دوّمین نامه قرنتیانِ وَسین 8 - گیله مازهَدایایِ جَم هَکُردَن 1 اَسِه اِی اَداشان، خَنیم شِمِرِه اون فیضِ جی که خُدا مَقدونیه یه کلیساها رِه هَدَه، باخَبَر هَکُنیم. 2 چون اوشان مُصیبتِ خاطری، بَدجور آزمون هَبان، ولی بی حَد و حساب خُشحالِن و با اینکه خیلی فقرِ دِلِه دَرِن ولی دَس و دِلبازن. 3 چونکه مِن شاهدم که اوشان خودِشانِ توانِ قَدَر و حتّی اونه جی بیشتر، پیش قدم هَبان، 4 خیلی اِصرارِ هَمرَه اَمیی جی خواهِش هَکُردَن این خِدمتِ دِلِه که مُقَدسینِ وَسین هیسه شریک هَبون. 5 اوشان نه فقط اونجور که اَما انتظار داشتیم بلکه اَوَّل خودِشان رِه خُداوَندِ وقف هَکُردِن، و ایما طبقِ خِدایِ اِراده خودِشان رِه اَمی وقف هَکوردِن. 6 اینِه وَسین، تیتوسِ جی بِخَسَّم هَمونجور که پیشتَر خودِش اوَّلین قدمها رِه بِیتِه با، اَلآن هم شیمی میَن اون کارِ خیرِ کاملاً تمام هَکُنِه. 7 ولی همونجور که هَمِه چی یه دِلهِ سَرتَرین- ایمان دِلِه، گَب بَزَئن دِلِه، معرفتِ دِلِه، کامِلِ غیرَتِ دِلِه، و شیمی محَبَت دِلِه نسبت به اَما- پس این کارِ خیرِ دِلِه هم همه یه جی سَرتَر هَبین. 8 من اینِه شِمِرِه حکم نُکانَم، بلکه خَنَم شیمی خالِصِ محبتِ نسبت به بقیه یه شور و شوق آزمون هَکُنَم. 9 چون اَمیی خُداوند عیسیِ مسیحِ فیضِ جی باخَبَرین که هر چَن دولتمند با، شیمی خاطری فقیر هَبا تا شُما اونه فقیرِی یه دِلهِ دولتمند هَبین. 10 پَس می نَظَرِه این جریانِ باره گونَم، این شِیمی نفعِ: پارسال، شما نه فقط این کارِ خیرِ انجامِ دِلِه، بلکِه اونه انجامِ ذوق و شوقِ دِلِه هم پیش قدم بِین. 11 پَس اَلان این کارِه تَمام هَکُنید، تا ذوق و شوقی که این کار وَسین داشتین، اونه تمام هَکُردن، شیمی توانِ مالی یه همره جور دَر بییِه 12 چون اَگه ذوق و شوق دَبو، اون آدَمِ هدیه طبق اونچه که داره قبول بونه، نه طبق اونچه که نِداره. 13 چون اَمیی منظور این نیِه که بَقیِه راحتی یه دِلهِ دَبون و شُما فِشاری دِلهِ، بلکه خَنیم مُنصفانِه هَبو، 14 تا شِیمی فَراوانی، اوشانه احتیاجاتِ برطرف هَکونه، تا ایتا روز هَم اوشانه فَراوانی شِیمی احتیاجاتِ برطرف هَکونِه. تا اینجوری اِنصاف برقرار هَبو، 15 هَمونجور که توراتِ دِلِه بَنوشت هَبا: «اونیکه زیاد جَم هَکُردهِ با، اِضافه نِداشتِه، و اونکه کَمِ جَم هَکُردهِ با، کَم و کسری نِداشتِه.» پولُس تیتوسِ سفارِشِ کانه 16 خُدا رِه شُکر کانَم که اون غیرتی که مَن شیمی وَسین دارم تیتوسِ دِلی میَن هَم دَرِه. 17 چونکه اون نه فقط اَمیی خواهِشِ قبول هَکُردِه، بلکِه خودِش خیلی ذوق و شوقِ هَمرَه، شِیمی وَرجه بموئَنِ وَسین پِیش قَدَم هَبا. 18 و اَما ایتا دیگه اَداش تیتوسِ هَمرَه روانه کانیم که تمام کلیساهایِ دِلِه انجیلِ موعظِه یه خاطِری سَرشِناسِ. 19 و نه فقط این، بلکه اون اَداش کلیساهایِ طرفِ جی تعیین هَبا تا هَین کارِ خیری که اونه انجام هَدَئن و ادارِه هَکُردَن اَمی وظیفِئه، اَمی همره همسفر هَبو. اون کاری که خداوندِ جلالِ وَسینِ و اَمی خیرخواهی رِه هَم نِشان دَنِه. 20 اَما خِیلی مواظبیم که این خِدمَتِ دِلِه که هدیه هایِ جَم هَکُردَن که دِلِ جی و اَمی طریق ادارِه بونِه هیچکس اَمِه جی ایراد نَگیرِه 21 چون تَقلّا کانیم نه فقط خُداوندِ نَظَر، بلکِه مَردُم نَظر هم اونچه دُرسِّ رِه هَکُنیم. 22 و این آدَمانِ همره، اَمی اَداش رِه روانه کانیم که خیلی اونه آزمون هَکُردم و بِفهمِسَّم که خیلی چیزانِ دِلِه ذوق و شوق داره، ولی اَلَان اون اَداش، اون زیادی اطمینانِ خاطری که شِمِرِه داره قبلاً جی بیشتر ذوق و شوق داره. 23 تیتوسِ بارِه بایسّی باگوُم که شِیمی خِدمَت هَکُردَن دِلهِ می شریک و همکارِ؛ و اَمیی اَداشانِ بارِه هم بایسّی باگوُم که اوشان کلیساهای بَرِسانده و مسیحِ جلالِن. 24 پس شیمی محبتِ اوشانه عمل دِلِه ثابت هکونید ونشان هَدین که اَمی فَخر شِمِرِه بی خودی نییِه تا همه کلیساهان بَینِن. |
@ 2024 Korpu Company