دوّمین نامه قرنتیانِ وَسین 12 - گیله مازپولُس رؤیا و اونه تَنِ خار 1 مَن بایسّی اینجوری فخر هَکُنِم. هر چَن اونِ جی منفعتی نَبِرنَم، اَلان می فَخر رِه رؤیاها و خُداوندِ مُکاشفاتِ باگوتَنِ همرهَ ادامِه دَنَم. 2 مَن یِنفر رِه مَسیحِ دِلِه اِشناسِنَم که چهارده سال پیش به سِوّمین آسِمانِ بَبِرده هَبا. نِدانَم تَنِ دِلِه یا تَنِ جی دِرگا، خدا دانه 3 و دانَم که این آدم به بهشت بَبِردِه هَبا- تَنِ هَمرَه یا تَنِ جی دِرگا، خُدا دانهِ- 4 و اون چیزهایی رِه بِشنَوِسِّه که نَشَئنِه باگوتَن، که گَب بَزَئن اوشانه جی آدَمی یه وَسین خوب نیِه. 5 مَن اینجور آدَمی رِه فخر کانَم. وَلی می بارِه، بِجُزمی ضعفِشان رِه فخر نُکانَم. 6 حتی اَگِه بِخوام فخر هَکُنَم، نادان نیِیَم، چون حَقیقَتِ گونَم. وَلی این کارِ جی دوری کانَم تا کَسی مَرِه اون چیه جی گَتِه تَر خیال نَکُنِه که می دِلِه دینِه و می جی اِشنوِنهِ. 7 پس، اینه وَسین که این گَتِ مُکاشِفات که بی حد و اندازه هم هیسه مَرِه مغرور نَکُنِه، ایتا تیف می تَنِ دِلِه مَرِه هَدَه هَبا، یَعنی شیطانِ طرفِ جی، تا مَرِه عذاب هَدِه و می غُرورِ جِلو رِه هَگیرِه. 8 سِه دفه خُداوَندِ جی خواهش هَکُردَم اونِهِ می جی هَگیره، 9 وَلی خداوند مَرِه باَگوته: «می فیض تِرِه بَسّه، چون می قُوَّت ضعفِ دِلهِ کامِل بونه». پَس اینه وَسین مَن بیش از این خُشحالی یه هَمره می ضَعفِشان رِه فَخر کانَم تا مسیحِ قُوَّت می سَر بُمانِه. 10 پس مَسیحِ خاطِری، ضعفها، فاشها، سختیها، اذیت و آزار، و بلاهایِ دِله راضییَم، چون ضعف دِلِه رَسدارَم. 11 من نادانانِ مثان رفتار هَکوردَم! شُما مَرِه مجبور هَکُردین. شُما بایسّی می جی تعریف کانِه بِین، چون هر چن هیچی نییَم، وَلی اون ’گَتِه رسولِانِ‘ جی هیچی کَمِ نِدارَم. 12 ایتا واقعی رسولِ نِشانِه ها، تمام صَبر و تَحمِلِ هَمره شیمی مین آشکار هَبا، نِشانِه ها و معجزات و کارهایی که قوتِ همَرئه. 13 چونکه چی یه دِلِه دیگر کلیساهایِ جی کمتر شمِرِه لِطف هَبا، بِجُز اینکه هیچ وَخت باری شِیمی دوش سَرنَبام؟ می این اشتباه رِه بِبَخشین! 14 اَسِه آمادِه اَم سوّمین دفه شِیمی بَدییَنِ وَسین بییَم، و هیچ باری شِیمی دوش سَر نییَم. چون شِیمی مال واموال دُمّال دَنییَم، بلکه خودِ شِمِره خَنَم. چون که وَچِه هان وَظیفِه نییِه خودِشان پیر و مآره وَسین مال و اموال جَم هَکُنَن، بلکه پیَر و مآر وظیفِئِه. 15 مَن خُشحالی یه هَمرَه تمامِ می مال و اموال رِه شِیمی جانِ راهِ دِلِه خَرج کانَم و حتی می جان رِه هَم شیمی جی دریغ نُکانَم. اَگِه مَن شِمِره اینقَدَر دوس دارَم، مگه شُما بایِسّی مَرِه کمتر دوس بِدارین؟ 16 وَلی با اینکه قبول دارین مَن باری شیمی دوشِ سَر نییَم، لابُد گونید حُقِّ بازم و حیله یه همره شِمِرِه بِدس بیاردِم. 17 مَگِه اوشانیکه شیمی وَر روانه هَکوردَمِ طریقِ جی، شیمی جی منفعتی بَبِردَم؟ 18 مَن تیتوسِ جی خواهِش هَکُردَم شِیمی وَرجه بیه و اَمیی اَداش رِه هَم اونه هَمرَه روانه هَکوردَم. مَگِه تیتوس شِیمی جی منفعتی بَبِردِه؟ مَگِه اَما ایتا روحِ دِلِه عمل نَکانیم؟ مگه ایتا راه دِلِه همدیگَرِ هَمرَه نَشونیم؟ 19 مَگِه تا ایجه این فِکرِ دِلهِ دَبِیین که تَقلّا کانیم شِیمی پِیش اَمی جی دِفاع هَکُنیم؟ اَما خُدای وَرجه ایتا اوشانه مِثان گَب زَنیم که مسیحِ دِلِه دَرِن، و هر اونچه کانیم، اِی عَزیزِان، شیمی ایمانِ تقویت وَسین هیسِه. 20 چون اونه جی تَرسِنَم که شِیمی وَرجه بییَم و شِمِره اونجور که اِنتِظار دارمِ، نَینَم، و شُما هَم مَرِه جوریکه اِنتِظار دارِین، نَینین. اونه جی تَرسِنَم شِیمی میَن دعوا مُرافِه، حَسودی، غیظ، دشمنی، تُهمَت، غیبت، غرور و هرکی هرکی بِینَم. 21 و اونه جی هَم تَرسِنَم که وختی شِیمی وَرجه بییَم، می خُدا شِیمی وَرجه مَرِه فروتَن هَکونه و مَن مجبور هَبوم بعضیانِ خاطِری که قَبلاَ گُناه هَکُردَن و خودشانِه ناپاکی، بی‌عفتی و عیاشی یه جی توبِه نَکُردَن، ماتَم بَگیرَم. |
@ 2024 Korpu Company