دوّمین نامه قرنتیانِ وَسین 1 - گیله ماز1 پولُس طرفِ جی که خُدایِ خواسِّ هَمرَه مسیحِ عیسی رسولِ، و اَمی اَداش تیموتائوس، خُدایِ کلیسا رَه قُرِنتُسِ شهرِ دِلِه، و اَخائیه منطقه یه سرتاسرِتمام مُقَدَسین وَسین: 2 فیض و سلامتی اَمیی پیَر خُدا، و خداوند عیسیِ مَسیح طَرَفِ جی، شِمِرِه بیِه! تمام تسلی یه خدا؛ 3 مُبارک هَبو خُدا، اَمیی خُداوندِ پیَر، عیسی مَسیح، که رَحمتِشانِ پیَر و تمام تسلی یه شانِ خُدائِه؛ 4 اون خدا که اَمَرِه تمام اَمیی سختیهایِ دِلهِ تسلی دَنه، تا اَما هَم بِتَّنیم اون تسلی یه هَمرَه که اونه جی بِیتیم، بَقیِه رِه که سختی دِلِه دَرِن رِه، تسلی هَدیم. 5 چون همون جور که فَتّ و فراوان مسیحِ رَنجِشانِ جی سهم بَرنیم، همونجور هم مسیحِ طریق فَتّ و فراوان تسلی یه جی سهم بَرنیم. 6 اَگِه اَما سختی یه دِلهِ دَریم، شِیمی تسلی و نِجات یه خاطری یِه؛ و اَگِه تسلی داریم، باز شِیمی تسلی یه خاطری یه، واین اون موقِه ایی اتفاق دَکِنِه که شُما همون عذابائی رِه که اَما کَشِنیم رِه صبر وحوصله هَمرَه تَحمُل کانید. 7 اَمیی اُمید شیمی بارِه پا برجائِه، چون دانیم هَمونجور که اَمیی رَنجهای دِلهِ سهم بَرنین، اَمیی تسلی یه دِلهِ هم سهم بَرنین. 8 اِی اَداشان، نَخَنیم اون مصیبتهای جی که آسیایِ منطقه یه دِلهِ اَمی سَر بوما، بیخَبَر هَبین. چون فشارهایی که اَمی سَر بوما جوری سخت و اَمیی طاقتِ جی بیشتر با که اَمی زندهِ بُمانِسَّنِ جی هم نا اُمید هَبَیم. 9 راس راسی گمان کانِه بِیم اَمَرِه به مَرگِ محکوم هَکوردَن. وَلی تمام این اِتِفاقان اینه وَسین دَکِته تا نه خودمان رِه، بلکه خُدائی رِه تَوکُل هَکُنیم، که مُردِگانِ زندهِ کانه. 10 خدا اَمَرِه اینجور خطرِجی که کُشِنِه آزاد هَکوردِه و باز هم آزاد کانِه. اَما اونه اُمید دَبِسّیم که باز هم اَمَرِه آزاد کانِه، 11 شُما هَم بایسّی شیمی دُعای هَمرَه اَمَرِه کُمک هَکُنید. تا خِیلیان آمی خاطری شکر هَکُنَن، اون برکتِ خاطری که خیلی آدَمانِ دُعایِ جَوابِ دِلِه اَمَرِه هَده هَبا. پولُس برنامه ها عوض بونه 12 چونکه اَمیی فَخر، اَمیی وُجدانِ که گُواهیِ دَنِه که این دنیایِ دِلِه راسّی و صاف و صادقی یه همره که خدایِ جیه رفتار هَکوردیم، نه آدَمی یه حِکمتِ همرهَ، بَلکه خُدای فیضِ هَمرَه رفتار هَکوردیم، علل خصوص شیمی هَمره. 13 چونکه اَما بِجز اونچه که شِما خواندِنین وفَهمِنین چیز دیگَری شِمِره ننویسِنیم. وَ من امید دارم که شما اینه خوب بِفَهمین 14 هَمونجور که شما تا حَدّی اَمَرِه بِشناسییَین، تا اَمِی خداوند عیسی یه روزِ دِلِه شما اَمَرِه فَخر هَکونید، همونجور که اَما شِمِرِه فَخر کانیم. 15 چون اینِ جی مطمئن بِیم، خَسیم اَوَّل شیمی بَدییَنِ وَسین بییَیم تا دومین دَفه فیضِ تَجربِه هَکُنید 16 مَن خَسَّم می رایِسَر به مقدونیه شِمِرِه بَینَم و مقدونیه یه جی باز هَم شیمی وَر وَگِردَم تا مَرِه یهودیه یه منطقه یه سمت راهی هَکُنید. 17 مَگِه وختی خَسَّم این کارِه هَکُنَم، دو دِل بام؟ مَگِه مَن آدمی یه فِکرایِ همره تَصمیم گیرنَم، اون جور که یه لحظه، هم باگوم ’آرِه‘ و هم باگوم ’نه‘؟ 18 خُدای وفاداری سَر قَسَم که اَمیی گَب شِیمی هَمرهَ ’اَرِه‘ و ’نه‘ نَبا. 19 چون خُدایِ ریکا، عیسیِ مَسیح، که مَن و سیلاس و تیموتائوس شیمی میَن اونه موعظه هَکُردیم، ’آرِه‘ و ’نه‘ نَبا، بلکه اونه دِلهِ هَمِش ’آرِه‘ هیسِه. 20 چون خدایِ تمامِ وعده‌هان مَسیحِ دِلِه ’آرِه‘ هیسِه. اینه خاطری اونه طریقِ جی یِه که اَما ’آمین‘ گونیم، تا خُدا جَلال هَگیرِه. 21 وَلی خدائه که اَمَرِه شیمی هَمره مسیحِ دِلِه بَرقرار کانِه. و اون اَمَرِه مَسح هَکُردِه، 22 اون خودِشِه مُهرِ اَمی سَر بَزَه و خودِشِه روح رِه ایتا بَیانِه یه مثان اَمی دِلِ میَن بَنَه. 23 خُدا رِه شاهد گیرنَم فقط اینه وَسین که شِمِرِه نارحت نَکُنم قُرِنتسِ شهری سَمت نَشَم. 24 نه اینکه شیمی ایمانِ سَر سَروری هَکُنیم، بَلکه شیمی همره، شیمی خُشحالی یه وَسین تَقلّا هَکُنَم، چونکه ایمانِ دِلِه پابرجا هیسین. |
@ 2024 Korpu Company