پطرسی دِوّمین نامِه 3 - گیله ماز

خُداوَندِ روز

¹ اِی عَزیزان، این دُوّمین نامِئه که دَرَم شِمِرِه بَنویسَم. هر دُتا نامِه رِه این نیَّتِ هَمرَه شِمِرِه بَنویشتَم تا شِیمی یاد بیارِم و شِیمی پاکِ فِکرانِ شوقِ سَر بیارِم،

² تا اون کلامی که مُقدَّس پِیغمبران پیشتَر باگُوتَن، و خُداوند و اَمیِ نِجات دَهَنده یه حُکم، که رسولان طریق جی شِمِره هَدَه رِه شیمی یاد بیارین.

³ پِیش از هر چی، بِدانید که آخرین روزانِ دِلهِ اوشانی که مسخره کانَن، هَنَن که خودِشانِه پلیدِ خواسِّه های دُمّال دَرِن و مَسخره وار

⁴ گونَن: «پَس اونه بَموئَنِ وَعدِه چی هَبا؟ چون اَز وَختی که اَمیِ پیَرِان بَمِردَن، همه چی هَمونجوریه که دُنیایِ شروعِ جی با!»

⁵ چون، اوشان عمداً این حَقیقَتِ ندید گیرِنَن که آسِمانان پیشتَر دَبا و زمین اُویِه جی و اُویِه طریق و خُدایِ کلامِ هَمرَه شِکل بِیتِه؛

⁶ و هَمین اُویِه طریق جی، اون دُنیایِی که اون موقِه وجود داشتِه غَرق و نابود هَبا.

⁷ و همون کلامِ هَمرَه، آسِمانان و زمینِی که اَلآن دینین، تَشِ وَسین جَم هَبا، و تا بی دینِانِ هلاک هَبوسَّن و داوری یه روزِ وَسین بداشتِه بونه.

⁸ ولی اِی عَزیزِان، این حَقیقَتِ ندید نَگیرین که خُداوَندِ ور ایتا روز هزار سالِ و هِزار سال ایتا روزی مِثانِ.

⁹ برخلافِ بعضیانِ گَمان خداوند خودشه وعده یه انجام هَدَنِ دِلهِ دیر نُکانه، ولی اینجور نیِه، بلکه شیمی هَمرَه صَبورِ، چون نَخَنِه هیچکَس هَلاک هَبو، بلکه خَنِهِ همه توبِه هَکُنَن.

¹⁰ وَلی خداوند عیسی یِه وَگَرِسَّنِ روز، ایتا دُزدِ مِثانِ هَنه، اون موقِه آسِمانان ایتا گَتِه صدایِ هَمرَه از بِین شونِه و سِتارگان تَش گیرنَن و نابود بونَن، زمین و تمام اونه کاران معلوم بونه».

¹¹ اَسِه که تمام این چیزان دَرِه نابود بونه، شُما چَطور مَردُمِی بایسّی هَبین؟ شُما ایتا مُقدَّس و دیندارِ زندگی بایسّی بِدارین

¹² خُدایِ روزِ چِش بِراه هَبین و اینِه وَسین که خُدایِ روز زودتر بیه تَقلّا هَکُنید، اون روز دِله که آسِمانان تَش گیرِنَن و نابود بونَن، و آسِمانِ ستارگان تَشِ گَرمی یه جی ذوب بونَن.

¹³ وَلی اَما طبقِ اونه وَعدِه، جَدیدِ آسِمان و جدیدِ زمینِ چِش بِراهیم که اون صالِحی یه سِرِه هیسِه.

¹⁴ پَس اِی عَزیزان، اَسِه که این چیزانِ اِنتِظارِ کَشِنین، خیلی تقلّا هَکُنید که اونه وَر بی‌لکه و بی‌عیب هَبین، و صلح و سلامتی یه دِلهِ دَبین.

¹⁵ و اَمیِ خُداوندِ صَبوری رِه نِجات بِدانید، هَمونجور که اَمیِ عزیزِ اَداش پولُس هَم طِبق اون حکمتی که اونه هَدَه هَبا، شِمِرِه بَنوِیشته.

¹⁶ اون خودشه تمام نامه‌هانِ دِلهِ وختی که این چیزانِ جی گَب زَنه نِویسِنِه. اونه نامه‌ های دِلِه چیزائی بَنوِیشتِه هَبا که اوشانِ بِفهمِسَّن سَختِ، و نادانِ آدمان و سُس ایمانان اونه دِلِه دَس بَرنِن، هَمونجور که دیگر مُقَدَّس نوشتِه هایِ هَمرَه اینجور کانَن، و این اوشانه نابودی یه باعث بونه.

¹⁷ پَس شُما اِی عَزیزِان، اَسِه که اینه دانید، مُواظب هَبین نَکُنِه بی‌دینِانِ نادرِس راهِ دِلهِ گُمراه هَبین، و شیمی تَحَمُلِ از دَس هَدین،

¹⁸ بلکه اَمیِ خُداوند و نِجات دَهَنده مَسیح ِعیسی فیض و بِشناسیَن دِلهِ رشد هَکُنید، که اونه اَز اَلآن تا اَبد جلال هَبو! آمین.