دوّم تِسالونیکیان 1 - گیله ماز

¹ پولُس و سیلاس و تیموتائوسِ طرفِ جی، تِسالونیکی یه شهرِ کِلیسایِ وَسین که اَمی پیَر، خُدا، و خداوند عیسی مسیحِ دِلِه دَرِن:

² فیض و صُلح و سلامتی، اَمیِ پیَر، خُدا، و خداوند عیسیِ مَسیح طرفِ جی شِمِرِه بیه.

شُکر هَکُردن

³ اِی اَداشان، اَما همش بایسّی خُدا رِه شِیمی خاطِری شُکر هَکُنیم، دَرخور هم هَمینه، چون شیمی ایمان هر چی بیشتر رشد کانه هر کُدام از شِیمی مُحبَت همدیگَر بیشتر بونه.

⁴ اینِه وَسین، اَما خودِمان، خُدایِ کلیساهای دِلهِ، شیمی پایداری و ایمان خاطری که تمام اذیت و آزار و عذابایِ دِلِه طاقت بیاردین شِمِره افتخار کانیم.

داوری مسیحِ وَگَرِسَّنِ موقِه

⁵ این خُدایِ عادِلانِه داوری یه نِشانِئه، تا شُما خُدایِ پادشاهی یه لایق هَبین که اونِ وَسین هم عذاب کَشِنین.

⁶ چون راس راسی اینِ عادلانِه هیسِه که خُدا اوشانیکه شِمِره عذاب دَنِن رِه، عذابِ هَمرَه عوض هَدِه،

⁷ و شِمِرِه که عذاب کَشِنین، و همینجور اَمَرِه هم راحتی دَنهِ، اون موقِه که خُداوند عیسی خودشه رَسدار فِرِشتِگانِ هَمرَه اَلو بَزِه تَشِ دِلهِ آسِمانِ جی ظاهر بونه.

⁸ و اوشانیکه خُدا رِه نِشناسِنَن و اوشانیکه اَمیِ خُداوند عیسی یِه اِنجیلِ اِطاعت نَکردنِ جی تقاص گیرنِه.

⁹ اوشانه سِزا اَبدی نابودی خُداوندِ حضورِ جی و اونه جلالِ قوّتِ جی هیسِه،

¹⁰ همونجور که او، اون روز دِلِه که هَنه خودشه ایماندارانِ میَن جلال گیرنِه، و تمام اوشانیکه اونه ایمان بیاردِن، بُهت کانَن و شُما هم اوشانه همرَئین، چون اَمیِ شهادتِ ایمان بیاردِین.

¹¹ اینِه وَسین، اَما هَمَش دَریم شِمِرِه دُعا کانیم تا اَمیِ خُدا شِمِره خودشه اون دعوَتِ وَسین که دُخوانِسِّه هَبَین لایق بِدانه و خودشه قُوّتِ هَمرَه هر خُجیرِ نیّت و هر کاری که ایمان جی سرچشمه گیرنِه رِه، انجام هَدِه.

¹² تا اَمیی خُداوند عیسی یِه اِسم شِیمی دِلِه جلال هَگیره، و شُما هم طبقِ اَمیِ خُدا و خداوند عیسی مسیحِ فیض، اونه دِلِه جلال هَگیرین.