دوم تیموتائوس 4 - گیله مازخُدایِ کلامِ اعلام هَکُردَن 1 مَن خُدا و مسیحْ عیسی یِه وَرجهِ که مُردِگان و زندهِ شانِ داوری کانه، وَ اونه بَموُئَن و پادشاهِی یه خاطری، تِره سِفارش کانَم که 2 خُدایِ کلامِ اعلام هَکُنی و وخت و بی وخت این کارِ وَسین آماده هَبی، و خیلی صبر و کاملِ تعلیم هَمرَه، اصلاح و سرامکو و تَشویق هَکُنی. 3 چون موقِه ایی رَسِنه که مَردُم دُرسِّ تعلیمِ گوش نَدِنِن، بلکه مُعَلِمینی رِه خودِشانِ دُورو وَر جَم کانَن تا اونچه رِه اوشانه جی بِشنُئَن که اوشانه گوش دوس داره بِشنوئهِ؛ 4 و اوشان خودِشانِه دیمِ حَقیقَتِ گوش هَدَئنِ جی وَگِرداندِنِن و اَفسانه هایِ سمت وَگِردِنِن. 5 وَلی تو همه چی یه دِلِه هوشیار هَبو؛ عذابِشانِ طاقت بیار؛ انجیلِ اعلام هکُردنِ کارِ انجام هَدِه و تی خِدمَتِ کاملاً به انجام بَرِسان. 6 چون اَلآنَم می خون ایتا پیشکَش هَبا شرابِ مِثان دَرِه بَریخته بونه و می رَفتنِ موقِه این دُنیایِ جی بَرِسیِه. 7 مَن خُجیرِ جَنگ دِله بَجِنگِسَّم، می مُسابِقه رِه تَمام هَکُردم و می ایمانِ حفظ هَکُردم. 8 اَسِه، اون صالحی یه تاج می وَسین آمادِه هیسِه، تاجی که خداوند، اون عادلِ داوَر، اون روزِ دِلِه مَرِه دَنه - نه فقط مَرِه، بلکه تمام اوشانیکه اونه ظهورِ شوقِ داشتِن. آخرین سِفارشا 9 تقلّا هَکُن هر چه زودتر می وَرجه بیئَیی. 10 چون دیماس این دُنیایِ دوس داشتَنِ خاطِری مَرِه وِل هَکُردِه و تِسالونیکی یه شهر بَشَه. کْریسکیس غَلاطیه یه منطقه و تیتوس هم دَلماتیه یه منطقه بَشَه. 11 فقط لوقا می هَمرَه دَرِه. مَرقُسِ بَگیر و تیِ هَمرَه بیار، چون اون می خِدمَت وَسین خیلی بِکار هَنه. 12 تیخیکوسِ اَفِسُسِ شهر روانه هَکُردَم. 13 وختی دَری بییَیی، می قَوا رهِ که تْروآسِ شهرِ دِلهِ کارپوسِ ور جا بَنَم، تیِ هَمرَه بیار، وَ کِتابها و بِخصوص طومارها رِه هم تیِ هَمرَه بیار. 14 اسکندر مِسگر، مَرِه خِیلی بَدی هَکُردِه؛ خداوند اونه کارانِ سِزا رِه دَنهِ. 15 تو هَم اونه جی دوری هَکُن، چون اَمی پِیغامِ هَمرَه بَدجور مخالِفت هَکُرده. 16 می اوَّلین دفاعِ دِلِه، هیچکی می پُشت دَر نومَه، بلکه هَمِه مَرِه وِل هَکُردنِ. نَکُنِه این اوشانه حِساب بَنوِیشتِه هَبو. 17 وَلی خداوند می هَمرَه با و مَرِه قُوَّت هَدَه تا اون پِیغام می طریقِ جی کاملاً اعلام هَبو و تمام غیرِ یهودیِان اونِهِ بِشنوئَن. و اینجوری شیرِ دَهِنِ جی دَر بَشَم. 18 خداوند مَرِه هر بَدِ کارِ جی آزاد کانه و مَرِه سلامتی یه هَمرَه خودشه آسِمانی پادشاهی یه وَسین نجات دَنِه. جلال تا اَبد و تا اَبد اونه وَسین هَبو. آمین! آخرین سلام ها 19 پْریسکیلا و آکیلا و اونیسیفوروسِ خانوادهِ یه وَسین سلام بَرِسان. 20 اِراستوس، قُرِنتُسِ شهرِ دِلهِ بُمانسِّه، وَ مَن تْروفیموس که ناخوش با رِه، میلیتوسِ شهرِ دِلِه جابَنَم. 21 تقلّا هَکُن پِیش اَز زِمِسّان ایجه بَرِسی. یوبولوس، پودِنْس، لینوس، کْلودیا و تمام اَداشان تی وَسین سلام رِساندِنَن. 22 خداوند تی روح هَمرَه دَبو. خُدایِ فیض شِیمی هَمرَه دَبو. |
@ 2024 Korpu Company