دوّمین نامه قرنتیانِ وَسین 10 - گیله ماز

پولُس خودشِ خدمَتِ جی دِفاع کانه

¹ مَن، پولُس، مسیحِ نرمی و مهربانی یه هَمرَه شیمی جی خواهش کانَم مَنی که شیمی جی خیلیان گونِن وختی شیمی وَرجه درم سر به زیرِم و اون موقِه که شیمی وَرجه دَنییَم شُجاعِم!

² مَن شیمی جی اِلتماس کانَم که موقِه ای که شیمی وَرجه هَنَم مجبور نَبوم شیمی همره جِسارتِ همرهِ گَب بَزِنَم، جوریکه مردمِ جی بعضیان گَمان کانَن که اَما آدمی یه فِکرهای همره دَریم رفتار کانیم

³ چون هر چَن جِسمِ دِلِه زندگی کانیم، ولی جسم طَریقِ جی نَجِنگِنیم.

⁴ چونکه اَمیِ جَنگِ اَسلحه جِسمِ جی نیِه، بلکِه خُدایِ قوتِ داره تا قلعِه شانِه نابود هَکونِه.

⁵ اَما هر بحث و هرکسی که خُدایِ معرفتِ علیه گَتِه نظر دَنِه رِه از بِین بَرنیم، و هر فکری رِه مجبور کانیم که مسیحِ جی اطاعت هَکونِه

⁶ اون موقه که مسیحِ جی کاملاً اطاعت کانید اَما آماده ایم تا هر نااطاعتی رِه تنبیه هَکُنیم.

⁷ بِیشین، بَینین شیمی چِشِ پیش چی دَرِه. اگه یِنفر مُطمئنِه که مسیحِ شینِ، اون آدم بایسّی بِدانه همونجور که اون مسیحِ شینِ اَما هم مسیحی شینیم

⁸ چون حتّی اَگِه یِذرِه بیشتر می اقتدارِ فَخر هَکُنم شرمنده نَبونَم. اون اقتدار که خُداوند شیمی بَنا هَکُردَنِ وَسین مَرِه هَده، نه شیمی نابودی یه وَسین.

⁹ نَخَنَم به نَظَر بیه که من تقلا کانم می نامه‌ شانه هَمرَه شِمِرِه بَتِرسانَم،

¹⁰ چونکه اوشان گونَن: «اونه نامِه شان سخت و سنگینِ، وَلی رو دَر رو ضعیفِ و اونه گَب بَزَئن تعریفی نِدارِه.»

¹¹ بَنی اونیکه اینجور گونه بِفَهمِه که هر اونچه که وقتی دَنییَم می نامِه هایی دِلِه گونَم، وختی که بییَم همون کارِ کانَم.

¹² اَما جُرأت نُکانیم خودِمان رِه اون کَسانِ جی بِدانیم که خودِشانه جی تعریف کانَن یا خودِشان رِه همدیگَرِه هَمرَه قیاس کانَن. ولی اون موقِه اوشانیکه خودِشان رِه همدیگرِ هَمره سبک سنگین کانَن و خودِشان رِه همدیگَرِ همره قیاس کانَن، نفَهمِنَن

¹³ ولی اَما بیش از حد فَخر نُکانیم، بلکه دَر حَدّی فخر کانیم که خُدا اَمیی وَسین تعیین هَکُردِه، اون حَدّی که شِمِرِه هم رَسِنِه

¹⁴ چونکه اَما اَمی لِنگِ اَمی حَدِّ جی پیشتَر نَنِیم، جوریکه انگار اصلاً شِمِرِه خِدمَت نَکورده بِیم، چون اَما اوَّلین کَسانی بِیم که مسیحِ اِنجیلِ شِمِرِه بَرِساندیم.

¹⁵ اَما اَمی حَدِّ دانیم، و اونچه یه جی که بقیه زحمت بَکِشییَن رِه فَخرنُکانیم. ولی اُمید داریم که هر چی شِیمی ایمان گَتِه تَر هَبو، اَمیی خِدمت هَکُردَن هم شِیمی میَن بیشتر بونه.

¹⁶ تا بَتَّنیم اِنجیلِ اون منطقه های دِلِه که شیمی جی دورِن اعلام هَکُنیم. چون نَخَنیم اون کاری رِه که یِنفر دیگه پیشتَر، خودِشِه منطقه یه دِلِه هَکُردِه رِه فَخر هَکُنیم

¹⁷ بَنین «هر‌ کی فخر کانه، خُداوَندِ فخر هَکونه.»

¹⁸ چون اونیکه خودِشه جی تعریف هَکونِه قَبول نَبونه، بلکه اون آدمی قبول بونه که خُدا اونه جی تعریف هَکونه.