دوّمین نامه قرنتیانِ وَسین 7 - گیله ماز

¹ پَس اِی عَزیزان، اَسِه که این وعده‌ شان رِه داریم، بیئن اَمَرِه هرجسم و روحِ ناپاکی جی پاک هَکنیم و خُدایِ ترسِ هَمرَه، تَقدیسِ هَبوسَّنِ کامِل هَکنیم.

پولُس خُشحالی

² اَمَرِه شیمی دِلِ میَن جا هَدین. اَما هیچکسِ حَق بَدی نَکُردیم، هیچکَسِ فاسِد نَکُردیم و هیچکَسِ جی سواستفاده نَکُردیم.

³ مَن این نَگونَم تا شِمِره محکوم هَکُنَم. چونکه شِمِرِه پیشتَر باگوتَم که جوری اَمی دِل میَن جا دارین که حاضریم شیمی هَمرَه بَمیریم و شیمی هَمره زندگی هَکنیم.

⁴ من دِل و جُرأتِ همره دَرَم شیمی هَمره گَب زَنَم. و خیلی شِمِرِه فَخر کانَم؛ مَن خِیلی تسلّی بِیتَم. تمام می مِصیبتهایِ دِلِه خُشحالی یه جی پُرِم.

⁵ چون حتّی موقِه ای که اَما مقدونیه منطقه بَرِسییَیم، اَمِی این تَن استراحت نَکُردِه، بَلکه هر طرف مُصیبتِ دِلِه دَبِیم- دِرگا دعواها داشتیم، و اَمی دِلِ میَن تَرس داشتیم.

⁶ وَلی اون خُدایی که بِشکِسِّه دِلِشان رِه تسلّی دَنِه، اَمَرِه تیتوسِ بَموئَنِ هَمره تسلّی هَدَه.

⁷ و اَما نه فقط اونه بموئَنِ جی، بلکه اون تسلی که تیتوس شِیمی جی بِیتهِ با، تسلی بِیتیم. تیتوس شیمی حسرتِ جی و غُصِّه و غیرَتی که مَرِه دارین، مَرِه خَبَر بیاردِه، جوریکه مَن بیشتر خُشحال هَبام.

⁸ چون حتّی اگه مَن می نامِه یه هَمره شِمِرِه غُصِّه دار هَکُردم، می هَکُردِه یه جی پَشیمان نییَم. با اینکه یِکَم پَشیمان بام - اینِه وَسین که دینَم می اون نامِه یه مدت کم شِمِرِه غُصِّه دار هَکُردِه-

⁹ وَلی اَلآن خوشحالَم، نه اینِه وَسین که غُصِّه دار هَبَین، بلکه شیمی این غُصِّه توبه باعث هَبا. چون شِیمی غُصِّه خُدایِ وَسین با، تا اَمیی جی هیچ ضررِی شِمِره نَرِسِه.

¹⁰ چون غُصِّه ایی که خُدایِ وَسین هَبو، توبِه یه باعث بونه، که به نِجاتِ خَتم بونه و پشیمانی نِداره. وَلی غُصِّه ایی که دُنیایِ وَسین هَیسِه، مَرگ به بار هارنه.

¹¹ چونکه بِیشین این غُصِّه ای که خُدایِ وَسین با شیمی دِلِه چه شور و شوقی به بار بیاردِه: اَلبَتَر همین شور و شوقِ که نِشان دَنِه تقصیرکار نییَین، چه غیظِ دِلِه، چه ترسِ دِلِه، چه حسرتِ دِلِه، چه غیرتِ دِلِه، چی مُجازاتِ دِلِه. هر لَحاظِ جی ثابِت هَکُردین که اون قضیه یه دِلِه بی‌تقصیر بِین.

¹² پَس هر چَن که این نامِه رِه شیمی وَسین بَنویشتِم ولی نه اون آدمِ خاطِری که بَدی هَکُردِه و یا نه اون آدمِ وَسین که اونه بَدی هَبا، بَلکه اینه وَسین با که خُدایِ وَر شیمی اون غیرت که اَمی وَسین دارین آشکار هَبو.

¹³ اینه وَسینِ که اَما تسلّی داریم. علاوِه بر اَمی تسلّی، اَما تیتوسِ بَدییَنِ جی بیشتر خُشحال هَبَیم، چونکه اونه روح شیمی هَمِه یه خاطری تازِه هَبا.

¹⁴ مَن اونه وَر هر لَحاظِ جی شِمِرِه افتخار هَکُردَم و شُما مَرِه شرمنده نَکُردین، بلکه هَمونجور که هر اونچه شِمِرِه باگوتیم دُرس با، ثابت هَبا که اَمیی فخر تیتوسِ وَرجه هم بِجا با.

¹⁵ هر دَفِه که تیتوس شیمی همه یه اِطاعَت هَکوردَنِ یاد هارنه و اینکه چِطور تَرس و لَرزِ هَمرَه اونه قبول هَکُردین، بیشتَر شِمِرِه دِل دَبِسِّنِه

¹⁶ خوشحالَم که هر چیِه دِلِه شِمِرِه اطمینان دارَم.