دوّمین نامه قرنتیانِ وَسین 13 - گیله ماز

آخرین هشدارها

¹ این سوّمین دَفِه که شیمی بَدییَنِ وَسین هَنَم. «هر گَبی دو یا سِه تا شاهدِ هَمرَه ثابت بونه.»

² مَن می دوّمین دیدارِ دِلِه که اوجِه دَبام، اوشانی رِه که پیشتر گُناه هَکُرده بان، و بَقیِه رِه هَم هُشدار هَدَم و اَلان هَم که اوجِه دَنییَم باز هم هُشدار دَنَم که اگه یِدَفِه دیگه شیمی وَرجه بییَم، اوشانِ رحم نُکانَم.

³ چون شُما ایتا دلیلِ دُمّال دَرین که ثابت هَکُنید که مَسیح می طریقِ جی گَب زَنِه. مسیح شیمی پیش ضعیف نیِه، بَلکه شیمی میِن رَسدارِه.

⁴ چون هرچَن ضَعفِ دِلهِ مَصلوب هَبا، وَلی خدایِ قوّت هَمرَه زندگی کانه. چون اَما هَم اونه دِلهِ ضعیفیم، وَلی شیمی پیش اونه هَمرَه خُدایِ قوَّتِ هَمرَه زندگی کانیم.

⁵ شِمِرِه آزمون هَکنید تا بَینین ایمان دِلهِ دَرِین یا نه. شِمِرِه مَحَک بَزِنین. یا مَگِه اینه شیمی باره نِفَهمِنین که عیسی مَسیح شِیمی دِلهِ دَرِه؟ مَگِه اینکه این آزمونِ دِلهِ رَد هَبین!

⁶ و امیدوارَم اینه بِفَهمین اَما این آزمون دِلِه رَد نَبَیم.

⁷ ولی اَمی دُعا خُدایِ وَر اینه که خطا نَکُنین؛ نه تا معلوم هَبو که اَما آزمونِ جی سَر بُلَند دِرگا بومَیم، بلکه تا شُما اونچه که دُرس هیسِه رِه، هَکُنید، حتی اَگِه اینجوری نشان هَدِه که اَما رَد هَبَیم.

⁸ چون نَتّنیم حقیقَت علیه هیچ کاری هَکُنیم، بَلکِه هر چی کانَیم حَقیقَتِ وَسین هیسِه.

⁹ چون هر وخت اَما ضعیف هَبیم و شُما رَسدار، اَمی خوشحالی یه باعِث بونه، و اَمیِ دُعا این که شُما باز هَم جان هَگیرین.

¹⁰ اینِ وَسین، این چیزان رِه وقتی شیمی وَر دَنییَم شِمِرِه نِویسِنَم تا وَختی شِیمی وَرجه بومَم، مَجبور نَبوم می اقتدارِ جی تُندی یه هَمرَه رفتار هَکُنَم، اون اقتدارِی که خداوند نه ویران هَکُردَن وَسین، بَلکِه بَنا هَکُردَن وَسین مَرِه هَدَه.

خاتمه

¹¹ سَر آخَر، اِی اَداشان، خوشحال هَبین؛ شیمی فِکر این هَبو که باز هَم جان هَگیرین؛ و همدیگرِ تسلّی هَدین، همدیگرِ هَمره هم نظر هَبین، صُلح و سلامتی یه دِلِه زندگی هَکُنی؛ که خدایِ مُحبت و صُلح و سلامتی شِیمی هَمرَه ماندِنِه.

¹² هَمدِیگَرِ مُقَدَّس خُوشِ هَمرَه سَلام هَکُنید.

¹³ تمام مُقَدَسین، شِمِرِه سِلام رِساندِنَن.

¹⁴ خداوند عیسی مَسیحِ فِیض، خُدایِ مُحَبَت و روح القدوسِ رِفاقت شِیمی هَمرَه دَبو.