اول تیموتائوس 6 - گیله ماز

¹ تمام اوشانیکه پاکاری یه گاجمه جیر دَرِن، بایسّی خودِشانِه اَربابانِ کامِلاً احترام بَنِن تا مردُم خُدای اِسم و اَمیِ تعلیم علیِه بَدِ چی نَگون.

² اوشانیکه اوشانه اَربابان ایماندارِن، نباید اَداش هَبوسَّن خاطری، اوشانه کمتر حُرمت بَنِن. بلکه بایسّی اوشانه بِهتَر خِدمَت هَکُنَن، چون اوشانیکه این خِدمتِ دِلهِ منفعت بَرنِن، ایماندار و عزیزِن. این چیزانِ اوشانه تعلیم هَدِه و اوشانه تشویق هَکُن که اینجوری هَکُنَن.

پول دوسّی یه آخر عاقبت

³ اَگِه ینفر یِجور دیگه تعلیم هَدِه و اَمیی خُداوند عیسیِ مَسیح دُرسِّ کلام و اون تعلیم هَمرَه که دینداری یه راهِ دِلِئه جور دَرنییِه،

⁴ اونه غرور بِیته و هیچی نِفَهمِنِه. اینجور آدمِ، جنگ و جدال و دعوا مرافه کَلماتِ سَر داره، که اونه جی حَسودی و دعوا و توهین و بَد گَمانِی وَرِسِنِه،

⁵ وَ همَش مَردمِ میَن جنگ و جدالِ باعث بونه که اوشانِ فکر فاسد هَبا و حَقیقَتِ جی دور هَبان، خیال کانَن دینداری ایتا وَسیلِه منفعتِ وَسین هیسه.

⁶ وَلی دینداری قِناعتِ هَمرَه، گَتِه مَنفعتِ.

⁷ چون اَما هیچی این دُنیایِ دِلِه نیاردیم و هیچی هَم نَتَّنیم این دُنیایِ جی بَبِریم.

⁸ پَس اَگِه اَما خوراک و لِواس داریم، ایشانهِ وَسین قانِعیم.

⁹ وَلی اوشانیکه پولدار هَبوسَّنِ آرزو رِه دارَن، وَسوَسه یه دِلِه و پوچ و هوا وهَوَسِ تَلِه یه دِلِه دَکِنِن که ضرر رِساندِنَن، که مردُمِ نابودی و هلاکتِ سمت کِشاندِنِه.

¹⁰ چون پولدوسی ریشه ایی یه که هر جور بَدی اونه جی به بار هَنِه، و هَمین پولِ حِرصِ که بعضیان ایمان جی دور بونَن، و خودِشان رِه خیلی دَردایِ گِرفتار هَکُردَن.

پولس تیموتائوسِ سِفارش کانه

¹¹ وَلی تو که مَردِ خُدایی، این چیزانِ جی فَرار هَکُن، و صالحی، دینداری، ایمان، مُحبت، پایداری و مُلایمتِ دُمّال دَبو.

¹² ایمان خُجیرِ جنگِ دِلِه جنگ هَکُن. اون زندگی اَبدی که اونِ وَسین دُخوانِسِّه هَبَین و اونِه خیلی شاهدانِ ور اعتراف هَکُردی رِه بَچِسب.

¹³ مَن خُدایِ وَر که هَمِه چیرِه زندگی دَنه، وَ مسیحْ عیسی که پُنتیوس پیلاتُسِ وَر خُجیرِ اعتراف هَکُردِه، جِدّی تِرِه سِفارِش کانَم

¹⁴ که این حُکمِ تا اَمی خُداوند عیسی مَسیح بَموئَنِ موقِه، بی‌ عیب و بی سرکوفت بِداری،

¹⁵ که خُدا اونِه ایتا خُجیرِ وَخت دِلِه انجام دَنه، اونیکه مُبارک هیسِه و تنها حاکِم، شاه شاهان وخُداوندِ خُداوندانِ.

¹⁶ فقط اونه که اَبدیِه، اونیکه ایتا نورِ دِلِه دَرِه که نَشَئنِه اونه نِگاه هَکُردَن، و هیچکس اونه نَدییَه و نَتَّنِه بِینهِ، حرمت و سلطنت تا اَبد اونه هَمرَه دَبو. آمین.

¹⁷ این دُنیایِ پولدارانِ باگو که مغرور نَبون، و خودِشانِه اُمیدِ این دُنیایِ مالِ سَر نُذارَن که نُماندِنه. بلکه اوشانه اُمید خُداییِ رِه هَبو که همه چیره فَت و فَراوان اَمی وَسین فَراهَم کانه تا اوشانه جی کِیف هَکُنیم.

¹⁸ اوشانه دستور هَدِه که خوبی هَکُنَن، خُجیرِ کارانِ دِلِه دولتمند هَبون، بخشنده و دَس و دلباز هَبون.

¹⁹ اینجوری، خودِشانِ وَسین ایتا گَنج اَمبار کانَن که آیندِه یه وَسین ایتا خُجیرِ پِی هیسه تا بِتَّنَن اونچه که حقیقی زندگي هیسِه رِه بِدَس بیارِن.

²⁰ اِی تیموتائوس، اون امانتی که تِرِه بِسپارِسِّه هَبا رِه حِفظ هَکُن. مُفتِ گَبانِ جی و مخالفِ فِکرای جی که اشتباهی، معرفت دُخوانده بونه، دوری هَکُن؛

²¹ چون بعضی آدمان که این چیزانِ دِلِه اِدعا دارَن، ایمان جی دور هَبان. فیض شِیمی هَمرَه دَبو.