اعمال رَسولان 10 - گیله ماز

پِطرس و کُرنِلیوس

¹ قیصریِه شَهرِ دِلِه ایتا رومی اَفسَر زِندگی کانِه با که اونِه اِسم کُرنِلیوس با، اون رومِ گُردان فرمانده، معروف به ’ایتالیایی گُردان‘ با.

² کُرنِلیوس ایتا دیندارِ مَردای با و تمام اونِه خانِواده خُدا تَرس بان. کُرنِلیوس دَس و دِل بازی یه هَمرهَ فَقیرانِ صَدَقِه دَنِه با و هَمیشه خُدای پِیش دُعا کانِه با.

³ ایتا روز حدودِ ساعتِ سه بعد از ظهر، رویای دِلِه واضِح بَدییِه که خُدایِ ایتا فِرِشتِه اونِه وَرجه بوما و باگوتِه: «کُرنِلیوس!»

⁴ کُرنِلیوس تَرسِ هَمرهَ اونِه بِیشیِه و باگوتِه: «چی خَنی باگویی، آقا؟» فِرشته باگوتِه: «تی دُعاها و صَدَقِه ها ایتا هَدیه یادگاری مِثان خُدایِ وَر بَرسییَه.

⁵ اَلَان چَن نَفَرِ یافایِ شهرِ سَمت روانه هَکون و شَمعونِ مَعروف به پطرسِ ایجه بیار.

⁶ اون ایتا دَبّاغِ وَرجه که اونِه اِسم شَمعونِ و اونِه سِرِه دَریاکِنار هیسه، مِهمانِ.»

⁷ وَختِی فِرِشتِه ایی که اونِه هَمرهَ گَب زَنِه با اونِه وَرِ جی بَشَه، کُرنِلیوس دُتا از خودِشِه پاکاران و ایتا اَز خودِشِه سِپاهیانِ سرباز که وفادارِ مَردای با رِه خودِشِه وَر دُخوانِسِّه.

⁸ کُرنِلیوس تمام جَریانِ اوشانِه باگوتِه و اوشانِه یافایِ سمت روانه هَکوردِه.

⁹ فَردَئی، ظُهر موقِه، وَختِی راه دِلِه دَبان و شَهرِ نَزیک بونه بان، پِطرس سِرِه یه پُشت بامِ سَر بَشَه تا دُعا هَکونِه.

¹⁰ پِطرسِ اوجِه وَشنا هَبا و خَسِّه یِچی بُخارِه. وَلی وَختِی دَبان غَذا رِه آمادِه کانِه بان، خَلسِه یه دِلِه بَشَه.

¹¹ همون حالِ دِلِه بَدییَه که آسِمان واز هَبا و یِچّی ایتا گَتِ سُفرِه یه مِثان که اونِه چهار گوش آویزان با زَمین سَمت جیر هَنِه،

¹² اون سُفرِه یه سَر هَمِه جور حیوانان و خَزَندِگان و پرندِه شان پُرِن.

¹³ ایما ایتا صِدا اونِه گوش بَرِسییَه که: «پِطرُس، وَرِس، سَر بَبین و بُخار!»

¹⁴ پِطرُس باگوتِه: «اَصلاً، خُداوندا، چون مَن هیچ وَخت حَرام و نَجِسِ چیرِه تُک نَزَم.»

¹⁵ بازهَم اون صِدا دوّمین دَفِه بوما که «اونچه خدا پاک هَکردِه رِه تو نَجِس نِشمار!»

¹⁶ این رویا سِه دَفِه تِکرار هَبا و ایما دَرجا سُفرِه آسِمانِ سمت جآر بَشَه.

¹⁷ پطرس هَمون حال که تَعَجِبِ هَمرهَ رویای معنی فِکر دَبا، اوشانیکه کُرنِلیوس روانه هَکوردِه با شَمعونِ سِرِه رِه پیدا هَکوردَن و سِرِه یه دَرِ وَر بَرِسییَن.

¹⁸ اوشان بلَندِ صِدای هَمرهَ گونه بان: «اون شَمعونِ مَعروف به پِطرس ایجه دَرِه؟»

¹⁹ هَمونجور که پِطرُس دَبا رویای بارِه فِکر کانِه با خدایِ روح اونِه باگوتِه: «بِیش، سِه نَفر تی دُمّال گَردِنِن.

²⁰ وَرِس جیر بوشو و شَک نَکُن که اوشانِ هَمرهَ بیشی، چون مَن اوشانِه روانه هَکوردَم.»

²¹ پِطرُس جیر بَشَه و اوشانِه باگوتِه: «مَن هَمونمِ که اونِه دُمّال گَردِنین. چیه وَسین بومَین؟»

²² اوشان باگوتِن: «کُرنِلیوس فَرماندِه اَمَرِه روانه هَکوردِه. اون آدَمِی دُرسکار و خُداترسِ و تمام ِیهود قوم اونِه خُوبی رِه گونِن. اون ایتا مُقَدَّسِ فِرِشتِه یه جی دَستور بِیتِه که تی دُمّال بَرِسانِه و تِرِه خودِشِه سِرِه دَعوَت هَکونِه و تی گَبِ بِشنُئِه.»

²³ پس پِطرُس اوشانِه سِرِه یه دِلِه بَبِردِه تا اون مِهمان هَبون. فردئی پِطرس وَرِسَه اوشانِ هَمرهَ رادَکِتِه. چَن تا یافایِ شهرِ اَداشان هم اونِه هَمرهَ بَشَن.

²⁴ فردَئی به شهرِ قیصریه بَرِسین. کُرنِلیوس خودِشِه فامیلِان و نَزیکِ رَفیقانِ جَم هَکُردِ با و اوشانِ چِش بِرا با تا بیئِن.

²⁵ وَختِی پِطرُس سِرِه یه دِلِه بوما، کُرنِلیوس اونِه پِشواز بَشَه و اونِه لنگ دَکِتِه و اونِه پَرَسِش هَکردِه.

²⁶ وَلی پِطرُس اونِه وَرِسانده و باگوتِه: «وَرِس؛ مَنَم ایتا آدَمِم.»

²⁷ ایما هَمونجور که اونِه هَمرهَ گَب زَنِه با سِرِه یه دِلِه بوما و بَدییِه که خیلی آدَم اوجِه جَم هَبان.

²⁸ پِطرُس اوشانِه باگوتِه: «شما خُدِتان دانید یَهودیِان وَسین جایز نیِه که ایتا دیگَر قومِ هَمرهَ معاشِرَت هَکُنَن یا اوشانِ سِرِه بوشونِ. وَلی خدا مَرِه نِشان هَدَه که نباید هیچکَسِ نَجِس یا ناپاک باگوم.

²⁹ پَس وَختِی می دُمّال روانه هَکوردین، بدون اینکه مخالفتی هَکُنَم بومَم. اَسه باگویید، چیه وَسین می دُمّال روانه هَکوردین؟»

³⁰ کُرنِلیوس جواب هَدَه: «چهار روز پیش هَمین موقِه، ساعتِ سه بَعد از ظهر، می سِرِه یه دِلِه دُعا کانه بام که یدَفِه ایتا مَردای که ایتا نورانی قَوا داشتِه می پِیش بییَسَه

³¹ و باگوتِه: ”کُرنِلیوس، تی دُعا مستَجاب هَبا و صَدَقِه هایی که دَنِه بِیی رِه خدا خودِشِه یاد بیاردِه.

³² اَسه چَن نَفَربه یافا روانه هَکون و شَمعونِ مَعروف به پِطرُسِ ایجه بیار. اون شَمعون دَبّاغِ وَرجه که اونِه سِرِه دَریاکِنار هیسه مِهمانِه.“

³³ پس دَرجا تی دُمّال روانه هَکوردَم و تو هم لُطف هَکُردی و بومَیی. اَسه اَما هَمِه خُدای پِش حاضِریم تا هَر چی خُداوند تِرِه دستور هَدَه، بِشنُئیم.»

³⁴ ایما پِطرُس خودِشِه گَبِ اینجور شِروع هَکردِه: «اَسِه بِفَهمِسَّم که راس راسی خدا مَردُمِ میَن هیچ فَرقِی نُذاشته؛

³⁵ بَلکِه هر قومِ جی، هر کی که خُدایِ جی بَترسِه و اون چیرِه که دُرُسِّه رِه انجام هَدِه، خدا اونِه قبول کانِه.

³⁶ خدا طبق خودِشِه کَلام که یَهودِ قومِ وَسین روانه هَکورده صلح و سلامتی یه خَبَرِ خوشِ عیسی یه مسیح طَریق که همه یه خداوند هیسه اعلام هَکردِه.

³⁷ شما خُدِتان دانید که چِطور این کار بَعد از تَعمیدی که یَحیی اونِه موعظِه کانِه با جَلیلِ دِلِه شِروع هَبا و تمام یَهودیه یه دِلِه پَخش هَبا،

³⁸ وَ خدا چِطور عیسی یه ناصری رِه روح القُدُس و قدرَتِ هَمرهَ مَسح هَکردِه، جوریکه هَمِه جا گَردِنِه با و خُجیرِه کار کانِه با و تمام اوشانیکه اِبلیسِ ظُلمِ جیر دَبان رِه شَفا دَنِه با، اینه وَسینِ که خدا اونِه هَمرهَ دَبا.

³⁹ «وَ اَما تمام اون کارایی که اون یَهودِ مِلک و اورشَلیمِ شهرِ دِلِه هَکُرده یه شاهِدیم. اوشان اونِه صَلیب بَکِشین، بَکوشتن.

⁴⁰ وَلی خدا اونِه سِوّمین روز زندِه هَکردِه و ظاهِر هَکردِه،

⁴¹ وَلی نه تمام مَردُمِ وَسین، بَلکِه اَمِی وَسین که خُدای طرفِ جی اِنتخاب هَبا بِیم که شاهِدان هَبیم، اَمایی که بَعدِ اینکه مُردِگانِ جی زندِه هَبا، اونِه هَمرهَ بُخاردِیم و بَنوشییَم.

⁴² اون اَمَرِه دَستور هَدَه تا این حَقیقَتِ قومِ وَسین اعلام هَکنیم و شَهادَت هَدیم که خدا اونِه اِنتخاب هَکردِه تا زندِه شان و مُردِشانِ داوَر هَبو.

⁴³ تمام پِیغَمبَران عیسی یه بارِه شَهادَت دَنِن که هر کی اونِه ایمان بیارِه، اونِه اِسم هَمرَه اونِه گُناهان آمُرزیدِه بونِه.»

⁴⁴ هَلَه پِطرسِ گَب تَمام نَبا با که روح القُدُس تمام اوشانِ سَر که این پِیغامِ اِشنَوِسَّن، بوما.

⁴⁵ اون ایماندارانی که اَهل خَتنِه بان یَعنی اوشانی که اِصالَتاً یَهودی بان و پِطرسِ هَمرهَ بوما بان، وَختِی بَدییَن روح القُدُس حتّی غیر یَهودیِان سَر هم بوما، مات و مَبهوت بُمانِسَّن.

⁴⁶ چون اِشنَوِسَّن که اوشان دیگَر زَبانانِ هَمرهَ گَب زَنه بان و خَدا رِه جَلال دَنِه بان. ایما پِطرُس باگوتِه:

⁴⁷ «اَسه که ایشان اَمِی مِثان روح القُدُس بِیتَن، کی تانه می جلوه هَگیره که چِرا اوشانِ غسلِ تَعمید دَنَم؟»

⁴⁸ پس دَستور هَدَه اوشانِه به اِسمِ عیسی یه مَسیح تَعمید هَدَن. ایما پِطرُسِ جی بِخَسَّن چَن روزی اوشانِ وَرجه بُمانِه.