اعمال رَسولان 13 - گیله ماز

برنابا و شائولِ سفر اِنجیلِ پِیغامِ وَسین

¹ اَنطاکیِه کلیسای دِلِه مُعَلِمین و پیغمبَران دَبان: بَرنابا، شَمعون مَعروف بِه نیجِر، لوکیوسِ قیرَوانی، مَنائِن که هیرودیسِ حاکم ناتَنی اَداش با، وَ شائول.

² موقِه ایی که اوشان روزِه بان و دَبان خَدا رِه پَرَسِش هَکونَن، روح القُدُس باگوتِه: «بَرنابا و شائول رِه اون کارِ وَسین که مَن اوشانِه دعوت هَکُردَم، سیفا هَکُنین.»

³ ایما، بعد از روزِه و دُعا، اون دُتایِ سَر دَس بَنَن و اوشانِه سَفرِ وَسین راهی هَکُردَن.

برنابا و شائول قبرسِ دِلِه

⁴ اینجوری، اون دُتا که روح القُدُسِ طرفِ جی بَرِساندِه هَبا بان، به بَندرِ سِلوکیه بَشَن و اوجِه یه جی کَشتی یه هَمرهَ به قبرِسِ بَرِسین.

⁵ وَختِی سَلامیسِ شَهرِ دِلِه بَشَن، یَهودیِانِ عبادتگاهانِ دِلِه خُدایِ کَلامِ اعلام هَکُردَن. اوشان ”یوحَنایِ“ معروف به ”مَرقسِ“ خودِشانِه هَمرهَ بَبِردِه بان تا اوشانِه کمک هَکونِه.

⁶ اوشان تمام جزیره رِه بَگَرِسَّن تا به پافوسِ شَهر بَرِسین. اوجِه ایتا یَهودی مَردای که اونِه اِسم باریِشوع با رِه بَدییَن که دِروئی پیغَمبَر و جادوگر با.

⁷ اون رومِ فرماندار، سِرگیوس پولُسِ‘ رَفیق با. فرماندار که عاقِلِ مَردای با، بَرنابا و شائولِ خودِشِه وَر دُخوانِسِّه، چون خَسِّه خُدای کَلامِ بِشنوئِه.

⁸ وَلی اون جادوگر که اونِه اِسمِ معنی عالِم با اوشانِ هَمرهَ مُخالِفَت هَکردِه و تَقلّا کانه با نُزارِه فَرماندار ایمان بیارِه.

⁹ وَلی شائول، که اونِه پولُس هم گونه بان، روح القُدُسِ جی پِرُ هَبا، اون مَردای چِشمِ میَن رِه بِیشیِه و باگوتِه:

¹⁰ «تو اِی اِبلیسِ وَچِه، تو اِی تمام خوبیان دشمن، اِی که مَکر و فَریبِ جی پُری، اینه جی که خُداوند راسِ راها رِه کَج هَکونی دَس نَکِشِنی؟

¹¹ بِدان که خُداوند دَس تی بَزَئنِ وَسین تی سَرِ وَر دَرِه. اَسه کور بونی و تا چَن وَخت آفتابِ نَینی.» دَرجا، اونِه چِشم تیرِه و تار هَبا، خودِشِه دور چَرخِسِّه و ینَفَرِ دُمّال گَردِنِه با که اونِه دَسِ بَگیرِه و را رِه اونِه نَشان هَدِه.

¹² وَختِی فرماندار این جریانِ بَدییِه، ایمان بیاردِه، چون تَعلیمی که خُداوند بارِه دَنِه بانِ جی بُهت هَکُردِه با.

پولُس و بَرنابا اَنطاکیِه دِلِه

¹³ پولس و اونِه هَمراهان دَریای راهِ جی، پافوس جی به پِرجِه بَشَن که پامفیلیِه منطقه یه دِلِه با. وَلی اوجِه یوحنای معروف به مَرقُس اوشانِ جی سیفا هَبا وبه اورشَلیمِ وَگرِسِّه.

¹⁴ وَلی اوشان پِرجِه یه جی رَد هَبان وبه اَنطاکیۀ پیسیدیه منطقه بَرِسین. مُقَدَّس شَنبِه روز، عبادتگاهِ دِلِه بومَن و بنیشتَن.

¹⁵ بعدِ اینکه تورات و پِیغمبَران نِوِشتِه رِه بُخوانِسَّن، عبادتگاهِ رَئیسان اوشانِ وَسین پِیغام روانه هَکوردَن و باگوتَن: «آداشان، اَگه گَبی دارِین که مَردمِ تشویق کانِه، باگویید.»

¹⁶ پولُس وَرِسَه و دَس هَمرهَ اِشارِه هَکردِه، باگوتِه: «اِی یهود مَردم، وَ شما اِی خُداتَرسان، گوش هَدین!

¹⁷ این یَهود قومِ خدا، اَمِی پیرانِ اِنتخاب هَکردِه و اون موقِه ایی که اَمِی قومِ مصر مِلکِ دِلِه غریب بان رِه سَربُلَن هَکردِه، وَ قوَّتِ هَمرهَ اوشانِه اون مِلکِ جی دِرگا بیاردِه،

¹⁸ وَ نزیکِ چِهل سال صحرای دِلِه اوشانِه تَحمل هَکردِه.

¹⁹ اون بعدِ اینکه هَفتا قوم که کَنعان دِلِه دَبان رِه از بِین بَبِردِه، اوشانه مِلک رِه به اوشان اِرثیِه هَدَه.

²⁰ این جریان حدودِ چهار صد و پَنجاه سال طول بَکشیِه. «بعدِ اون، خدا تا سَمَوئیلِ پِیغَمبرِ دورِه، داوَران اوشانِه هَدَه.

²¹ ایما اوشان ایتا پادشاه بِخَسَّن و خدا، شائول، قِیسِ ریکا، بنیامینِ قَبیلِه یه جی رِه اوشانِه هَدَه، که چِهل سال حکومت هَکردِه.

²² بعدِ اینکه شائول برکِنار هَبا، داوودِ اِنتخاب هَکردِه تا اوشانِ پادشاه هَبو، وَ اونِه بارِه شهادت هَدَه و باگوته: ”من داوود یِسی یه ریکا رِه، مَردی بَدییَم که خیلی می دِل نیشِنِه، اون تمام می خواسِّه رِه بِجا هارنِه.“

²³ «خدا طِبق خودِشِه وَعدِه، این مَردای یه نَسلِ جی، یَهودِ قومِ وَسین ایتا نِجات دهندِه یعنی عیسی رِه بیاردِه.

²⁴ پیش از اینکه عیسی بییِه، یحیی تمام یَهودِ مَردُمِ وَسین غسلِ تَعمیدِ توبِه رِه اعلام کانِه با.

²⁵ وَختِی یحیی خودِشِه خِدمَتِ تَمام کانِه با، باگوتِه مَرِه کی دانید؟ مَن اون نیَم، بَلکِه اون بعدِ مَن هَنِه و مَن حتّی لایق نیَم اونِ چَمیشِ بَنِّ واز هَکُنَم.“

²⁶ «اِی آداشان، اِی ابراهیم وَچِهانِ نَسل، وَ اِی خداتَرسانی که شِیمی میِن دَرِن! این نِجاتِ پِیغام اَمِی وَسین روانه هَبا.

²⁷ چون اورشلیمِ مَردم و اوِشانِ گَتِ عیسی رِه نِشناختِن، وَ پِیغَمبَرانِ گَبِ شانِه که هر مُقَدَّسِ شَنبِه اوشانِ وَسین خواندِه بونِه با رِه نِفَهمِسَّن. اوشان اونِه مَحکوم هَکُردنِ هَمرهَ پیغَمبَرانِ گَبِ شانِه به اَنجام بَرِساندِن.

²⁸ هر چَن اوشان هیچ دَلیلِی اونِه بَکوشتن وَسین پیدا نَکوردَن، پیلاتُسِ جی بِخَسَّن اونِه اعدام هَکونِه.

²⁹ وَ وَختِی تمام اونچه که اونِه باره بَنویشته هَبا با رِه، اَنجام هَدَن، اونِه صَلیب جی جیر بیاردِن، مقَبره یه دِلِه بَنَن.

³⁰ وَلی خدا اونِه مُردِگانِ جی زندِه هَکردِه.

³¹ خیلی روزان عیسی خودِشه اوشانِ رَه که اونِه هَمرهَ جلیلِ جی اورشلیمِ سَمت بوما بان ظاهر هَکردِه، که اَلانَم اوشان قومِ وَسین اونِه شاهِدانَن.

³² «اَسه اَما این خَبَر خوشِ شِمِرِه دَنیم که خدا اونچه که اَمِی پیرانِ وَعدِه هَدَه با رِه،

³³ عیسی یه زندِه هَکردَنِ هَمرهَ، اَمِی وَسین که اونِه وَچِهانیم وَفا هَکردِه. هَمونجور که دوّمین مزمورِ دِلِه بَنویشته هَبا: «”تو می ریکائی؛ امروز، مَن تِرِه مولود هَکُردَم.“

³⁴ «خدا اونِه مردگانِ جی زندِه هَکردِه تا دِ هرگز فِسادِ نَینِه، خدا اینجور باگوتِه: «‌”مَن مُقَدَّس و مطمئنِ بَرکات که داوودِ وعدِه هَدَه هَبا رِه، شِمِرِه دَنَم.“

³⁵ وَ هَمینجورَم ایتا دیگَر مَزمور دِلِه گونِه: «تو نُزارنی تی مُقَدَّس، فِسادِ بَینِه.“

³⁶ «داوود بعدِ اونکه خُدایِ اِراده یه هَمرهَ خودِشِه دورِه یه مَردمِ خِدمت هَکردِه، بَمِردِه و خودِشِه اَجدادِ مُلحق هَبا، و فِسادِ بَدییَه.

³⁷ وَلی اونیکه خدا اونِه زندِه هَکردِه، فِسادِ نَدییَه.

³⁸ «پَس، اِی آداشان، بِدانین که این مَردای یه طریقِ جی گناهان آمرزِش شِمِرِه اعلام بونِه.

³⁹ اَسه هر کی عیسی رِه ایمان بیارِه، اونِ طَریق صالِح بِشمارِسِّه بونِه، هر اونچه یه دِلِه که نَتِّنِسین موسایه شَریعَت طَریق صالِح بِشمارِسِّه هَبین.

⁴⁰ پس بِپّائین پِیغَمبَرانِ این بَنویشته شِیمی سَر نیِه که گونِه:

⁴¹ «”بِیشین، اِی کسایی که مسخره کانین، بُهت هَکُنین و نابود هَبین، چون شِیمی روزگارِ دِلِه کاری کانَم، که هر چی اونِه شیمی وَسین تعریف هَکُنَن هَرگز باوَر نُکانین.“

⁴² وَختِی پولُس و بَرنابا عِبادَتگاهِ جی دِرگا شونه بان، مَردم اوشانِ جی خَواهِش هَکُردَن که شَنبِه بعدی هم این جَریانِ بارِه اوشانِ وَسین گَب بَزِنَن.

⁴³ بعدِ اینکه جَماعَت عِبادَتگاهِ جی بَشَن، خِیلی از یَهودیِان و اون خداپَرَس مَردم که یَهودی هَبا بان، پولُس و بَرنابای دُمّالسَر رادَکِتَن. پولُس و برنابا این دَسِّه یه هَمرهَ گَب بَزَن و اوشانِه تشویق کانِه بان که خُدای فیضِ دِلِه اِدامِه هَدِن.

⁴⁴ شَنبِه بَعدی، حدوداً، تمام مَردم شَهر جَم هَبان تا خداوَندِ کَلامِ بِشنُئِن.

⁴⁵ وَلی وَختِی یَهودیِان جَماعتِشانه بَدییَن، حَسودی یه جی پُر هَبان و بی حِرمتی یه هَمرهَ پولُس گَبانِ هَمرَه مُخالِفَت کِانِه بان.

⁴⁶ ایما پولُس و بَرنابا جُرأتِ هَمرهَ باگوتِن: «لازِم با خُدای کَلام هَمِه جی پیشتر شِمِرِه باگوتِه هَبو. وَلی وَختِی اونِه رَد هَکوردین و شِمِرِه اَبَدی زندگی یه لایِق ندانِسّید، پَس اَلان اَما غیرِ یَهودیِان سَمت شونیم.

⁴⁷ چون خُداوَند اَمَرِه اینجور باگوتِه که: «”مَن تِرِه غیرِ یَهودیِانِ وَسین نُور بِساتِم، تا نِجاتِ دُنیای چهار سو بَرِسانی.“

⁴⁸ وَختِی غیر یهودیان اینه بِشنَوِسَّن، خوشحال هَبان و خداوَندِ کَلامِ حُرمَت بَنَن، وَ اوشانیکه اَبدی زندگی یه وَسین اِنتخاب هَبا بان، ایمان بیاردِن.

⁴⁹ اینجوری خداوَندِ کَلام تمام اون مَنطقه یه دِلِه دَپیتِه.

⁵⁰ وَلی یَهودیِان، متِعَصِب و سَرشِناسِ زِناکان و شهرِ مَرداکان که رَهبر بان رِه آنتِریک هَکُردَن و اوشان پولُس و بَرنابا رِه اَذیت و آزار هَکُردَن. پس پولُس و بَرنابا رِه اون مَنطقه یه جی دِرگا هَکُردَن.

⁵¹ اوشان هَم اون شَهرِ خاکِ خودِشانِه لِنگِ جی بِتِکاندِن و به شَهرِ قونیه بَشَن.

⁵² شاگِردِان روح القُدُس و خوشحالی یه جی پُر بان.