دوّمین نامه قرنتیانِ وَسین 3 - گیله ماز

جدیدِ عَهدِ پاکاران

¹ مَگِه یِدَفِه دیگه اَمی جی تعریف هَکُردَن شِروع کانیم؟ یا بعضیانِ مِثان، لازمِ شِمِره سفارش نامه هَدیم یا شِیمی جی سِفارش نامِه هَگیریم؟

² شُما خودتان اَمی سِفارش نامه هیسین، ایتا نامِه که اَمیی دِلِ سَر بَنویشتِه هَبا که همه تانَن اونِه بخوانَن و بِفَهمَن.

³ شما نِشان هَدَین که مسیحِ نامِه هیسین، که اَمی طریق شِمِرِه بَرسیِه که مُرَکبِ هَمره بَنویشته نَبا، بَلکه زِندِه خُدایِ روحِ هَمرهَ اَمی وَسین بَنویشته هَبا، و نه سَنگی لُوحِ سَر، بَلکه آدمانِ دِلِ لُوحِ سَر بَنویشته هَبا.

⁴ اَما مسیحِ طَریقِ جی خُدایِ وَرجه اینجور اطمینانی داریم.

⁵ نه اونکِه خودِمان لیاقت داریم که اِدّعا هَکُنیم یِچّی اَمی دَس بَر هَنِه، بلکِه اَمی لیاقت خُدایِ جییه.

⁶ خدا با که اَمَرِه لیاقت هَدهَ که تازه عهدِ پاکاران هَبیم- عهدی که خُدایِ روحِ سَر پابرجائه، نه اونچی یه سَر که ایتا بَنویشته بیشتر نیِه. چون ’بَنویشتِ‘ کُشِنِه، ولی خُدایِ روح زندگی دَنِه.

⁷ اَسه، اَگه اون خِدمتی که به مرگِ خَتم بونه با و سنگی لوحِ سَر حَک هَبا با جلالِ همره ظهور هَکُردِه، جوریکه بَنی اسرائیلِ قوم نَتَّنِسَّن موسی یه دیمِ اونه جَلالِ خاطِری بِیشِن، هر چَن اون جَلال دَبا از بِین بوشو.

⁸ چَنّی بیشتر، اون خِدمتی که خُدایِ روحِ طریقِ جییِه جَلالِ هَمره هیسِه.

⁹ چون اَگِه خِدمتی که به محکومیتِ خَتم بونِه با، جلالِ هَمرَه با، چَنّی بیشتر خِدمتی که به صالِح بِشمارِسَّنِ ختم بونه جلالِ جی پُرِ.

¹⁰ چون اونچه که یه وَختی پُر جلال با، اَسِه در قیاسِ این جلال که سَرتَرِه، دِ جلالی نِداره.

¹¹ و اَگِه اونچه که از بِین شونه جَلالِ هَمره با، اونچه بِجا ماندِنِه چَنّی بیشتَر جلالِ هَمرَئه.

¹² پَس چونکه اینجور اُمیدی داریم، جرأتِ هَمرَه گَب زَنیم؛

¹³ نه موسایهِ مِثان که ایتا نِقاب خودشه دیمِ سَر بَکِشیِه تا بنی اسرائیل اونچه یه عاقِبَتِ که دَبا از بین بوشو رِه، نَینَن.

¹⁴ وَلی اوشانِ افکار تاریک هَبا چون هَمون نِقاب عهد عتیقی بُخوانِسَّنِ موقِه تا اِمروز بِجا بُمانِسِّه و بَیتِه نَبا، چون فقط مسیحِ دِلِه بِئیتِه بونِه.

¹⁵ حتّی تا اِمروز، هر وَخت موسی یه تورات رِه خواندِنَن، ایتا نِقاب اوشانه دِلِ سَر بِجا ماندِنِه؛

¹⁶ وَلی هر وَخت یِنفر خُداوندِ وَرجه وَگَردِنِه، نِقاب بِیته بونه.

¹⁷ خداوند، روحِ و هر جا خُداوَندِ روح دَبو، اوجِه آزادی دَرِه.

¹⁸ و اَما همه که بی نِقابِ دیمِ هَمرَه، خُداوندِ جَلالِ، ایتا آینِه دِلِه دینیم، همون عکسِ مِثان، ایتا جلالِ جی ایتا دیگَه جلالی که بیشتر بونه عوض بونیم؛ وَ این خُداوندِ جی شروع بونه که روحِ.