سوّم یوحنا 1 - گیله ماز

¹ شیخِ جی، بِه عزیزِ گایوس که مَن اونِه ’حَقیقَتِ‘ دِلِه دوس دارَم.

² اِی عزیز، می دُعا اینه که همه چی شِمِرِه خوُب پِیش بوشو و سَلامت هَبین، وَ هَمینجور تی جان هَم سلامتی یه دِلِه دَبو.

³ چون خوشحال هَبام اون موقِه که اَداشان بومَن و تی وفاداری رِه که حقیقتِ دِلِه زندگی کانی رِه گَواهی هَدَئن.

⁴ هیچی مَرِه اینه جی بیشتر خوشحال نُکانه که بِشنُئَم می وَچِهان ’حَقیقَتِ‘ دِلِه زندگی کانَن.

⁵ اِی عزیز، تو تمام کارانِ دِلِه اَداشانِ وَسین، تیِ اَمانتِ نِشان دَنی، بِخصوص اینکه تی ور غَریبه هیسَن.

⁶ ایشان هَم کلیسایِ ورجه تی مُحبتِ گُواهی هَدَئن؛ پَس خوُب کاری کانی اَگه ایشان رِه اونجوریکه خُدایِ شَأنِ، سفر وَسین راهی هَکُنی.

⁷ چون ایشان اون اِسمِ خاطِری سَفر هَکُردَن و غیرِ یهودیِانِ جی هیچ کُمکی نِیتَن.

⁸ پَس اَما بایسّی اینجور آدَمان مِثان رِه کُمَک هَکُنیم تا بَتَّنیم اوشانِه هَمرَه حَقیقَتِ وَسین هَمکار هَبیم.

⁹ مَن یِچّی کلیسایِ وَسین بَنویشتَم، وَلی دیوتْرِفیس که دوس دارِه خودِشِه اوّل بِدانه، اَمیی اِقتدارِ اَهمیَت نَدَنِه.

¹⁰ پَس اگه مَن بییَم، کارایی که اون کانه رِه رسیدگی کانَم، چون غَرَضِ هَمرَه اَمی بَدی رِه گونِه، به این هَم قانع نَبا، اَداشان رِه هَم قبول نُکانه؛ وَ اون اَداشانی هَم که خَنِن اوشانه قَبول هَکُنَنِ جُلوهِ گیرنِه و کلیسای جی دِرگا کانه.

¹¹ اِی عزیز، بَدی رِه تیِ سَرمَشق نَکُن، بلکه خوبی یه جی سَرمَشق بِگیر، اونیکه خُجیرِ کار کانه خُدایِ جییه، وَلی اونیکه بَدِ کار کانه خُدا رِه نَدیَه.

¹² هَمه دیمیتریوسِ بارِه خوبِ گَواهی دَنِن، حتّی خُدِ حَقیقت. اَما هَم اینجور گَواهی دَنیم و دانی که اَمیی گَواهی راسِه.

سَرآخر

¹³ خِیلی چیزان داشتَم تِرِه بَنویسَم، وَلی نَخَنَم قَلَم و مُرَکّبِ هَمرَه هَبو.

¹⁴ اُمید دارَم خِیلی زود تِرِه بِینَم و رُو دَر رُو گَب بَزِنیم.

¹⁵ سَلامت هَبین! رَفِیقان تِرِه سَلام رِساندِنَن. تَک تَکِ رَفیقانِ به اِسم سَلام بَرِسان.