دوم تیموتائوس 1 - گیله ماز

¹ پولُس طرفِ جی، که خُدایِ خواسِّ هَمرَه، و طبقِ اون وَعدِه یه زندگی که مسیحْ عیسی یِه دِلِه دَرِه، مسیحْ عیسی یِه رسولِ،

² می عزیزِ ریکا تیموتائوسِ وَسین: فیض و رَحمَت و صُلح و سلامتی خُدای پیَر و اَمی خُداوند مسیحْ عیسی یِه طرفِ جی تِرِه بییِه.

تشویق، وَفاداری یه وَسین

³ همونجور که شُو و روز یِکسَرِه می دعاهای دِلِه تِرِه یاد هارنَم، خُدا رِه شُکر کانَم، اون خُداییِ که مَنَم می اَجدادِ مِثانِ پاکِ وجدانِ هَمرَه اونه خِدمت کانَم.

⁴ وختی تی آرسو شانهِ می یاد هارنَم، آرزو کانَم تِرِه بِینَم تا خُشحالی یه جی پُر هَبوُم.

⁵ مَن تی خالِصِ ایمانِ یاد هارنَم، ایمانی که اوَّل تی نَنِه لوئیس و ایما تی مآر یونیکی یه دِلِه دَبا. و اَسِه مطمئنم تی دِلِه هم دَرِه.

⁶ اینِه وَسین، تی یاد هارنَم که خُدایِ اون عَطیِه که می دَس گُذاری یه خاطری، تی دِلهِ بوما رِه، اونه تَشِ الویه زیاد هَکُنی.

⁷ چون خُدا، ترسِ روحِ اَمَرِهِ نَده بلکه قُوَّت و مُحبت و نَفسِ جلوه بِیتَین روحِ هَدَه.

⁸ پَس، اینِه وَسین که اَمیِ خُداوندِ وَسین شهادت هَدی یا مَن که اونه خاطِری زِندانِ دِلِه دَکِتَم، عار نِدار، بلکه تو هم خُدایِ قُوّتِ هَمرَه اِنجیلِ خاطری عذاب بَکِشییَنِ دِلِه شریک هَبو.

⁹ خُدا اَمَره نِجات هَدَه و اَمَره مُقَدَّس زندگی یه وَسین دُخوانِسِّه، اینه نه اَمیِ کارانِ خاطری، بلکه خودِشه هدف و فیضِ وَسین هَکوردِه، فیضی که مسیحْ عیسی یِه دِلِه از اَزل اَمَرِه هَدَه هَبا با،

¹⁰ و اَسِه این فیض اَمی نِجات دَهَندِه مسیحْ عیسی یِه بَموئَنِ هَمرَه - آشکار هَبا، همون مسیحْ عیسیِ که اِنجیلِ طریق مرگِ از بِین بَبِرده، و اَبدی زندگی رِه همه یه وَسین آشکار هَکُردِه.

¹¹ و مَن اونِ وَسین انتخاب هَبام تا این اِنجیلِ رَسول و مُعلِم هَبوُم و موعظه هَکُنَم.

¹² اینه وَسینِ که اینجور عذاب کَشِنَم، ولی عار نِدارَم، چون دانَم کِیه ایمان بیاردِم، وَ حَتم دارَم که اون تانه اونچه که مَرِه بِسپارسِّه هَبا رِه تا اون روز مُحافظت هَکونه.

¹³ اون ایمان و مُحبتِ هَمرَه که مسیحْ عیسی یِه دِلهِ دَرِه، و اونچه که می جی بِشنَوِسّی رِه ایتا دُرسِّ نِمونه یه مِثانِ دو دَسّی بَچِسب.

¹⁴ روح القدسِ طریق که اَمیِ دِلِه دَرِه، اون خُجیرِ امانتِ جی که تِرِه بِسپارِسِّه هَبا، مُحافظت هَکُن.

¹⁵ خَبر داری که تمام آسیایِ منطقه یه مَردُم مَرِه وِل هَکُردَن، که اوشانه میَن فیگِلوس و هِرموگِنِس هم دَرِن.

¹⁶ خُداوند اونیسیفوروسِ خانوادهِ رِه لُطف هَکونه، چون اون چن دفه می جان تازِه هَکُردِه و می زِندان دَکِتَنِ جی عار نِداشتَه.

¹⁷ بلکه وختی رومِ شهر بوما، می دُمّال بَگرسِّه تا سَرآخر مَرِه پیدا هَکوردِه.

¹⁸ خداوند اون روز دِلِه، اونه رحمت عطا هَکونه. تو خودِت تمام اون خدمتهایی که اَفِسُسِ شهرِ دِلِه هَکُردِه جی، خبر داری.