پطرسی دِوّمین نامِه 1 - گیله ماز

¹ شَمعونِ پِطرُسِ طرفِ جی، عیسیِ مَسیح پاکار و رَسول، اوشانِ رَه که خُدایِ عدالتِ طریق و اَمیِ نِجات دَهَنده عیسیِ مَسیح، ایمانی ایتا اَمیِ ایمان مِثان اوشانه نصیب هَبا:

² فیض و صُلح و سلامتی، خُدا و اَمیِ خُداوند عیسی یِه بشناسیَن طریق، فَت و فَراوان شِمِرِه بیه.

خُدایِ انتخاب هَبوسِّه شان

³ اونه الهی قُوَّت تمام اونچه که زندگی و دینداری یه وَسین لازِمِ رِه اَمَرِه هَدَه. اونه بِشناسین خاطری یِه که اَمَرِه خودشه جلال و خُوبی یه وَسین دُخوانِسِّه.

⁴ او که ایشانهِ طریق خودِشه گَتِه و با اَرزِش وَعده ها رِه اَمَرِه هَدَه، تا اوشانه طریق الهی طبیعتِ دِلهِ شریک هَبین و اون فسادِ جی که هوا و هوسِ خاطری دُنیایِ دِلِه دَرِه، آزاد هَبین.

⁵ اینه وَسین، تا تانید تَقلّا هَکُنید تا شیمی ایمان طَریق خوبی به بار بیارید، و خوبی یه طَریق، معرفت،

⁶ و معرفت طَریق، خویشتنداری، و خویشتنداری یه طَریق، پایداری، و پایداری یه طَریق، دینداری،

⁷ و دینداری یه طَریق، اَداشانِ دوس داشتن و اَداشانِ دوس داشتَنِ طَریق، مُحبت.

⁸ چون اگه این صِفات شیمی دِلهِ بُمانه و بیشتر هَبو، نُزارنه که اَمیِ خُداوند عیسی مَسیح بِشناسییَین دِلِه، بی‌فایده و بی‌ثمر هَبین.

⁹ چون هر کس که این صفاتِ نِداره، آنقَدَر کورِ که خودشه لِنگِ پِشِ نَینه، و یادِ جی بَبِرده که خودشه قدیمی گُناهِانِ جی پاک هَبا.

¹⁰ پَس اِی اَداشان، بیشتر تَقلّا هَکُنید تا شیمی دعوت و اِنتخاب هَبوسَّن رِه ثابت هَکُنید، چون اگه این کارِ هَکونید هیچ وَقت نَکِّنین

¹¹ و اینجوری، شِمِره کامِلاً اجازِه دَنِن که خُداوند و اَمیِ نجات دهنده عیسی مسیحِ اَبدی پادشاهِی یه دِلِه بیشیِن.

¹² پَس مَن خَنَم این چیزان همش شِیمی یاد دَبو، هر چَن این چیزانِ دانید و اون حَقَیتِ دِلهِ که به دَس بیاردین، پابرجائین.

¹³ مَن فکر کانَم که این دُرسِّ، تا اون موقِه که این تَن دِلهِ دَرَم، این صفاتِ شِیمی یاد بیارِم تا غیرتی هَبین،

¹⁴ چون دانَم خِیلی زود این تَنِ جی دِرگا هَنَم، هَمونجور که اَمیِ خُداوند عیسی مَسیح مَرِه نِشان هَدَه.

¹⁵ و تا تانَم تقلّا کانَم تا بِتَّنید بعدِ اینکه این دُنیایِ جی بَشَم هَمَش این چیزانِ شیمی یاد بیارین.

¹⁶ چون اون موقِه که اَمیِ خُداوند عیسی مسیحِ قُوَّت و اونه بَموئَنِ شِمِره اِعلام هَکُردیم، اَفسانه هایِ دُمّال که زرنگی یه هَمرَه بِساته هَبان نَشَیم، بلکه اَمی چشِ هَمرَه اونه جلالِ بَدییِه بِیم.

¹⁷ چون اون موقِه که اون، خُدای پیَرِ جی جلال و احترام بِیته، ایتا صدا اون شکوه و جلالِ جی اونه بَرِسیه که، «این می عزیزِ ریکائه که اونه جی راضییَم.»

¹⁸ اَما خودِمان اون آسِمانی صِدا رِه گوش هَمرَه بِشنَوِسّیم، چون اون مُقَدَّس کوهِ سَر اونه هَمرَه دَبِییم.

¹⁹ و اَما، پِیغمبرانِ گَبان رِه داریم که شَئنِه اطمینان هَکُردَن که خوب شیمی یاد دَبو، ایتا لَمپایه مِثانِ که ظُلِماتِ دِلِه تابِنِه تا وختی که صُب دَم هَبو و صبِ دَم ستارۀ شیمی دِلِ میَن روشِن هَبو.

²⁰ پِیش از هر چی، اینه شیمی یاد بِدارین که مُقدَّسِ کِتابِ نَبوَّتای جی هیچکدام، خُدِ پِیغمبرِ تفسیر نیِه.

²¹ چون هیچ نَبوَّتی، آدمی یه اِراده یه هَمرَه نومَه، بلکه آدَمان، روح القدُس طریق خُدایِ طَرف جی گَب بَزَن.