اعمال رَسولان 11 - گیله ماز

پِطرس کلیسا رِه گُزارِش دَنِه

¹ رَسولان و اَداشان، تمام یَهودیِه منطقه یه دِلِه بِشنَوِسَّن که غیر یَهودیِان هم خُدای کَلامِ قَبول هَکُردَن.

² پَس وَختِی پِطرُس به اورشَلیمِ وَگَرِسِّه، اون گروهی که خَتنِه هَبوسَّنِ طرفدار بان ایراد بِیتَن و باگوتِن:

³ «تو خَتنِه نَبوسّه شانه سِرِه یه دِلِه بَشَیی و اوشانِ هَمرهَ غذا بُخاردی.»

⁴ پِطرُس تمام جَریانِ از اوَّل تا آخر اوشانِ وَسین تَعریف هَکردِه، باگوتِه:

⁵ «مَن یافایِ شهرِ دِلِه دَبام دُعا هَکونَم که خَلسِه یه دِلِه ایتا رویا بَدییَم یِچّی ایتا گَتِ سُفرِه یه مِثان که چهار گوشه جی آویزان با می وَسین آسِمانِ جی جیر بوما.

⁶ وَختِی خوب بِیشییَم، حِیوانان و وَحشی جانداران و خَزَندِگان و پَرَندِگانِ اونه سَر بَدییَم.

⁷ ایما ایتا صِدا می گوش بَرِسیِه که باگِوتِه: ”پِطرُس، وَرِس، سَر بَبین و بُخار.“

⁸ «وَلی مَن جَواب هَدَم: اصَلاً، خُداوندا، چون مَن هیچ وَخت حَرام و نَجِسِ چیرِه تُک نَزَنَم.“

⁹ «دوّمین دَفِه آسِمانِ جی صِدا بوما که ”اونچه خدا پاک هَکردِه رِه تو نَجِس نِشمار.“

¹⁰ وَ این دَستور سِه دَفِه تِکرار هَبا؛ ایما تمام اون چیزان آسِمانِ سَمت جآر بَشَه.

¹¹ «هَمون موقِه، سِه نَفَر که قِیصَریِه شهرِ جی می وَر بَرِساندِه هَبا بان، اون سِرِه یه دِلِه که دَبام بَرِسین.

¹² خُدایِ روح مَرِه باگوتِه اوشانِ هَمرهَ بوشوم و فَرق نَنَم. این شیش تا اَداش هَم می هَمرهَ بومَن، وَ اَما اون مَردای یه سِرِه بَشَیم.

¹³ اون اَمَرِه تَعریف هَکردِه که چِطور خودِشِه سِرِه یه دِلِه ایتا فِرِشتِه بَدییِه که اونِه باگوتِه: ”چَن نَفَرِ به یافا روانه هَکون و شَمعون مَعروف بِه پِطرُسِ ایجه بیار.

¹⁴ اون تی وَسین ایتا پِیغام هارنِه که اونه خاطری تو و تی خانِوادِه نِجات گیرِنین.“

¹⁵ «وَختِی گب بَزَئن شِروع هَکُردَم، روح القُدُس اوشانِ رَه بوما، دُرس هَمونجور که اوَّل اَمَرَه بوما با.

¹⁶ ایما خُداوند گَبِ می یاد بیاردم که باگوته با: ”یحیی اُویه هَمرهَ غسلِ تعمید دَنِه با وَلی شما روح القُدُسِ هَمرهَ تعمید گیرِنین.“

¹⁷ پس اَگه خدا اوشان رِه هَمون هَدیه ایی رِه هَدَه که اَمَرِه هَدَه اون موقِه که اَما عیسی یه مَسیحِ خداوندِ ایمان بیاردیم، من کی بام که بِتَّنَم خُدای کارِ جلوه هَگیرَم؟»

¹⁸ وَختِی اوشان این گَبا رِه بِشنَوِسَّن، ساکِت هَبان و خَدا رِه جلال هَدَن و باگوتَن: «پس خدا غیر یَهودیِان رِه هم فُرصت هَدَه تا اوشان هَم خودِشانِه گناهانِ جی توبه هَکُنَن و اَبدی زِندگی رِه بِدَس بیارِن!»

اَنطاکیه کِلیسا

¹⁹ اون ایماندارانی که بعد از اِستیفانِ اَذیت و آزار پَخش و پَلا هَبا بان، تا فینیقیه و قبرس و اَنطاکیه یه سَمت سَفر هَکُردَن. اوشان فقط خُدای کلامِ یَهودیان اِعلام کانِه بان و بَس.

²⁰ وَلی اوشانِ میَن چَن نَفر قِبرس و قیرَوانِ آدَمانِ جی دَبان، اوشان وَختِی که اَنطاکیه دِلِه بَرِسیَن یونانیِان هَمرهَ هَم گَب بَزَن و عیسی یه خُداوند خَبَرِ خوشِ اوشانِه هَدَن.

²¹ خداوَندِ دَس هَم اوشانِ هَمرهَ دَبا و خِیلیان ایمان بیاردِن و خداوَندِ مُلحَق هَبان.

²² وَختِی این خَبَر اورشَلیمِ کلیسا رِه بَرِسیِه، بَرنابا رِه به اَنطاکیِه روانه هَکوردَن.

²³ وَختِی بَرنابا اوجِه بَرِسیِه و خُدایِ فیضِ بَدییِه، خوشحال هَبا و هَمِه رِه تَشویق هَکردِه تا تمام دِلِ هَمرهَ خُداوَند وفادار هَبون،

²⁴ چون بَرنابا خُجیرِه مَردای با، اون ایمان و روح القُدُسِ جی پُر با. اینه وَسین ایتا گَتِ جَماعت خُداوندِ ایمان بیاردِن.

²⁵ پس بَرنابا، به شهرِ تارسوس بَشَه تا شائولِ پیدا هَکونِه.

²⁶ وَ وَختِی اونِه پیداهَکوردِه، اونِه به اَنطاکیه بیاردِه. اوشان اوجِه یِک سال تَمام کلیسای آدَمانِ هَمرهَ جَم بونه بان و ایتا گَتِ جَماعتِ تَعلیم دَنِه بان. اَنطاکیه دِلِه با که اَوَّلین دَفِه عیسی یه شاگِردِانِ ’مَسیحی‘ باگوتِن.

²⁷ اون روزان چَن تا پیغمبر اورشَلیمِ جی به اَنطاکیه بومَن.

²⁸ ایتا از اوشان که اونه اِسم آگابوس با، وَرِسَه و خُدای روحِ هَمرهَ پیشگویی هَکردِه که تمام دُنیای دِلِه بَدجور قَحطی هَنِه. این قَحطی کلودیوسِ امپراطوریه حُکومَتِ دورِه اِتِّفاق دَکِتِه.

²⁹ پَس شاگِردِان تصمیم بِیتَن هر کدام خودِشانه توانِ قَدَر یهودیه یه اَداشانِ وَسین کمک روانه هَکونَن

³⁰ پس اینجور هَکُردَن و اون هدایایی رِه که جَم هَکُردِ بان رِه بَرنابا و شائولِ هَدَن تا مَشایِخِ دَس بَرِسانِن.