دوم تیموتائوس 3 - گیله ماز

آخرین روزان

¹ وَلی اینه بِدان که آخرین روزانِ دِلِه، سَختِ روزگارِی هَنه.

² مَردُمانِ، خود شیفتِه، پولدوس، مَغرور، مُتِکبر، ناسزاگو، سَرکِش به خودِشانِ پیَر و مآر، ناشُکر، ناپاک،

³ بی‌عاطفه، کینه ایی، تُهمت زَن، بی‌بندوبار، وحشی، خُوبی یه دُشمَن،

⁴ خیانتکار، بی مُلاحِظِه، خودخواه هیسَن. که عیاشی رِه خُدایِ جی بیشتر دوس دارَن

⁵ ظاهراً دیندارِن، ولی اونه قُوَّتِ حَشا کانَن. اینجور آدمانِ جی دوری هَکُنید.

⁶ چون اوشانه میَن کَسایی دَرِن که مَردُمِ سِرِه یه دِلِه راه پیدا کانَن، بی عَقلِ زِناکان خودِشانه اَسیر کانَن، زناکانی که خودِشانِه گُناهِانِ بارِ جیر دُلا هَبان و جورواجورِ هوا و هَوَس، اوشانه هر طرف کِشاندِنِه،

⁷ این زِناکان هَمَش تعلیم گیرنَن، ولی هیچ وخت نَتَّنَن حَقیقَتِ بِشناسِن.

⁸ هَمونجور که یَنّیس و یَمْبْریس موسای هَمرَه مخالفت هَکُردَن، این مَرداکان هم که اوشانه فِکر خرابِ و اوشانه ایمان رَدِّ، حقیقتِ هَمرَه مُخالفت کانَن.

⁹ وَلی اوشان بِه جایی نَرسِنِن. چون اوشانه نادانی تمام مَردمِ وَسین معلوم بونه، همونجور که اون دُتایهِ نادانی هم بَرملا هَبا.

تمام مُقدسِ نِوشتِه ها خُدایِ الهامِ

¹⁰ ولی تو، می تعلیم و می رفتار و می هدف و می ایمان و می صَبر و می مُحبت و می طاقتِ از نزیک شاهد بِیی

¹¹ و اون رنج و اذیت و آزاری که اَنطاکیه و قونیه و لِستْره یه شهرایِ دِلِه می سَر بوما، اون رنج و اذیت و آزاری که طاقت بیاردِم؛ وَلی خداوند تمام این چیزانِ جی مَرِه نِجات هَدَه.

¹² راس راسی، تمام اوشانیکه بِخوان مسیحْ عیسی یِه دِلِه دینداری یه هَمرَه زندگی هَکونَن، عذاب کَشِنَن؛

¹³ ولی شرورِ آدمان و شیّادان بَدی یه دِلِه بَدتر بونَن، گول زَنَن و گول خارِنَن.

¹⁴ وَلی تو، اونچه یه دِلهِ که یاد بِیتی و اونِهِ ایمان بیاردی پابرجا هَبو، چون دانی اوشانه کیه شانِ جی یاد بِیتی،

¹⁵ و چِطور از وَچِگی مُقدَّسِ نوشته ها رِه دانِسّی که تانه تِره حکمت هَدِه اون نجات وَسین که ایمان طریقِ جی به مسیحْ عیسی هیسَه.

¹⁶ تمام مُقَدَّس نوشتِه ها خُدایِ الهامِ، و تعلیم و سرامکو و اِصلاح و تربیتِ وَسین، صالحی یه دِلِه فایدِه دارِه،

¹⁷ تا مَردِ خُدا کامِل هَبو، و هر خُجیرِ کارِ وَسین آمادِه.