائونیِه یه شهرانِ جی با، وَ اون دور و اطرافِ منطقه فَرار هَکُردَن.

⁷ وَ اوجِه خُدای خَبَرِ خوشِ اعلام کِانِه بان.

پولُس و بَرنابا لِستْره یه دِلِه

⁸ لِستْره یه دِلِه ایتا مَردای نیشته با که نَتَّنِسِّه خودِشِه لِنگِ تِکان هَدِه و هیچ وَخت راه نَشَه با، چون مادَر زادی چُلاق با.

⁹ وَختِی که پولُس گَب زَنِه با، اون گوش دَنِه با. پولُس اونِه زُل بَزه و بَدییِه این ایمانِ داره که شَفا هَگیره.

¹⁰ پولُس بلَندِ صِدایِ هَمرهَ اونِه باگوتِه: «تی لِنگِ سَر راس بیَاس!» اون مَردای خودِشِه جایِ سَر بَپِّرِسِّه و رادَکِتِه.

¹¹ وَختِی مَردم اونچه که پولُس هَکُردِه با رِه بَدییَن، لیکائونی یه زبانِ هَمرهَ داد بَزَن: «خدایِان آدَمی یه مِثان اَمِی میِن جیر بومَن!»

¹² اوشان باگوتِن بَرنابا ’زئوسِ‘ و پولُس ’هِرمِسِ‘ چون پولُس با که گَب زَنِه با.

¹³ زئوسِ کاهِن که اونِه مَعبَد شهرِ دَروازِه یه دِرگایِ وَر با، چَن تا گُو و چَن دَسِه گُل شَهرِ دَروازِه یه وَر بیاردِه، اون و جَماعت خَسَّن اوشانِ وَسین قربانی هَکُنَن.

¹⁴ وَلی وَختِی اون دُتا رَسول، یَعنی بَرنابا و پولُس، این کفرِ بِشنَوِسَّن، خودِشانِه لواسان رِه چاک هَدَئن و جَماعتِ دِلِه بَشَن، داد بَزَن که:

¹⁵ «اِی مَردم، چِرا اینجور کانین؟ اَما هَم ایتا شِیمی مِثان، آدَمِیم. اَما خَبَرِ خوشِ شِمِرِه دَنیم تا این بیخِدِ کارانِ جی دَس بَکِشین و زندِه خَدا رِه ایمان بیارین که آسِمان و زَمین و دریا و اونچه که اوشانِ دِلِه دَرِه رِه، خَلق هَکردِه.

¹⁶ قَبلاً خدا تمام قومِشانِ خودِشانِ حال وِل هَکردِه که هر کُدام خودِشِه راهِ پِی بوشون،

¹⁷ وَلی با این حال خودِشه بی شَهادت نُذاشته، اون آسِمانِ جی وارِش بَرِساندَن و پُر بارِفصلهای بِبَخشیَن هَمرهَ، شِمِرِه خُوبی هَکردِه، خِیلی غذا شِمِرِه هَدَه و شِیمی دِلِ خوشحالی یه جی پُر هَکردِه.»

¹⁸ حتی این گَبانِ هَمرهَ هَم، اوشان سَختی یه هَمرهَ بَتنِسَّن مَردُمِ قربانی هَکِردنِ جلوه بِگیرِن.

¹⁹ وَلی یَهودیِان، اَنطاکیه و قونیه یه شهرانِ جی بومَن و مَردمِ خودِشانِه هَمرهَ هَمدَس هَکُردَن، پولُسِ سَنگسار هَکُردَن و این گمانِ هَمرهَ که بَمِردِه، اونِه شَهرِ جی دِرگا بَبِردَن.

²⁰ وَلی وَختِی شاگِردان اونِه دُور جَم هَبان، پولس وَرِسَه و به شَهرِ وَگرِسِّه. فَردَئی، اون و بَرنابا دِربِه یه شهرِ سَمت رادَکِتَن.

به اَنطاکیۀ وَگِرِسِّن

²¹ اوشان اون شَهرِ دِلِه هَم خَبَرِ خوشِ اعلام هَکُردَن و خِیلیان رِه عیسی یه شاگِرد هَکُردَن. ایما به لِستْره و قونیه و اَنطاکیه وَگَرِسَّن.

²² اون شَهرانِ دِلِه شاگِردانِ جانِ قُوَّت هَدَن، اوشانِه تشویق کِانِه بان خودِشانِه ایمانِ دِلِه بُمانَن و نَصیحَت کِانِه بان که «بایسّی خِیلی مصیبَتا رِه تَحمِل هَکنیم تا خُدایِ پادشاهی یه دِلِه بیشیم.»

²³ اوشان هر کلیسای دِلِه مشایخی رِه ایماندارانِ وَسین بَنَن و دُعا و روزه یه هَمرهَ اوشانِه خُداوندی که اونِه ایمان بیارد بان دَس، بِسپارِسَّن.

²⁴ ایما پیسیدیه منطقه یه جی بگذشتِن و پامفیلیه یه منطقه یه دِلِه بَشَن،

²⁵ اوشان پِرجِه یه دِلِه خُدای کَلامِ تعلیم هَدَن و اوجِه یه جی به آتّالیا بَشَن.

²⁶ آتّالیای جی کَشتی یه هَمرهَ به اَنطاکیه وَگِرِسَّن، هَموجه که ایمانداران پولُس و بَرنابا رِه خُدای فیضِ دَس بِسپارِسّه بان تا اون کاری رِه هَکُنَن که اَلان اونِه اَنجام هَدَبان.

²⁷ وَختِی پولُس و بَرنابا اوجِه بَرِسین کلیسای آدَمانِ جَم هَکُردَن، باز اوشانِ وَسین باگوتِن که خدا اوشانِ هَمرهَ چیها هَکردِه و چِطور ایمانِ دَرِ غیرِ یَهودیِان وَسین واز هَکردِه.

²⁸ ایما شاگِردانِ هَمرهَ خِیلی زَمان اوجِه بُمانِسَّن.